Tin puwél an tsabál lej tsapikmenek an kʼakʼal, ani kʼwajat i tsuʼtal jawaʼ ti biyál yabak u watʼel. Ka tsuʼuw axéʼchik xi olchixtaláb:

•   «Tin puwél an tsabál yab waʼtsinenek jun a itsʼ ti junio axi más kʼakʼenek ejtíl axi al axéʼ xi tamúb, ma ti tujumal ki tʼajaʼ ti kwéntaj ban tamub 1849» (Oficina Nacional de Administración Oceánica y Atmosférica, Departamento de Comercio de Estados Unidos, 13 a julio ti 2023).

•   «Ti Italia, España, Francia, Alemania ani ti Polonia in tametnálchik lej yan i kʼakʼém, ani in ayalchik kin bajuw ma 48 ºC [118 ºF] ban islas ti Sicilia ani Cerdeña. Walám jats an kʼij axi más kʼakʼenek an kʼakʼal ti Europa» (Agencia Espacial Europea, 13 a julio ti 2023).

•   «Biyat u kʼakʼel más an tsabál i aychal abal ka ulits i ab axi más tsapik ani más wilkʼidh, axéʼ neʼets kin tʼajaʼ ka waʼtsin más i ukʼeltaláb» (Stefan Uhlenbrook, director de la Sección de Hidrología, Recursos Hídricos y Criosfera de la Organización Meteorológica Mundial, 17 a julio ti 2023).

 ¿Ti tʼeʼpindhál ka waʼtsin lej yan i olchixtaláb ejtíl axéʼ? Ka tsuʼuw jawaʼ in ulal an Biblia tin kwéntaj axéʼ.

 Aníts. An kʼakʼém axi waʼats ani an tsakip ab, in biyál olnámal an Biblia abal neʼetsak ka watʼey xowéʼ ta kʼicháj. Jun i tʼiplab, a Jesús in uluw abal neʼetsak ki tsuʼuw i kʼij lej kʼibat ani i pulik kʼakʼadhtaláb (Lucas 21:11; Serafín de Ausejo, 1975). Yan i atiklábchik u lej jikʼél kin tsuʼuw abal an kʼicháj kʼwajat ti lej kʼakʼel, ani in tsʼejnál abal an atiklábchik kin talabedhaʼ an tsabál.

 Imbáj. A Dios in tsʼejkaʼ an tsabál abal ku kʼwajiy abal etsʼey ani yab neʼets kin jilaʼ abal an inik kin talabedhaʼ an tsabál (Salmo 115:16; Eclesiastés 1:4). Ma in ulumal abal neʼets kin talabedhaʼ jitaʼ kʼwajat in odhnál an tsabál (Apocalipsis 11:18).

 An Biblia in ulal abal a Dios neʼets kin kʼaniy an tsabál, ani yab neʼets kin jilaʼ ka odhnáj.

•   «[A Dios] yab in jilál abal an tsapik ikʼ kin odhnaʼ an tsabál, ani in koydhál an pujal axi ban lejem» (Salmo 107:29). A Dios in ejtowal kin koydhaʼ an tsapik ikʼ. Jajáʼ in éjtowal kin tʼajaʼ abal yab tu ku odhnaʼ an tsapik kʼakʼal ani an tsapik ab.

•   «Tatáʼ a beletnál an tsabál ani a tʼajál abal kin bínaʼ i waliláb» (Salmo 65:9). A Dios neʼets kin wenkʼow an tsabál lej alabél.

 Abal ka exlaʼ más tin kwentaj axéʼ xi aychixtaláb, ka tsuʼuw an artículo «¿Quién salvará el planeta?».