¿Jant’oj in ulal talchik i científicos? Wa’ats tsab i púlik muke’ i células: jun játs axi in kwa’al i núcleo ani k’e’at játs axi imbáj. An células axi i kwa’al ti iniktal, axi wa’ats ban ko’nél ani axi in kwa’al an t’ayabláb, in kwa’al i núcleo ani an células bacterianas yab in kwa’al. An células axi i kwa’al ti iniktal, axi in kwa’al an ko’nél ani an t’ayabláb u bijiyáb eucariotas, ani axi wa’ats ban células bacterianas u bijiyáb procariotas. Wa’ats jita’chik in tsálpayal abal an células bacterianas yab lej k’ibat jant’ini’ ti ts’ejkadh ani in ulalchik abal taná’ ti kalej an células axi wa’ats ban ko’nél ani ban t’ayabláb.

Jayej, in ulalchik abal al millones i támub, an células procariotas in k’ut’uw k’e’at i células. In tsálpayalchik abal patal jawa’ wa’ats, in t’aja’ abal nixé’ xi ­células ka k’ayum jalk’un, ani ma ka yaney. *⁹

¿Jant’oj in ulal an Biblia? An Biblia tu ólchal abal patal an ejataláb axi wa’ats ban Tsabál k’alej ts’ejkadh k’al jita’ axi lej tsalpadh. Ka tsu’uw abal an Biblia tu ólchal lej tajax jawa’ wat’ey: «Patal an atájchik pel in ts’ejkábil i inik ani patal jawa’ wa’ats ti éb ani ti tsabál pel in ts’ejkábil a Dios» (Hebreos 3:4). K’e’at i pejach ban Biblia in ulal: «¡Lej yan jawa’ a ts’ejkamal Jehová! K’al yan i tsalpadhtaláb a ts’ejka’ patal. An tsabál k’wajat t’uchat k’al yan jant’oj axi a ts’ejkamal. Wa’ats yan i ejataláb, i ko’nélchik axi t’ijax ani axi pakdha’» (Salmo 104:24, 25).

¿Jant’oj tu tejwamédhanchal jawa’ exlamej? Yan i atikláb axi exoblámadh, in ejtowámal kin exla’ jant’ini’ ti k’wajat ts’ejkadh tin ál jun i célula procariota. An científicos axi in belál k’al an evolución in tsálpayal abal an células axi ejat walám pelak ejtíl axé’.¹⁰

Max chubax abal an ejataláb antsanák’ij ti tujey, in tomnálak kin éjtowchik kin wilk’a’ jant’ini’ ti wa’tsin an k’a’ál célula. Pero max wa’ats jita’ axi in ts’ejka’ an ejataláb, kwa’al ka tejwamedháj abal patal, ma an ko’nél axi más tsípkats, k’wajat alwa’ ts’ejkadh. ¿Jant’ini’ ta tsu’tal max ki exla’ jant’ini’ ti ts’ejkadh tin ál, jun i célula procariota? Biyat i tsu’tal, ki tsalpay max walám in ejtow ka wa’tsin kwetém.

Max i lé’ak ku otsits tin ál jun i célula procariota kwa’alak ku lej tsipilméj, ejtílits jun i punto. K’wajat alwa’ tonidh k’al jun i membrana axi u chu’el ani lej tsapik. Pel ejtíl jun i ba’te’ axi in beletnál jun i fábrica. Axé’ xi membrana lej wat’adh dhadhat. Kwa’alak ki tamkuy 10.000 abal ka k’wajiy tolow antsaná’ jant’ini’ jun i uw. Pero nibal jun i ba’te’ ne’ets kin bájuwchij jant’ini’ ti ts’ejkadh axé’ xi membrana, ¿jale’?

Antsaná’ jant’ini’ jun i ba’te’ in beletnál an fábrica, an membrana in beletnál patal jawa’ wa’ats tin ál an célula. Bélits abal lej wits’iy, in jilál ka otsits i ik’ abal ka ixk’aláts an célula. Pero an membrana yab in jilál abal ka otsits patal an moléculas, expidh in jilál ka otsits axi ne’ets kin tólmiy an célula. ¿Jant’ini’ tin t’ajál axé’?

Ki t’ila’ junílejk’ij tin kwéntaj an fábrica. Ban wí’leb ets’ey wa’ats i béletnom. Jajá’chik in t’ajál ti kwéntaj jant’oj ne’ets ka odháj ani jant’oj ne’ets ka kaldháj. Antsaná’ ­jayej, ban membrana celular wa’ats i moléculas de proteína axi in jápiyal an wí’leb ani axi in mápuyal.

Talchik k’al axé’ xi proteínas (1) in kwa’al jun i jol ts’ejel. Taná’ in jilál abal ka wat’ey an moléculas. K’e’atchik k’wajat japidh tin chum ani mapudh jun puk’e’ (2), expidh u japnal (3) abal kin ejtow ka wat’ey jawa’ kwa’al ka otsits. Tam an proteína kin yek’wa’its jawa’ kwa’al ka otsits, u japnal axi jun in chum abal kin ejtow ka wat’ey (4). Axé’ játs jawa’ in t’ajál patal an células.

Ki tsalpay abal u jílanits ku otsits altáj ban célula. Tin ál an célula procariota wa’ats jant’oj ejtíl i já’ axi in kwa’al yan i nutrientes ani yan jant’oj axi lej alwa’. Patal axé’ in eyendhál an célula abal kin ts’ejka’ jawa’ ne’ets kin yéjenchij. Pero patal axé’ xi t’ojláb ne’ets ti t’ajnal tin ay. Antsaná’ jant’ini’ jun i fábrica axi u t’ojnal lej alwa’, an célula in t’ajál abal patal ka ts’ejkáj tin ay ani ka kaldháj tam in tomnál.

