I EJATAL TU AYKOL KʼAL A CRISTO

Ka tólmiy an atiklábchik axi yab in belál abal waʼats jun i tsʼejkom

KA TʼOJON TI

Tam i xeʼets ta ólnom ani a elál jun i atikláb axi yab in belál kʼal a Dios, walám yab a exlál jantʼoj ka uchaʼ ani a tsalpayal abal yab neʼets ti atsʼaʼ. Max játs a watʼamal, ka tʼilaʼ abal xowéʼ waʼats yan i epchal axi ti biyál yab in belálak max waʼats jun i Dios. Yan kʼal jajáʼchik expidh in yéjenchalak ka tejwamédhanchat abal jaleʼ ti belál abal waʼats jun i Dios (Ro 1:20; 10:14).

TALBÉL TA TSUʼÚMAL AN VIDEO KA TʼILAʼCHIK: JITAʼ YAB IN KWAʼAL I BELOMTALÁB JAYEJ IN ÉJTOWAL KIN KOʼOY. AN ATIKLÁBCHIK AXI YAB IN KWAʼAL JUN I BELOMTALÁB, KA TÓKʼTSIY AXÉʼ XI KONOWIXTALÁB:

¿Jantʼiniʼ tu tólmiyal in tʼiplábil an epchal Tommaso abal ki ólchij an alwaʼ kaw jitaʼchik yab in belál kʼal a Dios?

¿Jantʼoj neʼets ka tókʼtsiy?

¿Jantʼiniʼ i éjtowal ki tʼilmaychik?

Max ka elaʼ jun i atikláb axi yab in belál kʼal a Dios, ka tejwamédhanchij abal a tʼajál ti kwéntaj ani ka lej otsʼówiy jawaʼ in atsʼál o jantʼoj in tsalpayal (2Ti 2:24). Ka tsalpay jantʼoj in kulbetnál kin tʼilaʼ nixéʼ an atikláb ani játs ka tʼilchij. Ka tsalpay kʼal axéʼ: ¿Tejwaʼ abal nixéʼ an atikláb neʼets kin léʼnaʼ kin exlaʼ jaleʼ ti belál kʼal a Dios? Max játs antsanáʼ, ka eyendhaʼ an publicaciones ani an videos axi waʼats, ejtíl an folleto ¿Es la vida obra de un Creador?, ani Boʼ i konowixtaláb axi alwaʼ ki tókʼtsiy abal ki exlaʼ jantʼiniʼ ti tujey an ejataláb. Axéʼ an folletos jayej punuwámej ban publicaciones axi i eyendhál abal ki bínaʼ i exobintaláb kʼal an Biblia, tanáʼ neʼets ki elaʼ dhúbatkʼij.

Walám i wéʼ jikʼél ka tujchij ka tʼilmay jun i atikláb axi yab in belál kʼal a Dios kom yab a exlál jantʼiniʼ ka tʼajaʼ. Max játs a watʼal, ka konchij ti tólmiy jun i epchal axi witʼadh ti ólnom ani yab ka ukʼchiy abal a Jehová neʼets ti tólmiy abal ka ejtow ka tʼilmay axéʼ xi atikláb. Jajáʼchik in éjtowal kin exlaʼ kʼal a Jehová belits max xowéʼ yabaye in belál (Hch 13:48).