APÉNDICE C
Jawaʼ a éjtowal ka tʼajaʼ abal ka bínaʼ i exobintaláb kʼal an libro Kit kʼwajiy kulbél abal etsʼey
An epchalchik in lej tʼajaʼ i oláb ani in tsalpaychik lej alwaʼ jantʼoj tam olchixtaláb kin jilaʼ ban libro Kit kʼwajiy kulbél abal etsʼey. Jaxtám, abal ka kanchij in alwáʼ axéʼ xi publicación tam a binál i exobintaláb kʼal an Biblia, ka tʼajaʼ axéʼ:
Jawaʼ a éjtowal ka tʼajaʼ okʼxidh ka bínaʼ an exobintaláb
-
1. Kit tʼojojon alwaʼ. Ka tsalpay kʼal jawaʼ in yejenchal, kʼal jawaʼ kʼwajat in watʼál ani kʼal jawaʼ in belál an atikláb. ¿Walám waʼats jantʼoj axi an exóbal kʼibat kin exbay o kʼibat neʼets kin atsʼaʼ kin eyendhaʼ tin ejatal? Ka exóbnaʼ ani ka tsuʼuw an video axi kʼwajat ban pejach «Ka exóbnaʼ jantʼoj ít» ani ka tsalpay jantʼiniʼ neʼets ka tólmiyat an exóbal. Max antsanáʼ ka tʼajaʼ, neʼets kit kʼwajiy tʼojojodh max ka yejenchij ka eyendhaʼ tam kit exobláts kʼal an atikláb.
Tam it kʼwajat tit exóbal kʼal an atikláb
-
2. Max an atikláb in leʼ, ka tʼajaʼ jun i oláb tam kit tujey ti exóbal ani tam ka taʼpaʼ an exobintaláb.
-
3. Ka tʼajaʼ ti kwéntaj abal yab kit lej kawin. Ka eyendhaʼ jawaʼ tal ban ajumtaláb ani ka jilaʼ abal an atikláb kin olnaʼ jawaʼ in tsalpayal.
-
4. Tam ka tujchij jun i ít pejach, ka ajiy an tsalap axi más exbadh, jayej ka olnaʼ in bij an ajumtaláb.
-
5. Tam ka talabedhaʼ jun i pejach, ka eyendhaʼ an pejach «Jawaʼ i exóbnaʼ» abal an atikláb kin tʼilaʼ jawaʼ in exóbnaʼ.
-
6. Tam ka exóbnaʼ jun i ajumtaláb kʼal an exóbal ka tʼajaʼ axéʼ:
-
Ka ajiychik an párrafos axi kʼwajat tin tujtal an ajuntaláb.
-
Ka ajiychik patal an textos axi in ulal «Ka ajiychik».
-
Max yejentál, ka ajiy kʼeʼat i textos axi tal ban ajumtaláb.
-
Ka eyendhaʼ patal an videos axi in ulal «Ka tsuʼuwchik», játs max a éjtowal.
-
Ka eyendhaʼ patal an konowixtaláb.
-
Ka tsuʼuwchik an walekláb axi tal ban pejach «Abal ka exóbnaʼ más».
-
Ka eyendhaʼ an pejach «Jawaʼ a éjtowalej ka tʼajaʼ» abal an atikláb kin exlaʼ jantʼoj in kʼibchalej kin tʼajaʼ. Ka tólmiy abal kin tsalpay kʼal i ayláb axi in éjtowal kin tʼajayej. In éjtowal kin tʼajaʼ jawaʼ tal al axéʼ xi pejach o kʼeʼat jantʼoj.
-
Ka konowiy abal max tam ti tʼojojon in kulbetnaʼ jun i artículo o jun i video axi kʼwajat ban pejach «Ka exóbnaʼ jantʼoj ít».
-
Ka tsapnanchij ka exóbnaʼ jun i ajumtaláb kʼal an exóbal.
-
Talbél ta binámal an exobintaláb
-
7. Ka aynanchij ka tsalpay kʼal an exóbal. Ka konchij a Jehová abal kin labliy an tsapláb axi in tʼajál ani jayej ti tólmiy tatáʼ abal ka éjtow ka tólmiy an exóbal.
