CAPÍTULO 37

¿In tomnálits kin pujan?

Ka uluw max chubax o yab chubax:

Patal jitaʼ in leʼ kin jaʼubnaʼ a Jehová kwaʼal ka pujan.

□ Chubax

□ Yab chubax

An pujantaláb tu tólmiyal abal yab ku ulits ku walbin.

□ Chubax

□ Yab chubax

An pujantaláb neʼets tu tólmiy abal ki kʼaniy i éjatal.

□ Chubax

□ Yab chubax

Max yab kin pujan, a Dios yab neʼets tin tsʼalaʼ kʼal jantʼoj u tʼajámal.

□ Chubax

□ Yab chubax

Kom u jaʼúbchik kʼwajat ti pujnal, nanáʼ jayej kwaʼal kin pujan.

□ Chubax

□ Yab chubax

¿A TʼAJAL ta ejatal an abatnaxtaláb axi tal ti Biblia? A tsapnanchal ka tʼajaʼ ta jaʼúb a Dios? ¿A tʼilmayal an atiklábchik kʼal jawaʼ a belál? Max an tokʼtsixtaláb kʼal axéʼ xi óx i konowixtaláb pél aníts, ani max yab it pujnenek, walám kʼwajat a tsálpayal abal neʼets ka tʼajaʼ. Ka tsálpay jun i wéʼ. Okʼox kwaʼal ka tsuʼuw abal max it kʼwajat tʼojojodh. Axi neʼets ti tólmiy pél ka exlaʼ jantʼiniʼ ka tokʼtsiy an konowixtaláb axi tin tujtal.

● Patal jitaʼ in leʼ kin jaʼubna a Jehová kwaʼal ka pujan.

Chubax. Jats jawaʼ a Jesús in uluw kin tʼajaʼ in aykolilchik (Mateo 28:​19, 20). Ma a Jesús jayej pujan. Jaxtám max tatáʼ a leʼ ka aynaʼ a Cristo, tatáʼ jayej kwaʼal kit pujan tam kit kʼwajiy tʼojojodh ani ka lenaʼ ka tʼajaʼ.

● An pujantaláb tu tólmiyal abal yab ku ulits ku walbin.

Yab chubax. An pujantaláb pél jun i tʼiplab abal an atiklábchik kin exlaʼ abal a binamal a éjatal abal ka tʼojonchij a Jehová. Tam i pidhál i éjatal a Jehová i tʼajal kʼal i kulbetaláb jawaʼ jajáʼ in kulbetnál, ani yab expidh abal ki tʼapiy jawaʼ kidháb axi wawáʼ i kulbetnál.

● An pujantaláb neʼets tu tólmiy abal ki kʼaniy i éjatal.

Chubax. Jantʼiniʼ in ulal an Biblia, an pujantaláb lej exbadh abal ki jekʼondhaʼ i éjatal (1 Pedro 3:21). Bélits antsanáʼ, yab jaʼ etíl max kʼwajat i tsʼaʼiyal jun i seguro abal tu ku kʼaniy kʼal patal jawaʼ ki watʼaʼ. Imbáj. Kwaʼal ki tʼajaʼ kom i lej kʼanidhál a Jehová ani i leʼ ki tʼojonchij kʼal patal i ichích ani abal etsʼey (Marcos 12:​29, 30).

● Max yab kin pujan, a Dios yab neʼets tin tsʼalaʼ kʼal jantʼoj u tʼajámal.

Yab chubax. A Santiago 4:17 in ulal abal «max a exlál jawaʼ alwaʼ, ani yab a tʼajál, nixéʼ pél jun i walabtaláb», bélakits abal max it pujadh o inbáj. Jaxtám ka lej tsalpay: ¿A exbayal jawaʼ a Dios in aychiyal kʼal tatáʼ? ¿It púlikits abal ka tsalpay jantʼiniʼ ti kʼwajat a éjatal? Max jats antsanáʼ, pel an kʼij abal kit káwin kʼal a tatáʼchik o kʼal jun i ókʼnom. Jajáʼchik neʼets ti tólmiy abal ka bajuw kit pujan.

● Kom u jaʼúbchik kʼwajat ti pujnal, nanáʼ jayej kwaʼal kin pujan.

Yab chubax. Ta ichích kwaʼal ka kalej an leʼnomtaláb abal kit pujan (Salmo 110:3). Ani in tomnál ka tʼajaʼ tam ka exbay jantʼoj in leʼ kin uluw ka tʼajaʼ tit ólchix kʼal a Jehová ani tam it kʼwajatits tʼojojodh abal ka yakʼwaʼ nixéʼ xi ayláb (Eclesiastés 5:​4, 5).

