CAPÍTULO 35

¿Jant’ini’ u éjtowal ku ja’úbna’ a Dios?

A Gabriel in wat’a’ jant’oj axi lej yajchik ani k’al nixé’ tólmiyat kin t’aja’ ti kwéntaj abal lej exbadh ki ko’oy  ti ja’úb a Dios. In ulal: «Tam ti naná’ ­u kwa’alak 12 i támub, u papá tu jila’. U t’ilál abal jun i akal in k’wajiy u lej konchal a Jeho­vá abal kin t’aja’ ka wichiy u papá.»

A Gabriel in ats’álak lej t’e’pidh, ani tam k’wajiy in ajiyal an Biblia. Tam, in ela’ jun i pejach axi in ulal antsaná’: «Axi yajlidh in ichích u utel k’al Tatá’. Tatá’ a tólmiyal axi odh inik» (Salmo 10:14). A Gabriel in ulal abal nixé’ xi kaw ulits ma tin ichích: «Tam tu ajiy axé’ xi kaw, u ats’a’ ejtíl max a Jeho­vá k’wajatak tin uchál abal in lé’ ti kin tólmiy ani abal pel u papá. Jajá’ játs an tataláb axi más alwa’ i éjtowal ki ko’oy».

¿K’WAJAT a wat’ál jant’oj ejtíl a Gabriel? Walám imbáj, pero bélits antsaná’ a Jeho­vá in lé’ ti ja’úbna’. Ka tsu’uw jawa’ in ulal an Biblia: «Kit uteychik k’al a Dios ani Jajá’ ne’ets ka utey k’al tatá’chik» (Santiago 4:8). Ka tsalpay k’al axé’: Bélits abal pel u waláblom ani yab i éjtowal ki tsu’uw a Jeho­vá, Jajá’ in lé’ ki ja’úbna’.

Pero abal ki t’aja’ ti ja’úb a Dios, i yéjenchal ki tsápnanchij. Pel ejtíl jun i wíts axi kwa’al ki béletna’. ¿A ko’yamal tatá’ jun i wíts? Max a lé’ abal ka yejey ani ka k’wajiy alabél, ¿jant’oj kwa’al ka t’aja’? Kwa’al ka t’aya’ ju’táj ti alwa’ an tsabál ani ka wák’iyal. Yab  kwa’al ka jílkakay. Jayetsej kwa’al ka t’aja’ abal kit utey k’al a Dios. ¿Jant’ini’ a éjtowal ka béletna’ an ja’ubtaláb axi a kwa’al k’al a Dios?

Lej exbadh kit exobláts

Max a kwa’al jun a ja’úb, tatá’ a exlál abal kwa’al ka t’ilmay ani kwa’al ka ots’owiy. Jayetsej kwa’al ka t’aja’ ­k’al a Dios. Pero, ¿jant’ini’ i éjtowal ki ots’owiy a Jeho­vá? Max ki ajiy ani ki exóbna’ an Biblia (Salmo 1:2, 3).

Pero walám tatá’ yab a lej ­kulbetnál tit ajum ani tit exóbal. Walám más a kulbetnál ka met’a’ an televisión, tit ubat’ k’al a videojuegos o kit k’alej tit belelél k’al a ja’úbchik. Pero max a lé’ ka ja’úbna’ a Dios, kwa’al ka ats’a’ jawa’ ti ólchal ban Biblia.

Yab ka tsalpay abal max ka ajiy an Biblia, ne’ets kit it’ixbéj. A éjtowal ka k’ijídhna’, bélits max yab a lej kulbetnál tit ajum. Jawa’ k’a’ál kwa’al ka t’aja’ pel ka jólk’a’ i k’ij. A éjtowal ka t’aja’ ejtíl jun i ts’ik’ách axi in bij Lais, jajá’ in ulal: «Tam kin ts’akiy, u ajiyal jun i capítulo in k’ál an Biblia». A María in kwa’al 15 i támub ani pil jant’ini’ tin t’ajál, in ulal: «Chudhél u ajiyal an Biblia ok’xidh kin k’alej tin wáyal».

¿Jawa’ tam programa ne’ets ka eyendha’ tatá’? Abal ka exla’, ok’ox ka tsu’uw  an recuadro axi k’wajat ban página 292. Talbél, ka dhucha’ tejé’ jawa’ tam hora a éjtowal ka jólk’a’ abal ka exóbna’ ts’ejel hora an Biblia.

․․․․․

Lej alwa’ ka ko’oy jun i horario, pero tam junchikíl ne’ets ka ats’a’ k’ibat ka ajiy an Biblia. Walám ka wat’a’ ejtíl a Jezreel, jajá’ pel jun i kwitól axi in kwa’al 11 i támub, in ulal: «Wa’ats talchik i pejach axi u wé’ it’ixnál ku ajiy». Pero yab ka jila’ ka ajiy. Ka t’ila’ abal k’wajat a ots’owiyal a ja’úb, a Jeho­vá. K’ayúm k’ayúm, ne’ets ka lej k’ijídhna’. Max ka tsápnanchij, ne’ets ka lej kulbétna’ ani ne’ets ka kanchij in alwá’.

