KA EXÓBCHIJ AN ATIKLÁB
AJUMTALÁB 10
Ka pidhaʼ in exbádh tam a exóbchal an atikláb
An texto jutʼáj ti kaldhámej: «Wawáʼ kʼal i lej kʼanidhomtaláb ti ichích tu ólchijchik an alwaʼ kaw, ma tu pidhámalak i ejatal» (1 Tes. 2:8).
Jawaʼ in tʼajaʼ a Jesús
1. Ka tsuʼuw an VIDEO o ka ajiy Juan 3:1, 2. Ani talbél ka tʼajaʼ ti kwentaj axéʼ xi konowixtalábchik:
-
¿Jaleʼ walám ti a Nicodemo in aliy a Jesús tam akal? (Ka tsuʼuw Juan 12:42, 43).
-
¿Jaleʼ ti a Jesús in tejwamédhaʼ abal in pidhalak in exbádh axéʼ xi tʼojláb?
¿Jantʼoj tu exóbchal in tʼiplabil a Jesús?
2. Kom i kʼanidhál an atiklábchik, jaxtám i pidhál in exbádh ki tólmiy an atiklábchik abal ka utey kʼal a Jehová.
Ka nitsʼbiy a Jesús
3. Ka pidhaʼ an exobintaláb an atikláb al an hora ani juʼtáj jajáʼ kin éjtow. ¿Waʼats jun a kʼicháj o jun i hora axi jajáʼ in kulbetnál abal ka exobláts? ¿Juʼtáj walám neʼets kin kulbetnaʼ más ti exóbal: tin tʼojlábil, tin kʼimáʼ o juʼtáj ti waʼats más i atikláb? Etsʼey ka tsapnanchij kit exoblátschik al an hora axi an atikláb in éjtowal.
4. Ka tsapnanchij abal jitaʼ a tsaʼbiyal etsʼey ka exobláts. Max tatáʼ yab neʼets kit kʼwajiy, yab ka uchaʼ an atikláb abal yab neʼets ti exóbal. Jawaʼ a éjtowal ka tʼajaʼ:
-
Ka tawnaʼ por teléfono o ka tʼajchij i videoconferencia abal kit exoblátschik.
-
Ka uchaʼ kʼeʼat i epchal ka kʼalej kin pidhaʼ an exobintaláb.
5. Ka olonchij a Jehová abal ka putuw kʼal i kulbetaláb a uchbíl. Ka konchij a Jehová abal ti tólmiy ka tsuʼuw etsʼey in exbádh ka tsaʼbiy an atikláb. Ani lej exbadh axéʼ max an atikláb yab etsʼey u exóbal o max kʼibat in atsʼál kin eyendhaʼ tin ejatal jawaʼ kʼwajat in exobnál (Filip. 2:13). Ka konchij a Jehová abal ti tólmiy ka tsuʼuw jawaʼ in tʼajál alwaʼ an exóbal. ¡Neʼets ka tʼajaʼ ti kwéntaj abal yan jantʼoj in tʼajál alwaʼ!