«Ti biyál yab jaykʼi i tsalpay abal neʼetsak ki ejtow ki koʼoy an exobchixtaláb axi tu pidhál a Jehová ban celular». ¿Jantʼoj a tsalpayal tatáʼ? Axéʼ xi kaw in uluw an epchal Geoffrey Jackson ban Olchixtaláb 6 kʼal an Kwenél i Ókʼnom ban támub 2020. Talbél in uluw: «Pero xowéʼ i tʼajámal ti kwéntaj abal tu lej tolmiyámal an aplicacion JW Library kom kʼwajat an coronavirus. A Jehová biyalits tu tʼojojiyamal abal ki exlaʼ jantʼoj ki tʼajaʼ».

 ¿Jantʼiniʼ tu tʼojojiyamal a Jehová? ¿Jantʼoj in yejenchij abal ka tsʼejkáj an aplicación JW Library? ¿Ani jantʼoj in yejenchal abal ka tʼojojiyat chudhél chudhél?

 Ti mayo ti 2013, in uchbiy jun i departamento axi kʼwajat ban central mundial axi in bij Programación de MEPS abal kin tsʼejkaʼ jun i aplicación axi kin koʼoy an Traducción del Nuevo Mundo. A Paul Willies, u tólmix al axéʼ xi departamento, jajáʼ in uluw: «Yab jaykʼij i kaldhamalak jun i aplicación antsanáʼ, jaxtám koʼoy ki kubdhaʼ talchik i tʼojláb abal ki ejtow ki tʼajaʼ, ki aliy jitaʼ neʼetsak ti tólmix ani ku tʼojon junax kʼal kʼeʼat i departamentos axi tejéʼ ti Betel. I lej konchi abal tu ku tólmiy a Jehová ani antsanáʼ ti watʼey. Boʼ a itsʼ talbél ejtowat ka olnáj abal kaldhámej axéʼ xi ít aplicación».

 Talbél koʼoy ki tsab tʼojojoy an aplicación kom in yejenchal ki punchij patal an publicaciones ani al yan i kawintaláb. Ti enero ti 2015, an aplicación in kwaʼalakits patal an publicaciones ti inglés ani akak a itsʼ talbél awilakits ka paʼbaʼ an publicaciones al yan i kawintaláb.

 Ani an epchalchik in aynanchal kin tʼojojoy an aplicación, ejtíl punuwamej i videos ani an publicaciones axi u eynal abal an tamkuntaláb jayej i éjtowal ki elaʼ más i olchixtaláb tam i japiyal an Biblia ban aplicación.

 Watʼadh 15 millones i kalel u eyendháb an aplicación ti ítsʼ ani ta kʼicháj 8 millones jitaʼ in japiyal an aplicación. ¿Jaleʼ ti an aplicación u tʼojnal lej alwaʼ? A Paul Willies in ulal: «Chudhél chudhél i kwaʼal yan i tʼojláb ani i aliyal jantʼiniʼ tu ku tólmiy más ani yab ki atsʼaʼ kʼibat ki eyendhaʼ, kom patal kʼwajat ti itmél. Wawáʼ jayej in yejenchal ki aynanchij ki tʼojojoy ani ki itmedhaʼ an aplicación, kom chudhél chudhél kʼwajat ti kʼadhbáb i audios ani i videos ti JW Library. Wawáʼ jayej in yejenchal ki itmedhaʼ abal ka tʼojon alwaʼ an aplicación. Ma xowéʼ ti JW Library waʼats watʼadh 200.000 i publicaciones ani watʼadh 600.000 i grabaciones de audio ani i videos al pilchik i kawintaláb.

 Abal ki ejtow ki tʼojojoy axéʼ xi aplicación, yab expidh in yejenchal ki eyendhaʼ i computadoras. Jayej in yejenchal ki jalbiy abal ki eyendhaʼ i programas. Ti támub kwaʼal ki jalbiy jun i 30.000 pesos abal junchik, jayej an departamento de MEPS in eyendhál jun i 200.000 pesos ti támub abal kin tsʼaʼiy i celulares, i tabletas ani i computadoras abal kin tʼajaʼchik ti kwéntaj abal an aplicación u tʼojnal alwaʼ al juʼtamakits ka eyendháj.

