¡KU KʼWAJIY TʼOJOJODH!
2023: Yab ki kʼibaʼ an aychixtaláb - ¿Jawaʼ in ulal an Biblia?
Al axé xi tamub 2023, i áychal abal wawaʼ ani patal i yanél ku kʼwajiy alwaʼ. ¿Jaleʼ ti belál abal neʼets ka putun jawaʼ i tsalpayal?
An Biblia tu tólmiyal ki koʼoy i aychixtaláb
An Biblia tu ólchal yan i alwaʼtaláb. In ulal abal patal an kʼibataláb neʼets ka taley. Jayej in ulal abal «patal jawaʼ dhuchan ti al an tʼokat dhuchláb játs abal wawaʼ ki exóbnaʼ, játs an kaw axi tu tólmiyal ki kuxuy jawaʼ yajchik ani tu kulbedhanchal i ichích» (Romanos 15:4).
Max a léʼ ka exóbnaʼ más tin kwéntaj an aychixtaláb axi tu pidhál an Biblia, ka tsuʼuw an artículo axi in bij: «La esperanza real de un mañana mejor».
Jun i aychixtaláb axi in éjtowal tu ku tólmiy xowéʼ ta kʼicháj
An aychixtaláb axi tu pidhál an Biblia «pel ejtíl an patʼál axi u pálchinal an tan» (Hebreos 6:19, nota). Axéʼ xi aychixtaláb tu tólmiyal abal yab tu ku kwajlaʼ an kʼibataláb axi i tametnál xowéʼ, abal yab ku lej tʼeʼpin ani antsanáʼ ku kʼwajiy kulbél. Ka tsuʼuw in tʼiplabil talchik i atikláb:
Ka tʼajaʼ ti kwéntaj jantʼiniʼ an aychixtaláb axi ti Biblia in tólmiy jun i inik abal kin jilaʼ ti utsʼál. Ka tsuʼuw an video «Yabáts jant’oj tin kulbedhálak».
Jayej ka tʼajaʼ ti kwéntaj abal an aychixtaláb axi tu pidhál an la Biblia tu tólmiyal tam i kʼibamal jun i yanél. Ka tsuʼuw an video Tolmixtaláb abal jita’ in k’ibámal jun in yanél.
Jun i aychixtaláb axi u tsapikmél kʼicháj ti kʼicháj
An atiklábchik in áychal abal axéʼ xi tamub kin watʼaʼchik más alwaʼ, pero yab in lej belálchik max neʼets ka putun jawaʼ in áychal. An Biblia yab tu kʼambiyal. ¿Jaleʼ ti ulal antsanaʼ? Kom pel a Jehová a Dios axi in ulúmal ani «kom ni jaykʼij u janamkaw Jajáʼ» (Tito 1:2). Expidh Jajáʼ in éjtowal kin putuw patal jawaʼ in ulúmal. Tokot Jajáʼ «in tʼajál patal jawaʼ in léʼ» (Salmo 135:5, 6).
Tatáʼ jayej a éjtowal ka bélaʼ kʼal an aychixtaláb axi tu pidhál an Biblia. Tu kániyal abal kʼayum ka exóbnaʼ jawaʼ in ulal an tʼokat Dhuchláb abal ka tsapikmédhaʼ an aychixtaláb axi a kwaʼal (Hechos 17:11). ¿A kulbetnál ka batsʼuw jun i exobintaláb kʼal an Biblia?Yab kwaʼal ka jalbiy. Ka tujchij an tamub 2023, kʼal jun i áychixtaláb.
a An bijláb Jehová, pel in bij a Dios (Salmo 83:18).