Jun jantʼoj axi lej exbadh neʼets ti jalkʼunchij a éjatal

An pujantaláb ti jalkʼunchal a éjatal ani in tʼajál ka koʼoy yan i lablixtaláb. Ani axéʼ in tʼajál abal ka koʼoy jun i ayláb axi lej exbadh. ¿Jawaʼ? Ka putuw kʼal patal jawaʼ a uchámal a Jehová abal neʼets ka tʼajaʼ tam it pujnal.

¿In bajuwits an kʼij abal kit pujan? Tam, a kwaʼal jandheʼ abal kit kʼwajiy kulbél. ¿Pel jun i púlik alwaʼtaláb ki exlaʼ abal kʼwajat i tʼojonchal a Jehová kʼal patal i ichích ani ki tejwamédhaʼ chudhél chudhél abal i tʼajchal in kulbétal? (Mateo 22:​36, 37.)

TIN AYTAL AN CAPÍTULO

Ka exlaʼ jantʼiniʼ ka kanchij in alwáʼ an ejataláb.

AN TEXTO JUʼTÁJ TI KALDHACH

«Ani tam tu lej konchal kʼal in yajnaxtal a Dios, epchalchik, ka matiychik a putát jantʼiniʼ i tsʼakchixtalab ejat, xi tʼokat, xin batsʼuwal a Dios, jun i kʼakʼnaxtaláb tʼokat kʼal jun i tsalap axi exóbchidh.» (Romanos 12:1)

JAWAʼ A ÉJTOWAL KA TʼAJAʼ

Ka konowiy a tátajchik jawaʼ tam epchal axi ti tamkuntaláb in éjtowal ti tólmiy abal ka ejtow ka tsapikmédhaʼ a jaʼúbtal kʼal a Jehová (Hechos 16:​1-3).

¿A EXLÁLAK AXÉʼ?

An pujantaláb lej exbadh abal ka kʼaniy a éjatal (Ezequiel 9:​4-6).

¡KA TʼAJAʼ AXÉʼ!

Exobintaláb axi ti Biblia axi kwaʼal ku alwaʼ exbay abal kin pujan: ․․․․․

¿Jantʼoj u éjtowal ku konowiy u tátaj o u nánaj tin kwéntaj kʼal axéʼ? ․․․․․

ANI TATÁʼ, ¿JANTʼOJ A TSÁLPAYAL?

● ¿Jaleʼ ti an pujantaláb in kwaʼal in lej exbádh?

● ¿Jaleʼ tu pujnal junchik i kwitól tam yabayej in bajuwal an kʼij?

● ¿Jaleʼ ti talchik i kwitól in lej tsálpayal abal kin pidhaʼ in éjatal a Jehová ani ka pujan?

[Comentario]

«Ku tʼilaʼ abal in kʼwajat pujadh tin tólmiyal ku tʼaja jawaʼ bolidh ani yab kin ijkan ku tʼajaʼ jawaʼ yab in tomnál.» (Noemí)

[Recuadro]

konowixtaláb axi más u t’ajnal tin kwéntaj k’al an pujantaláb

¿Jant’oj in kálchiyal an pujantaláb? Tam kit pujan pel ejtíl max it tsémel, antsanáʼ i jilál i biyál kidháb tʼajbilábil ani i xeʼtsintal. Tam it kalel ban jaʼ, jats jantʼiniʼ max it waʼtsinal ti ít, pero xowéʼ pel abal ka tʼajchij in kulbétal a Jehová, ani ka tʼajaʼ patal jantʼiniʼ jajáʼ in kulbetnál.

¿Jant’oj in le kin uluw ki t’ojonchij k’al patal i éjatal a Jehová? In leʼ kin uluw ka jilaʼ ka tʼajaʼ jawaʼ a kulbetnál ta éjatal, kom xowéʼ a éjatal pelits in kʼál a Jehová (Mateo 16:24). Jaxtám, okʼxidh kit pujan ka tʼajchij jun i oláb a Jehová juʼtáj a uchál abal neʼets ka punuw okʼox ta éjatal abal ka tʼajchij in kulbétal.

¿Jant’oj in tomnál ku t’aja’ ok’xidh kin pujan? Kwaʼal kit xeʼtsin jantʼiniʼ in ulal an Biblia ani ka tʼilmay an atiklábchik kʼal jawaʼ a belál. Jayej kwaʼal ka koʼoy jun i alwaʼ jaʼubtaláb kʼal a Dios kʼal an alwaʼ exobintaláb ani an oláb. In tomnál ka tʼojonchij a Jehová kom tatáʼ a léʼ, yab kom axi más in ulalchik ka tʼajaʼ.