 Axéʼ xi aplicación tu lej tólmiyal. An aplicación JW Library yan jantʼiniʼ ti éjtowal ki eyendhaʼ. Kom xowéʼ u lej eyendháb an aplicación JW Library yabáts i pakuwal yan i tumín abal ka kaldháj an publicaciones ti uw ani abal ka aban. Ki tsuʼuw jawaʼ watʼey kʼal an folleto Examinando las Escrituras diariamente. Ban támub 2013 kaldháj ti uw 12 millones, pero ban tamub 2020 kaldháj expidh 5 millones. Belits abal waʼatsak 700.000 i ít publicadores. ¿Jaleʼ? Kom xowéʼ yan i epchalchik in ajiyal an texto ban aplicación JW Library. a

 An aplicación JW Library yan jantʼiniʼ ti éjtowal ki eyendhaʼ. A Genevieve pel jun i epchal axi u kʼwajíl ti Canadá ani in tsuʼumal abal axéʼ xi aplicación lej tolmiyámej abal ti exóbal tin kwetemtal. Jajáʼ in ulal: «Max kwaʼalak ku kaldháj patal an publicaciones axi kʼwajat ti uw abal tin exobal, neʼetsak ku atsʼaʼ kʼibat kin exobláts tam dhajuw. Kʼal axéʼ xi aplicación expidh in yejenchal ku lekwtsiy an tablet ani tanáʼ neʼets ku ela patal jawaʼ neʼets ku yejenchij abal tin exóbal. Kin exobláts tin lej tolmiyámal abal kin utey kʼal a Jehová ani abal u belomtal ka tsapikmej».

 Axéʼ xi aplicación tu lej tolmiyámal kom kʼwajat an coronavirus. A Charlyn u kʼwajíl ti Estados Unidos. Jajáʼ in ulal: «Kom kʼwajat an coronavirus tin puwél an tsabál, u neʼdhálits watʼadh jun i támub ti yab u tsuʼtal jun i publicacion ti uw axi ítej ti kaldhámej. U lej kʼakʼnanchal a Jehová kom i éjtowal ki koʼoy ti JW Library patal jawaʼ i yejenchal abal ku utey kʼal jajáʼ.

 Yanchik in tsalpayal ejtil a Faye, axi u kʼwajíl ti Filipinas. Jajáʼ in ulal: «Axe xi aplicación u lej kulbetnál kom u kwaʼal patal jawaʼ u yejenchal abal kin utey kʼal a Jehová. U eyendhál tin naktal a kʼicháj tam dhajuw, abal ku atsʼaʼ jantʼoj biyat in tʼojchichil ti atáj, abal kin tʼojojon abal an tamkuntaláb ani abal tin exóbal kʼal an Biblia. Ani tam in weʼ jolat, u eyendhál abal ku metʼaʼ i videos ani tam in kalel tin belal ani in weʼ jolkʼanal u eyendhál abal ku ajay an Biblia o kʼeʼat i publicación. Axéʼ xi aplicación tu lej tólmiyal.

 Jayej tu lej tólmiyal abal ku olnomáts. Jun i epchal axi u kʼwajíl ti Camerún in lej kulbetnaʼ an texto axi in eyendhaʼ in junek tam ti neʼetsak ban olnomtaláb. Talbél jajáʼ in leʼak kin eyendhaʼ, pero yab in tʼilalak jawaʼ jats. Jajáʼ in ulal: «Kom u tʼilalak jun i kaw axi in ulal an texto, u japiy an Biblia ban aplicación ani u aliy nixéʼ xi kaw. Kʼal an aplicación u éjtowal ku elaʼ an textos axi junchikíl yab u tʼilál».

 Kʼal an donaciones axi tatáʼchik a binál ti donate.pr418.com, i éjtowal ki tʼojojoy ani ki alwamedhaʼ an aplicación JW Library ani antsanáʼ an epchalchik axi tin puwél an tsabál in éjtowal kin eyendhaʼ an aplicación. Kʼakʼnamal yan epchalchik kom a binálchik an donaciones kʼal patal a ichích.

1. Octubre ti 2013: Kaldháj an aplicación kʼal an Traducción del Nuevo Mundo ti inglés.

2. Enero ti 2015: Punchat más i publicaciones ti inglés ani jayej al pilchik i kawintaláb.

3. Noviembre ti 2015: I éjtowalakits ki kiloy jawaʼ ki kulbetnaʼ ban publicaciones.

4. Mayo ti 2016: Punuwat jawaʼ i eyendhál abal an tamkuntalábchik.

5. Mayo ti 2017: I éjtowalak ki dhuchaʼ jantʼoj axi i kulbetnál tam u exóbal.

6. Diciembre ti 2017: Punuwat an Biblia de estudio ti inglés.

7. Marzo ti 2019: I éjtowalak ki paʼbaʼ i audios ki tsuʼuw i videos ani ki tsuʼuw an referencias kʼal an Guía de estudio.

8. Enero ti 2021: Xowéʼ i éjtowalakits kʼeʼat jantʼoj kʼal an publicación Kit kʼwajiy kulbél abal etsʼey tam ki binaʼ i exobintaláb kʼal an Biblia.