AJUMTALÁB 01
¿Jantʼiniʼ in éjtowal ti tólmiy an Biblia?
Yan i atikláb u tʼeʼpinal kom yab in exlál jantʼoj neʼets ka watʼey axi taʼtál a kʼicháj. Jayej u tʼeʼpindháb kʼal an yawʼláts, kʼal an tsemláj, jantʼiniʼ kin ataʼ an tumín axi in yéjenchal ani jantʼiniʼ kin béletnaʼ in yanél. Pero, yan i atikláb tolmiyámej kʼal jawaʼ in exobnámal ban Biblia ani tokʼtsinchámej an konowixtaláb axi in kwaʼalakchik. ¿A tsálpayal abal tatáʼ jayej in éjtowal ti tólmiy an Biblia?
1. ¿Jantʼoj tam konowixtaláb in tókʼtsiyal an Biblia?
Xowéʼ ta kʼicháj yan i atikláb in léʼ kin exlaʼ, ¿jaleʼ tu jilnének tu kʼwajíl tejéʼ ban tsabál?, ¿jantʼiniʼ tin tujchij an ejataláb?, ¿jaleʼ ti lej waʼats i yajchiktaláb max patal i léʼ ku kʼwajiy alwaʼ?, ¿jantʼoj u watʼel kʼal an tsemélom?, ¿jantʼoj neʼets ka watʼey kʼal an tsabál? Pero yan i atikláb in elámal axéʼchik xi tokʼtsixtaláb ban Biblia, ani tolmiyámej abal ka kʼwajiychik más kulbél.
2. ¿Jantʼiniʼ tu tólmiyal an Biblia abal ki atsʼaʼ kulbél ti ejatal?
Yan i atikláb axi in exobnámal an Biblia in tʼajámal ti kwéntaj abal lej tolmiyámej. Jayej, in exobnámalchik jantʼoj in éjtowal kin tʼajaʼ abal ka kʼwajiy más kulbél kʼal in yanél, kin atsʼaʼ kulbél kʼal in tʼojlábil ani yab kin jilaʼ ka lej tʼeʼpiyat kʼal an kʼibataláb. Max tatáʼ ka tujchij ka exóbnaʼ an Biblia jayej neʼets ka exlaʼ axéʼ ani yan jantʼoj más. Ka áynanchij tit exóbal kʼal an Biblia ani neʼets ka tʼajaʼ ti kwéntaj abal «patal jawaʼ in ulal an tʼokat dhuchlab, chubax u tólmix» (2 Timoteo 3:16).
Axéʼ xi publicación yab pel an Biblia. Pel jun i tolmixtaláb abal ki exbay más alwaʼ an Biblia. Tam ka exóbnaʼ axéʼ xi publicación, ka tsápnanchij ka ajiy patal an textos axi ka tsuʼuw tejéʼ abal ka tʼajaʼ ti kwéntaj abal chubax jawaʼ kʼwajat a exobnál.
ABAL KA EXÓBNAʼ MÁS
Tu kániyal ka lej tʼajaʼ ti kwéntaj jantʼiniʼ an Biblia in tolmiyámal kʼeʼat i atiklábchik. Jayej ka tsuʼuw jantʼoj a éjtowal ka tʼajaʼ abal ka kulbétnaʼ ka ajiy ani jaleʼ ti lej exbadh ki tólmiyat ka exóbnaʼ.
3. An Biblia tu exóbchal jantʼiniʼ ku xeʼtsin
An Biblia pel ejtíl jun i lámpara axi tu tájbanchal i bélil. Tu tólmiyal ki exlaʼ jantʼoj ki tʼajaʼ ti ejatal ani tu ólchal jantʼoj neʼets ka watʼey axi taʼtál a kʼicháj.
Ka ajiychik Salmo 119:105 ani ka tsálpaychik kʼal axéʼ:
-
¿Jantʼoj kʼwájatak in tsálpayal axi in dhuchaʼ axéʼ xi kaw?
-
¿Jantʼoj a tsálpayal tatáʼ tin kwéntaj an Biblia?
