Ti 20 a Noviembre ti 2022 ma ti 18 a diciembre i áychal ka tamkun 5.000 millones i atiklábchik abal kin tsuʼuw an futbol kʼal an FIFA. Yan i atiklábchik in tsálpayal abal axéʼchik xi ubatʼintaláb in éjtowal kin junkuw an atklábchik pero expidh al weʼ i kʼij.

•   «An deporte in éjtowal kin jalkʼuy an atiklábchik». (Nelson Mandela, presidente axi ti Sudáfrica).

•   «An fútbol in tʼajál abal an atiklábchik kin koʼoy i aychixtaláb. Jayej ka kʼwajiychik kulbél ani ka kʼanidhaxin» (Gianni Infantino, presidente axi kʼal an FIFA). a

 Walám in éjtowal an futbol o kʼeʼat i ubatʼintaláb kin tʼajaʼ abal an atiklábchik chubax ka kʼwajiy junkud? ¿Chubax i éjtowal ku kʼwajy junkudh ani kʼal i koyataláb?

 Al an mundial ti Qatar 2022 in tʼajaʼ abal an eyalchik ka tokʼtsixin kom yab in kʼakʼnanchij in ejatal an atiklábchik axi tʼojon tanáʼ, kom pil ti walkidh ani tsʼejwantálchik.

 Bélits antsanaʼ yanchik in tsálpayal abal an futbol mundial in tʼajál abal an atiklabchik ka kʼwajiy kulbél jun weʼ i kʼij. Pero yabchik junkudh abal etsʼey. Axéʼchik xi ajib in tʼajál abal an atiklábchik kin tejwamédhaʼ jawaʼ in tsálpayal ani jawaʼ chubax in atsʼál. An Biblia biyálits tin ulumal abal an atiklábchik neʼets kin tʼajaʼ i tʼajbiláb axi yab tekedh ani axéʼ in tejwamédhal abal u kʼwajat «tin taltal a kʼicháj» (2 Timoteo 3:1-5).

 An Biblia tu ólchal abal waʼats jun i chubax aychixtaláb juʼtáj an atiklábchik neʼets ka kʼwajiy junkudh abal etsʼey. Jayej in ulal abal patal an atiklábchik neʼets ka kʼwajiy junkudh, abatnadh kʼal junkats i eyal axi kʼwajat ti éb axi an Biblia in bíjiyal «in Éyaltal a Dios» (Lucas 4:43; Mateo 6:10).

 A Jesucristo an tsʼaleʼ kʼal nixéʼ xi Eyaltaláb neʼets kin tʼajaʼ ka waʼtsin i koyataláb tin puwél an tsabál. An Biblia in ulal:

•   «Axi bolidh neʼets ka yaney ani neʼets ka waʼtsin yan i koyataláb» (Salmo 72:7).

•   «Jajaʼ neʼets kin kʼaniy an tsʼejwantal axi in kónoyal i tolmixtaláb .  Neʼets ki kʼaniy kʼal an pojkaxtaláb ani an yajchiktaláb» (Salmo 72:12, 14).

 Xoweʼ ta kʼichaj in exóbchixtal a Jesús in tʼajámal abal millones i atikláb ka kʼwajiy junkudh al 239 i bichowchik ani kwenchal. Ani in éjtowamalchik kin jilaʼ an tsakultaláb. Abal ka exlaʼ más, ka ajiy an artículo axi in bij «Rompamos el ciclo del odio».