KA TUJCHIJ TIT TʼILOM
AJUMTALÁB 2
Kit kawin jantʼiniʼ tam it tʼilom
An texto juʼtáj ti kaldhámej: «U lej tólmix an kaw axi i ulal al an kʼij axi in tomnál» (Prov. 15:23).
Jawaʼ in tʼajaʼ a Felipe
1. Ka tsuʼuw an VIDEO o ka ajiy Hechos 8:30, 31. Ani talbél ka tʼajaʼ ti kwéntaj axéʼ xi konowixtalábchik:
¿Jantʼoj tu exóbchal in tʼiplabil a Felipe?
2. Max ki elkanchij jantʼiniʼ ki tujchij tu tʼilom, an atikláb neʼets kin kulbetnaʼ ani neʼets kin leʼnaʼ kin aynanchij tu ku otsʼowiy.
Ka nitsʼbiy a Felipe
3. Ka metʼaʼ jawaʼ waʼats ta tonídh. ¿Jantʼoj in tejwamedhál an atikláb kʼal jawaʼ in tʼajál kʼal in wal ani jantʼiniʼ u kaw? ¿Tejwaʼ abal in leʼ ti tʼilom? Abal ka ejtow ka ólchij jun i tsalap axi ti Biblia, a éjtowal ka konowiy: «¿Tatáʼ a exlálak…?». Max jun i atikláb in tejwamedhál abal yab in leʼ ti tʼilom, yab ka aynanchij ka tʼilmay.
4. Ka tejwamédhaʼ i kʼayaʼtaláb. Yab ka tsalpay abal dhubatkʼej kwaʼal ka ólchij jun i atikláb jawaʼ in ulal an Biblia. Ka tʼilmay kʼal kʼeʼat jantʼoj ani talbél ka ólchij tin kwéntaj an Biblia. Ani junchikíl walám kwaʼal ka aychij kʼeʼat a kʼicháj abal ka ejtow ka ólchij.
5. Ka tʼilmay an atikláb kʼal jawaʼ in yejenchal kin atsʼaʼ. Walám an atikláb ti uchaʼ jantʼoj axi yabak a aychal. Pero ka tʼilaʼ: kwaʼal ki ólchij jawaʼ in yejenchal kin otsʼowiy an atikláb ani yab jawaʼ i neʼdhálits tsalpadh ki ólchij.