Ets’ey ka ólonchal a Dios

An oláb pel abal ku t’ilmáts k’al a Jehová. Pel jun i ts’ejwalixtaláb lej alabél. Ka tsalpay: a éjtowal ka t’ilmay a Jehová al jawakits tam hora, Jajá’ in lé’ ti ots’owiy. Jaxtám an Biblia in ulal abal ets’ey «ka konchij jawats ka yéjenchij ani ets’ey ka bína’ i k’ak’namal yan k’al a Dios» (Filipenses 4:6).

Axé’ in lé’ kin uluw abal a éjtowal ka ólchij a Dios jawakits tam k’ibataláb o t’e’pintaláb axi a kwa’al. Pero jayej lej alwa’ ka k’ak’nanchij patal jawa’ ti pidhámal. A Jeho­vá pel ­jun i ja’úb axi ti ­pidhámal yan jant’oj lej alwa’ (Salmo 106:1).

Ka dhucha’ jant’oj axi a lej k’ak’nanchal a Jehová.

․․․․․

Max jun a k’icháj a ats’ál abal ti lej atálits an t’e’pintaláb o jun i k’ibataláb, ¿jant’oj a éjtowal ka t’aja’? «Ka ólchij a Jeho­vá jawa’ a ats’ál ani Jajá’ ne’ets ti tsap­liy. Jajá’ yab jayk’i’ ne’ets ti wálba’.» (Salmo 55:​22.)

Ka dhucha’ jun i t’e’pintaláb axi a lé’ ka ólchij a Jehová.

․․․․․

Ka exóbna’ k’al jawa’ a wat’amal

Wa’ats k’e’at jant’oj axi lej exbadh ka t’aja’ abal ka t’aja’ ta ja’úb a Dios. Al jun i ajatláb, a David in uluw axé’: «Ka t’aja’chik ti kwéntaj abal a Jeho­vá lej alwa’ inik» (Salmo 34:8). Tam tin dhucha’ axé’, ítejk’ij tin wat’amal jant’oj lej k’ak’adh. Wé’ ka tsemdháj k’al an rey Saúl. Ko’oy ka k’alej ti tsinél k’al an filisteos, pero taná’ dhúbatk’ij exláj jita’ játs jajá’. Jajá’ in tsálpay abal ne’ets ka tsemdháj, pero ¿a exlál jant’ini’ tin jek’a’? Jajá’ in t’aja’ ejtíl max u ólmanal (1 Samuel 21:​10-15).

Pero a David yab in tsalpay abal in jek’a’ kom lej tsálpadhak. Tin tujtal an ajatláb, in dhucha’ abal pel kom tólmiyat k’al a Dios, in uluw: «In utey k’al a Jeho­vá ani Jajá’ tin tók’tsiy. Tin tólmiy abal yab kin jik’ey» (Salmo 34:4). Kom jajá’ antsaná’ tin wat’a’, jaxtám tu uchál axé’: «Ka t’aja’chik ti kwéntaj abal a Jeho­vá lej alwa’ inik». *

Ka tsalpay jayk’i’ ta ats’a’ abal a Jeho­vá k’wajatak ti tólmiyal ani ka dhucha’ jant’oj a wat’a’. Yab in yéjenchal ka dhucha’ max a wat’a’ jun i k’ibataláb axi lej púlik. A éjtowal ka dhucha’ jant’ojakits, walám jant’oj axi junchikíl yab i lej t’ajál ti kwéntaj.

․․․․․

Ti kwetémtal kwa’al ki tsápnanchij ki t’aja’ ti ja’úb a Dios, bélits max i tátajchik tu exóbchij tin kwéntaj an Biblia ma ti tsákamtal. Ani tatá’, ¿it k’wajat a tsápnanchal kit utey k’al a Dios, o yabayej? Tam, axé’ xi capítulo ne’ets ti tólmiy abal ka tujchiy. A Jeho­vá ne’ets kin lej labliy an tsapláb axi ka t’aja’, kom an Biblia in ulal: «Max jant’oj ka konchij k’al a Dios, Jajá’ ne’ets ti pidha’. Ani jant’ots a aliyal, Jaja’ ne’ets ti tólminchij ka ela’. Max ka tawna’, Jajá’ ne’ets ti tók’tsiy.» (Mateo 7:7).

NE’ETS KA ELA’ MÁS I OLCHIXTALÁB BAN K’A’ÁL VOLUMEN, BAN CAPÍTULOS 38 ANI 39

TIN AYTAL AN CAPÍTULO NE’ETS KA EXÓBNA’

¿A ats’ál k’ibat ka ólchij an atiklábchik tin kwéntaj a Dios? ¿Jant’ini’ a ejtowal ka ólna’ jawa’ a belál ani yab kit jik’ey?

[Nota tin taltal an página]

JUN I TEXTO AXI LEJ EXBADH

«K’ijidh jita’chik in tsálpayal abal in yéjenchal a Dios.» Mateo 5:3.