An célula u lej t’ojnal abal ka ts’ejkáj i proteínas. ¿Jant’ini’ tin t’ajál? Ok’ox in ts’ejkál veinte i aminoácidos kom játs k’al axi ti ts’ejkadh an proteínas. Tam kin ts’ejka’its, in abál k’al an ribosomas (5). An ribosomas pel ejtíl i máquinas axi ne’ets in támkuyal an aminoácidos abal kin ts’ejka’ an proteína axi u yejencháb. Antsaná’ jant’ini’ jun i fábrica in éjtowal kin ko’oy dhúchadhits al jun i computadora patal an t’ojláb axi kwa’al ka t’ajan, an ADN jayej in kwa’al dhuchadh an t’ojláb axi kwa’al kin t’aja’ an célula (6). An ribosomas u uchnal k’al an ADN jawa’ tam proteína kwa’al kin ts’ejka’ ani jant’ini’ ti kwa’al kin ts’ejka’ (7).

I lej jik’pál jant’ini’ tu t’ojnalchik. Tam an proteína k’wajatits alwa’ ts’ejkadh (8), u bíjcháb ju’táj ti ne’ets ka eyan. * Ki tsalpay k’al jun i fábrica ju’táj tu ts’ejkáb i motores. Patal an piezas kwa’al ka ts’ejkáj lej alwa’ abal an motor ka t’ojon alwa’. Jayej, an proteínas kwa’al ka ts’ejkáj lej alwa’ abal kin ejtow kin t’aja’ alwa’ in t’ojlábil. Max yab ka ts’ejkan alwa’, ma in éjtowal kin ódhna’ an célula.

Tam an proteínas u ts’ejkáb, ¿jant’ini’ in bájuwal ka ulits ma ju’táj tu yejencháb? Patal in kwa’alits bijchidh ju’táj tu yejencháb. Jaxtám, bélits abal u abnal lej yan al jun i minuto yab u k’ibel nibal jun, patal in bájuwal ka ulits ju’táj tu yejencháb.

¿Jale’ ti exbadh ki t’aja’ ti kwéntaj axé’? Patal jawa’ u yejencháb abal ka ts’ejkan jant’oj, bélits max lej tsipkats, yab in éjtowal ka yaney tin kwetémtal. Max jun i molécula ka kaldha’ ban célula yab in éjtowal ka k’wajiy ejat, ani altáj ban célula yab in éjtowal ka yaney tin kwetémtal. In yéjenchal tolmidh k’al k’e’at i moléculas. Abal ki exbay, ki tsalpay k’al axé’ xi t’iplab: abal ka yaney jun i molécula axi in bij trifosfato de adenosina (ATP) u yejencháb i enzimas. Pero jayej, abal ka yaney an enzimas in yejenchal tolmidh k’al in tsap an ATP. Jayej, an ADN u tólmix abal ka ts’ejkan an enzimas, pero an enzimas jayej u tólmix abal ka ts’ejkan an ADN (ban konowixtaláb 3 ne’ets ku kawin tin kwéntaj an ADN). Jayej, k’e’atchik i proteínas expidh awits ka ts’ejkáj k’al an célula, pero an células expidh awits ka ts’ejkan k’al i proteínas. *

An microbiólogo Radu Popa, yab in belál abal wa’tsin jita’ axi in ts’ejka’ an ejataláb, pero ti 2004 in uluw axé’: «¿Jant’ini’ in ejtow ka wa’tsin an ejataláb tin kwetémtal max wawá’, bélits abal i kwa’al patal, yab i ejtowámal ki ts’ejka’?».¹³ Jayej in uluw: «Patal jawa’ in yéjenchal jun i célula abal ka k’wajiy ejat, lej k’ibat jant’ini’ ti ts’ejkadh, jaxtám yab i éjtowal ki lej bela’ max kwetém ti ts’ejkan».¹⁴

¿Jant’oj a tsálpayal? Axi in belálchik k’al an evolución in lé’ kin tejwamédha’ abal yab jita’ in ts’ejka’ an ejataláb. Pero biyat más in exobnálchik tin kwéntaj an ejataláb, más u tejwamél abal an ejataláb yab in ejtow ka ts’ejkan kwetém. Abal yabchik ka atáj, talchik i científicos in lé’ kin tejwamédha’ abal an evolución lej pilits k’al jant’ini’ ti tujey an ejataláb, pero, ¿walám tekedh nixé’ xi tsalap?

Axi in belálchik k’al an evolución in tsálpayal abal wa’tsin yan jant’oj axi tamkun, ani antsaná’ ti wa’tsin an ejataláb. Jayej, in ulalchik abal wat’ey yan jant’oj axi in t’aja’ abal k’ayum k’ayum ka kalej pilchik i ejataláb, pero yab in ejtowámal kin tejwamédha’ jant’ini’ ti wat’ey patal axé’. Jun i atáj axi yab in kwa’al alwa’ kubat in akan, ne’ets ka íjkan. Jayej, an exobchixtaláb tin kwéntaj an evolución yab in éjtowal ka k’wajiy kubat max yab kin tejwamédhaʼchik jant’ini’ ti tujey an ejataláb.

Ma tejé’ i exóbna’its jant’ini’ tu ts’ejkanal jun i «tsakam» célula ani jant’ini’ u t’ojnal. Xowé’, ¿jant’oj a tsálpayal: in ts’ejka’ jita’ an ejataláb, o ­wa’tsin kwetém? Max yabayej a lej exlál jant’oj ka bela’, ki exóbna’ k’al jita’ tu abatnáb an células.