Tin puwél an tsabál, yan i bichow yab kʼwajat junkudh kom u pejexchik tin kwéntaj an eyal. Al jun i encuesta axi tʼajan ti 2022 an centro de investigación Pew Research Center, in uluw abal al 19 i países an 65% kʼal an atikláb yabchik kʼwajat junkudh kom in tólmiyal pilchik i eyal.

 ¿Juʼtáj tatáʼ it kʼwajíl, an atikláb u pejexchik kom u otsel ban política? ¿Jaleʼ walám tu watʼel nixéʼ? ¿Walám waʼats jitaʼ axi in éjtowal kin tsʼejkaʼ? Ka tsuʼuw jawaʼ in ulal an Biblia.

 An Biblia in uluw abal u kʼwajatits tu kʼwajil tin taltal an xeʼtsintaláb, jaxtám an atiklábchik neʼets kin tʼajaʼ yan i tʼajbiláb axi yab in tólmiyal abal ka waʼtsin i junkudhtaláb.

•   «Ka tsoʼobnaʼ abal neʼets ka más pojkaxméj an atiklábchik tam kin bajuw in taltal an xeʼtsintaláb. Kom neʼets kin watʼadh kʼanidhaʼ tin baʼ; […] yabchik neʼets kin léʼnaʼ ka tʼilmáts abal kin tsʼejkaʼ jun i kaw» (2 Timoteo 3:1-3).

 An eyalchik yab in éjtowal ka tʼojon alwaʼ, bélits abal u tolmiyab kʼal yan i atikláb abal kin putuw kʼal in uchbíl. Talchik in kwaʼal pilchik i tsalap, kʼeʼatchik ma in tsalpayal abal yab neʼets kin ejtow ka tʼojon junkudh abal kin tsʼejkaʼ an kʼibataláb. Axéʼ in tejwamedhál abal kʼwajat ti putnal jawaʼ an Biblia biyálits tin ulumal.

•   «An inikchik expidh in abatnámal axi kʼeʼat abal kin ódhnaʼchik» (Eclesiastés 8:9).

 Pero an Biblia in ulal jantʼiniʼ ti neʼets ka tsʼejkáj patal: Neʼets ka kʼwajbáj jun i eyaltaláb axi neʼets kin ejtow kin tixkʼaʼ patal jawaʼ in tʼajál ki yajchiknaʼ.

 An Biblia in olnál tin kwéntaj jun i eyal axi lej pilits in éy kʼal axi waʼats, axéʼ xi eyal neʼets kin ejtow kin tixkʼaʼ patal an kʼibataláb axi waʼats. Axéʼ xi eyal pel a Jesucristo. Jajáʼ in kwaʼal an tsapláb, an awiltaláb ani jayej in leʼ abal ka waʼtsin i koyataláb ani junkudhtaláb tin puwél an tsabál.

•   «Tam kin bajuw an kʼicháj neʼets ka kʼwajiy expidh axi bolidh ani neʼets ka waʼtsin yan i koyataláb» (Salmo 72:7).

•   «Neʼets ka puwénchat kʼal patal an atikláb» (Salmo 72:11).

 A Jesús játs an eyal axi chubax in éjtowal ti abatnom kom yab expidh u tʼeʼpinal kʼal an atikláb, jayej chubax in leʼ kin tólmiy ani más jitaʼ odhnámej.

•   «Jajáʼ neʼets kin kʼaniy jitaʼ in koniyal i tolmixtaláb ani tsaʼat in ey, jitaʼ yab in kwaʼal kʼal jitaʼ ti ka kʼaniyat. Neʼets kin yajnanchij jitaʼ tsaʼat in ey, axi tsʼejwantal, játs axi neʼets kin kʼaninchij in ejatal. Neʼets kin tʼajaʼ abal yabáts kin yajchiknaʼ jitaʼ u odhnáb» (Salmo 72:12-14).

 Tu kaniyal abal ka exlaʼ más tin kwéntaj an eyaltaláb axi in okʼnál a Jesús, játs in eyaltal a Dios, jayej ka tʼajaʼ ti kwéntaj jantʼiniʼ in éjtowal ti tólmiy axéʼ xi eyaltaláb ani jantʼoj a ejtowal ka tʼajaʼ tatáʼ.

•   Ka tsuʼuw an video ¿Jant’oj játs in Eyaltal a Dios?

•   Ka ajiy an artículo «El Reino de Dios: un gobierno sin corrupción».