JAWA’ A ÉJTOWAL KA T’AJA’

Max chudhél ka ajiy tsé’ i páginas in k’ál an Biblia, ne’ets ka talabédha’ ka ajiy al jun i támub.

¿A EXLALAK AXÉ’?

Tatá’ k’wajat a ajiyal axé’ an libro ani a tsápnanchal ka belka’ jawa’ a Jehová ti konchal, kom Jajá’ játs axi ti kaniyal ka t’aja’ ta ja’úb (Juan 6:44).

¡KA T’AJA’ AXÉ’!

Ne’ets ku t’aja’ axé’ abal ku exbay más alwa’ an Biblia: ․․․․․

Ne’ets ku t’aja’ axé’ abal ku ólonchij a Jehová más aykidh: ․․․․․

¿Jant’oj u lé’ ku konowiy u papá o u mamá tin kwéntaj axé’? ․․․․․

TATÁ’, ¿JANT’OJ A TSÁLPAYAL?

● ¿Jant’oj a éjtowal ka t’aja’ abal ka k’ijidhna’ ka exóbna’ más an Biblia?

● ¿Jale’ ti a Jeho­vá in lé’ tu ku ats’anchij i olábil, bélits abal u wálbidh?

● ¿Jant’oj a éjtowal ka t’aja’ abal a olábil ti tólmiy kit utey más k’al a Jehová?

[Comentario]

«Ban oláb axi u t’ajchalak a Jehová tam tin tsipílejak, júnini’ jawa’ u ólchal. Xowé’ u ólchal jawa’ u wat’amal ban k’icháj ani jawa’ tin t’e’pindhál. Chudhél u wat’ál yan jant’oj, jaxtám yab júnini’ jawa’ u ólchal.» (Eva)

[Recuadro/​Ani foto]

 ka exla’ más an Biblia

1. Ka takuy jun i t’ilab axi ti Biblia axi más a kulbetnál.

Abal ka exbay más alwa’, ka konchij a Jehová abal ti tólmiy.

2. Ka t’aja’ ti kwéntaj jawa’ a ajiyal. Yab ka ajchikiy. Ka eyendha’ a tsalápil. Ka tsalpay abal tatá’ i k’wajatak taná’. Ka ats’a’ jant’oj k’wajat ti uluwáb, ka tsu’uw jant’oj k’wajat ti wat’el. Ka tsalpay k’al an k’apnél axi wa’atsak taná’ ani k’al in biját an wítslom. Antsaná’ ne’ets ka ejtow ka exbay alwa’ jawa’ k’wajatak ti wat’el.

3. Ka t’aja’ i konowixtaláb. Tam ki talíts ta ajum, ka tsalpay k’al axé’:

● ¿Jale’ tin t’aja’ a Jeho­vá abal ka jílk’on dhuchadh?

● ¿Jita’chik in tomnál ku nits’biy ani jita’chik imbáj?

● ¿Jant’oj k’al axi u exobnámal u éjtowal ku eyendha’ chudhél chudhél?

● ¿Jant’oj tin exobchámal tin kwéntaj a Jeho­vá?

4. Ka t’aja’ jun i oláb. Ka ólchij a Jeho­vá jant’oj a exobnámal ani jant’ini’ a tsálpayal ka eyendha’ ta ejatal. Ani yab ka uk’chiy ka k’ak’nanchij kom tu pidhámal an ­Biblia.

[An foto]

«A káwintal pel ejtíl jun i lámpara axi tin tájbanchal u akan ani u bélil.» (Salmo 119:105)

[Recuadro/​Ani foto]

ki t’aja’ ok’ox jawa’ más exbadh

¿A ats’ál abal yabáts it jólk’anal abal ka ólonchij a Jehová ani ka exóbna’ an Biblia? Jawa’ kwa’al ki t’aja’ yaníl játs ki exla’ jawa’ játs axi más exbadh.

Ka t’aja’ axé’: Ka aliy jun i bote ani ka ­balchij i t’ujub. Talbél ka t’uchiy k’al u kidhib.

Xowé’ ka jolk’ow ani ka t’aja’ junílejk’ij, pero xowé’ ka baliy ok’ox an kidhib ani talbél an t’ujub. ¿Yab aníts abal yab exey? Játs kom a baliy ok’ox an kidhib.

¿Jant’oj játs axi i lé’ ki exóbna’? Max ka t’aja’ ok’ox jawa’ yab lej exbadh, ejtíl ki k’ijidhbéj, yab ­ne’ets kit jólk’an abal ka t’aja’ jawa’ más exbadh, kit utey k’al a Jehová. Jaxtám an Biblia tu ólchal abal «ki t’aja’ ti kwéntaj jawa’ játs axi más exbadh» (Filipenses 1:10). Max ka t’aja’ ti kwéntaj jawa’ in ulal axé’ xi pejach, ne’ets kit jólk’an abal kit utey más k’al a Jehová ani jayej abal kit k’ijidhbéj tam junchikíl. Ka t’ila’, kwa’al ka t’aja’ ok’ox jawa’ más exbadh.

[An foto]

An ja’ubtaláb k’al a Dios pel jant’ini’ jun i wíts: in yéjenchal béletnadh abal ka puwey