Ti domingo 20 a noviembre ti 2022 an Naciones Unidas taleychik ti tʼilom tin kwéntaj jantʼiniʼ yabáts ka odhnáj an tsabál (COP27). Bélits abal uluwat abal neʼets ka pidhan i tumín jitaʼchik ka odhnáj, yanchik in ulal abal axéʼ yab neʼets kin tsʼejkaʼ an kʼibataláb.

•   A António Guterres axi pel an secretario axi ban Naciones Unidas, ti 19 a noviembre ti 2022, in uluw: «Alwaʼ abal neʼets ka pidhan i tumín jitaʼchik ka odhnáj tam ka waʼtsin kun i yajchiktaláb». «Pero axéʼ yab neʼets kin tʼixkʼaʼ an kʼibataláb». «Kom an tsabál bel kʼwajat lej odhnach».

•   A Mary Robinson axi pelak an presidenta ti Irlanda ani jayej in kʼaniyalák in uchbil an atiklábchik ti 20 a noviembre ti 2022 in uluw: «An tsabál in lej yéjenchal abal ki béletnaʼ».

 An tsakamchik lej tʼeʼpidh kom yab in exlál jantʼoj neʼets ka watʼey kʼal an tsabál. ¿Walám In éjtowal an bichowchik ka junkun abal yabáts ka odhnáj an tsabál? ¿Jantʼoj in ulal an Biblia?

 Bélits abal ka kʼwajiy junkudh ani kin tsápnanchij abal yabáts ka odhnáj, an Biblia biyálits in olnál abal yab neʼets kin ejtow kin putuw axéʼ xi tsalap. Ki tsuʼuw tsab i tsalap:

•   «In xeʼtsintal an atiklábchik yab u awil ka lujkwat» (Eclesiastés 1:15).

   Jawaʼ in leʼ kin uluw: An atiklábchik yab tsʼejkáj abal kin abatnaʼ tin kwetémtal. (Jeremías 10:23) Bélits max an eyalchik kin tsápnanchik kin tsʼejkaʼ an kʼibataláb yab neʼets kin éjtow..

•   «An atiklábchik neʼets kin watʼadh kʼanidhayej tin baʼ. Neʼets kin lej kʼainchiyej an tumín, neʼets kin más walkaʼ tin baʼ kin tʼajayej jawakitskʼij in léʼ in anam tʼuʼul» (2 Timoteo 3:2, 3).

   Jawaʼ in leʼ kin uluw: An Biblia biyálits tin ulumal abal an atiklábchik neʼetsak kin tejwamédhaʼ axéʼ xi tʼajbiláb, ani abal yab neʼetsak ka tʼojonchik junax. ¿Yab játs axi kʼwajat ti watʼel?

 An eyalchik yab neʼets kin éjtow kin tʼajaʼ abal an atiklábchik kin jilaʼ kin odhnaʼ an tsabál. Pero a Dios in bijiyámal a Jesucristo abal kin abatnaʼ tin puwél an tsabál. An Biblia in ulal axéʼ tin kwéntaj a Jesús:

•   «Jajáʼ neʼets ti éyal ani neʼets ka exláj ti Alwaʼ Exóbchix, jantʼiniʼ an Dios axi in kwaʼal in Tsap, Tataláb axi abal Etsʼey ani Eyal kʼal an Koyataláb» (Isaías 9:6, ka tsuʼuw an nota).

 A Jesús játs an tsʼaleʼ tin Eyaltal a Dios (Mateo 6:10). Jajaʼ in léʼ kin beletnaʼ an tsabál ani an atiklábchik ani kwaʼal an tsapláb ani tsalpadhtaláb abal kin tʼajaʼ (Salmo 72:12, 16). Tam axéʼ xi eyal kin abatnaʼ an tsabál yabáts neʼets kin jilaʼ abal «jitaʼ kʼwajat in kʼibedhál jawaʼ waʼats tejéʼ tsabál» kin áynanchij kin tʼajaʼ. Kʼayúm neʼets kin alubmédhaʼ an tsabál (Apocalipsis 11:18, ka ajiy an nota; Isaías 35:1, 7).

 Max a léʼ ka exlaʼ más tin kwéntaj jantʼiniʼ kʼwajat ti odhnáb an tsabál, ka ajiy an artículo «El cambio climático y nuestro futuro: lo que dice la Biblia».