¿Jay i támub in tomnál ku ko’oy abal kin pujan? An támub axi ka koʼoy yab lej in kwaʼal in exbádh. Pero jawaʼ axi más exbadh jats ka koʼoy jun i alwaʼ exlomtaláb abal ka exbay jantʼoj in leʼ kin uluw ka pidhaʼ a éjatal a Jehová.

¿Jant’oj kwa’al ku t’aja’ max u le’its kin pujan ani u tátajchik in ulal ku aychiy? Max jajáʼchik in tsálpayal abal in yéjenchal i kʼij abal ka tʼajaʼ ta éjatal an tsalpadh kaw, ka belkaʼ ani ka kaldhaʼ i kʼij abal ka tsapikmédhaʼ a bélomtal kʼal a Jehová (1 Samuel 2:26).

[Recuadro]

Página juʼtáj ti tal jawaʼ a ejtowal ka tʼajaʼ

¿kʼwajat a tsálpayal abal kit pujan?

Tin aytal an konowixtaláb neʼets ti tólmiy ka tsuʼuw max a takuyámal ka tʼajaʼ jun i alwaʼ tʼajbiláb ta éjatal. ¡Ani yab ka ukʼchiy ka ajiy an textos okʼxidh ka binaʼ jun i tokʼtsixtaláb!

¿A belál a Jehová? ¿Jantʼiniʼ ti kʼwajat a tejwamedhál? (Salmo 71:5.) ․․․․․

¿A bajuwal ka kwetém exlaʼ an tʼajbiláb axi alwaʼ ani yab alwaʼ? ¿ Jaykʼij ta tʼajámal? (Hebreos 5:14.) ․․․․․

¿Jayíl it ól ta kʼicháj? ․․․․․

¿A ulal jawaʼ a yéjenchal ta olábil? ¿Kʼal jawaʼ a ulal a tejwamedhál abal a kʼanidhál a Jehová? (Salmo 17:6.) ․․․․․

¿Jantʼoj a kulbetnál ka alwaʼmedhaʼ ta olábil? ․․․․․

¿A exobnál an Biblia chudhél chudhél? (Josué 1:8.) ․․․․․

Tam it kwétem exóbal, ¿jantʼoj a exobnál? ․․․․․

¿Jantʼoj a leʼ ka bajuw kʼal a kwétem exobintal? ․․․․․

¿A éjtowal ka uluw abal tʼajál lej alwaʼ an olnomtaláb? (Ejtíl: ¿A éjtowal ka wilkʼaʼ an exobintaláb axi yab lej tʼojláb axi tal ban Biblia? ¿It wichél ka tsaʼbiy jitaʼ ti otsʼówiyal ban olnomtaláb? ¿Kʼwajat a tsápnanchal abal ka koʼoy jun i exóbal?)

□ Aníts □ Imbáj

¿It kalel jayej tit ólnom tam yab u kalel a tátajchik? (Hechos 5:42.)

□ Aníts □ Imbáj

¿Jantʼoj a leʼ ka bajuw ka tʼajaʼ tam it kalel ti olnomtaláb? (2 Timoteo 2:15.) ․․․․․

It kʼalel al patal an tamkuntaláb o talchik a jekʼchal? (Hebreos 10:25.) ․․․․․

¿It alwaʼ tʼojojnal abal an tamkuntaláb? ․․․․․

Max a tatáʼchik ti jilál, ¿it kʼalel ti tamkuntaláb tam jajáʼchik yab in éjtowal?

□ Aníts □ Imbáj

¿A éjtowal ka uluw abal a kulbetnál ka tʼajchij in kulbétal a Dios? (Salmo 40:8.)

□ Aníts □ Imbáj

¿A tʼilál tam ti mudhnaʼ a at juntal ani a kúxuy? (Romanos 12:2.) ․․․․․

¿Jantʼoj a tsálpayal ka tʼajaʼ abal yab ka taley a kʼanidhomtal kʼal a Jehová? (Judas 20, 21.) ․․․․․

Max a tatáʼ ani a jaʼúbchik ka jilaʼ an chubaxtaláb, ¿neʼetsej ka tʼojonchij a Jehová? (Mateo 10:​36, 37.)

□ Aníts □ Imbáj

[An foto]

An takuxtaláb abal kit pujan pél etíl tam jun neʼets ka tómkin: yab in tomnál ka tʼajaʼ nixéʼ xi takuxtaláb dhubatkʼij