Carta in kʼál an Kwenél i Ókʼnom
«In tomnál ka bajuwitschik tit exóbchix» (Heb 5:12). ¡Ka tsalpay! A Jehová, an Exóbchix axi más witʼadh tin puwel an tsabál, tu tʼajchal an kanixtaláb abal ki exóbchij kʼeʼat i atikláb tin kwéntaj jajáʼ. I kwaʼal i uchbíl tu exóbchix tin kwéntaj a Jehová —al i yanél ani ti olnomtaláb—, axéʼ pél jún i tʼojláb lej kʼijidh. Walám jayej i kwaʼal i uchbíl tu exóbchix ti tamkuntaláb. Pero ¿jantʼiniʼ i ejtowal ku bajudhméj jantʼiniʼ u exóbchix?
An tokʼtsixtaláb i elál ban káw axi an abatwále Pablo in dhuchanchij a Timoteo: «Ka lej tʼajaʼ ti kwéntaj jantʼiniʼ it ajum ti tamkuntaláb, jantʼiniʼ it exóbchix ani jantʼiniʼ a kanatbedhál an epchalchik». Ani talbél in uluw: «Max ka tʼajaʼ axéʼ, neʼets kit kʼaniyat ani jayej jitaʼchik ti atsʼál» (1 Tim. 4:13, 16). An olnomtaláb axi i tʼajál in kʼáninchal in ejatal an atikláb. Jaxtám ti lej exbadh ku ajumáts tekedh ani ku alwaʼ exóbchixin. Axéʼ xi folleto tsʼejkadh abal ti tólmiy ka bajuw. Ki tsuʼuw jantʼoj in chiʼdhál.
I textos axi ti Biblia axi in olnál i tsalpadh káw o i tʼiplab axi kwaʼal kin tsuʼuw kʼal an exobintaláb.
A Jehová játs an «Púlik Exóbchix» (Is. 30:20). Kʼal axéʼ xi folleto, tatáʼ neʼets ka exóbnaʼ ti ajum tekedh ani ti exóbchix, pero yab ka ukʼchiy abal an olchixtaláb axi i binál pél in kʼál a Jehová ani jajáʼ játs axi in tʼajál abal ka utey an atiklábchik (Juan 6:44). Jaxtám etsʼey ka konchij in tʼokat tsaplábil. Etsʼey ka eyendhaʼ an Biblia. Etsʼey ka puwénchij a Jehová, ani yab ta kwetémtal. Ka tólmiy kin kʼanidhaʼchik a Jehová patal jitaʼ ti atsʼál.
A Jehová ti kaniyámal ka bínaʼ jún i exbadh olchixtaláb axi kʼwajat ti olnáb tin puwel an Tsabál. I exlál abal max tatáʼ «ka lej belaʼ kʼal in tsap a Dios», neʼets ka ejtow ka tʼajaʼ axéʼ xi tʼojláb (1 Ped. 4:11).
A juntal tʼojnal al axéʼ xi tʼojláb,
Kwenél i Ókʼnom in kʼál an Ólchixchik kʼal a Jehová
