¡KU KʼWAJIY TʼOJOJODH!
Yan i ukʼeltaláb - Jawaʼ in ulal an Biblia
Tin puwél an tsabál yan i atiklábchik kʼwajat in yajchiknál kom waʼtsinenek i ukʼeltaláb. Ka tʼajaʼ ti kwéntaj jawaʼ watʼenek:
«Ti China axi watʼenek a kʼicháj ulnek yan i ab, yab ejtíl axi watʼenek al an 140 i támub [...]. Ti sábado ma ti miercoles kʼadhiy an jáʼ watʼadh 70 centimetros» (29,3 pulgadas) (AP News, 2 a agosto ti 2023).
«Ti jueves ani viernes, an tsapik ikʼ axi an atiklábchik axi exoblámadh in bijiy Khanun in uldhaʼ i tsapik ab ani i tsapik ikʼ ban sur ti Japón. Ani tsemets tsab i atikláb. [...] ani in aychalchik abal ka kʼadhiy 60 centimetros an jáʼ (2 pies) ban tsʼenchik axi ti Taiwán» (Deutsche Welle, 3 a agosto ti 2023).
«Tin taltal an semana ti Nueva Escocia ulits lej yan i ab axi in ódhnaʼ an kwenchalábchik axi ban Atlántico canadiense ani yab in bajuwámalak antsana in tsapik an ab al watʼenek 50 i tamub» (BBC News, 24 a julio ti 2023).
¿Jantʼoj in ulal an Biblia kʼal jawaʼ kʼwajat ti watʼel?
U tejwamél abal u kʼwajatits tin taltal a kʼicháj
An Biblia in olnál abal u kʼwajat tu kʼwajíl al jun i kʼij axi bijiyal «tin taltal a kʼichaj.» (2 Timoteo 3:1). A Jesús in uluw abal axéʼ a kʼichaj neʼets ki tsuʼuw i kʼakʼadhtaláb (Lucas 21:11). Kʼal patal jawaʼ watʼenek ban tsabál in tʼajámal abal ka lej kʼakʼey a kʼicháj, ka lej ulits an ab ani ka waʼtsin i ukʼenib.
Pel jantʼoj axi tu pidhál i aychixtaláb
An Biblia in ulal abal patal axéʼ tu pidhál jun i aychixtaláb. ¿Jaléʼ ti ulal axéʼ? Kom a Jesús in ulú: Tam ka tsuʼuchik ka watʼey patal axéʼ, ka exlaʼchik abal in Éyaltal a Dios kʼwajat utat (Lucas 21:31; Mateo 24:3).
Patal jawaʼ kʼwajat ti watʼél in tejwamedhál abal lej wéʼíts a Jehová neʼets kin tʼajaʼ abal yabáts tu ku odhnaʼ patal axéʼ (Job 36:27, 28; Salmo 107:29).
Max a léʼ ka exlaʼ mas kʼal jawaʼ in léʼ kin tʼaja in Éyaltal a Dios abal kin tixkʼaʼ patal axéʼ axi in tʼajál ki yajchiknaʼ ka tsuʼuw an artículo “¿Quién salvará el planeta?”