An pextaláb axi waʼats ti Ucrania ani an tsapik ikʼlom, in tʼajamal abal ka lej jálbin an kʼapnél. Axéʼ u watʼel al i pakdhaʼ bichow axi expidh in tʼojonchal in tsabálil ani yab in nujuwal nibal in tsʼaʼiyal i kʼapnél, jaxtám u lej jálbinal.

•   «An kʼibataláb axi waʼats ban pakdhaʼ bichow, an tsapik íkʼlom, ani in jalbíl an kʼamal, in tʼajamal abal yab ka waʼtsin yan i kʼapnél ani max waʼats, ka lej jálbin» (António Guterres, secretario general de las Naciones Unidas, 17 a julio ti 2023).

•   «An atiklábchik axi exoblámadh in ulal abal kom a Rusia yabáts neʼets kin nujuw an kʼapnél axi jajáʼchik in kwaʼal, neʼets kin tʼajaʼ abal ka lej jálbin an kʼapnél axi tin puwél an tsabal, pero más ban norte ti África ani ban Oriente Medio» (Atalayar.com, 23 a julio ti 2023).

  Ka tsuʼuw jawaʼ in ulal an Biblia tin kwéntaj an kʼapnél ani jawaʼ neʼets ka watʼey axi taʼtal a kʼicháj.

•   A Jesús in kʼej uluw: «Neʼets ka pejéxinchik bichow kʼal in at-bichow ani éyal kʼal in at-éyal ani neʼets ka waʼtsin i jáyil» (Mateo 24:7).

•   Ban libro in kʼál a Apocalipsis, u kaw tin kwéntaj tseʼ i inik axi neʼets punat ba i bichim. Jun in júmbiyal an pextaláb ani kʼeat an jáyil. An Biblia in kʼej uluw abal neʼets ka jalbin an kʼapnél, kom yab neʼets ka waʼtsin yan. «U tsuʼuw jun i inik punat al jun i bichim axi tʼunuʼ, ani in chiʼdhalak jun i lejbaxtaláb tin kʼubak. Ani […] u atsʼaʼ jun i kaw axi in ulalak: ‘jun i kilo i trigo in jalbíl jun i denario ani ox i kilo i cebada in jalbíl jun i denarioʼ» (Apocalipsis 6:5, 6, Dios habla hoy).

 Axéʼ an kʼej kaw kʼwajat ti putnál xoweʼ ta kʼicháj, an kʼij axi an Biblia in bijiyal ti «taltal a kʼicháj» (2 Timoteo 3:1). Max a leʼ ka exlaʼ más tin kwéntaj axéʼ xi tseʼ i inik axi punat ban bichim ani tin taltal a kʼicháj, ka tsuʼuw an video Ti 1914 lej jalkʼun an xeʼtsintaláb ani ka ajiy an artículo “¿Qué representan los jinetes del Apocalipsis?”

•   An Biblia tu tólmiyal abal ki tametnáʼ an kʼibataláb axi xoweʼ ta kʼicháj, ejtíl an jáyil ani kom jalbinének an kʼapnél. A ejtowal ka tsuʼuw axeʼchik xi tólmixtaláb ban artículo “Cómo vivir con menos.”

•   An Biblia tu pidhal i aychixtalab ani tu olchal abal lej weʼíts neʼets ka talabedháj an kʼibataláb. In ulal abal ban tsabál neʼets ka waʼtsin yan i kʼapnél ani nibal jita neʼets kin yajchiknaʼ kʼal i jayíl (Salmo 72:16). Abal ka exla más tin kwéntaj axéʼ xi aychixtaláb ani jantʼiniʼ ti neʼets ka putun, ka ajiy an artículo “La esperanza real de un mañana mejor.”