4. Ban Biblia i elál an tokʼtsixtaláb
Jun i mimláb axi in kwaʼalak yan i konowixtaláb in elaʼ an tokʼtsixtaláb ban Biblia. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼoj in leʼak kin exlaʼ an mimláb axi i tsuʼuw ban video?
-
¿Jantʼiniʼ ti tólmiyat an mimláb tam ti in exóbnaʼ an Biblia?
An Biblia tu tólmiyal ku tsálpaxin ani ki tʼajaʼ i konowixtaláb. Ka ajiychik Mateo 7:7 ani ka tsálpaychik kʼal axéʼ:
-
¿In éjtowal an Biblia ti tókʼtsinchij talchik i konowixtaláb axi a kwaʼal? ¿Ejtíl jawaʼ?
5. Ki ajiy an Biblia pel jantʼoj lej kʼijidh
Yan i atikláb in kulbetnál kin ajiy an Biblia ani in kanchamal in alwáʼ. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼoj in tsálpayal an tsákamchik axi ban video tin kwéntaj an ajumtaláb?
-
Pero, ¿jantʼoj in tsálpayalchik tin kwéntaj an Biblia?
An Biblia tu kanatbedhál ani tu ólchal abal jun a kʼicháj neʼets ku kʼwajiy más alwaʼ. Ka ajiychik Romanos 15:4 ani ka tsálpaychik kʼal axéʼ:
-
¿A léʼ ka exlaʼ jantʼiniʼ tu kanatbedhál an Biblia ani jantʼoj tam aychixtaláb tu pidhál?
6. I éjtowal ki exbay an Biblia max jitaʼ más tu ku tólmiy
Yan i atikláb antsanáʼ tin exbayamal an Biblia, kom tólmiyat kʼal jitaʼ más. Ka ajiychik Hechos 8:26-31 ani ka tsálpaychik kʼal axéʼ:
-
¿Jantʼoj i yéjenchal abal ki exbay an Biblia? (Ka exóbnaʼchik an versículos 30 ani 31).
Ti biyál, an inik axi ti Etiopía in yéjenchij ka tólmiyat abal kin exbay an dhuchlab. Xowéʼ ta kʼicháj, an atiklábchik jayej in yéjenchal tólmidh abal kin exbay an Biblia.
JAWAʼ TALCHIK IN TSÁLPAYAL: «Lej jolát ku ajiy an Biblia».
-
Ani tatáʼ, ¿jantʼoj a tsálpayal? ¿Jaleʼ?
JAWAʼ I EXOBNÁMAL
An Biblia tu exóbchal jantʼiniʼ ku kʼwajiy kulbél xowéʼ, tu tólmiyal abal ki atsʼaʼ kanat ani tu ólchal abal jun a kʼicháj neʼets ku kʼwajiy más alwaʼ.
Ki tʼilaʼ jawaʼ i exóbnaʼ
-
¿Jantʼoj tam exobchixtaláb i elal ban Biblia?
-
¿Jantʼoj tam konowixtaláb tu tókʼtsinchal?
-
¿Jantʼoj a leʼak ka exóbnaʼ ban Biblia?
KA EXÓBNAʼ JANTʼOJ ÍT
Ka exóbnaʼ jaleʼ in éjtowal an Biblia ti tólmiy xowéʼ.
«An Biblia etsʼey neʼets tu ku tólmiy» (La Atalaya, núm. 1 2018)
Ka exóbnaʼ jantʼiniʼ ti tólmiyat kʼal an Biblia jun i inik axi in koʼoy i kʼibataláb ma tin tsákamtal.
Ka exóbnaʼ jantʼiniʼ in éjtowal tu ku tólmiy an Biblia abal ku kʼwajiy kulbél kʼal i yanél.
«12 i tolmixtaláb abal kit kʼwajiy kulbél kʼal a yanél» (¡Despertad!, núm. 2 2018)
Ka exóbnaʼ kʼal an Biblia jitaʼ in abatnál an tsabál.
¿Jaleʼ ti lej exbadh ki Exóbnaʼ an Biblia? (video axi más nakat) 3:14
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
