«An Dios axi kʼwajat ti éb, neʼets kin punuw jún i eyaltaláb axi yab jaykʼiʼ neʼets ka tixkʼáj.» (Daniel 2:44, Traducción del Nuevo Mundo.)

«Xowéʼ ojniʼ in bajuwits abal a Dios ani a Cristo abadh kʼal a Dios kin tʼajaʼ ti lej Tsʼale tin puwél an tsabál jún ti an inikchik pélak i tsʼale ani xóʼ itsots [o yabats]. Ani antsanáʼ neʼets kin tʼajaʼ abal etsʼey.» (Apocalipsis 11:15, An it jilchith cau.)

• Pél jún i éyal bolidh axi in ejtowal tu ku tólmiy kʼalejkʼij ti éb (Isaías 48:17, 18).

• A Dios, weʼits neʼets kin tʼajaʼ abal ku kʼwajiy kulbél al jún i ít xeʼtsintaláb ani yabáts neʼets ka waʼtsin i yawʼláts (Revelación [Apocalipsis] 21:3, 4).

Antsanáʼ, neʼets ki tsuʼuw expidh tsáb i tʼiplab:

• A Jesús in tejwaʼmédhaʼ jawaʼ in Eyaltal a Dios neʼets kin tʼajaʼ. Jajáʼ in exóbchij in aykólil abal kin konoy ti oláb abal ka chích in Eyaltal a Dios ani abal ka tʼajan in kulbétal tejéʼ tsabál (Mateo 6:9, 10). A Jesús in tejwaʼmédhaʼ jantʼiniʼ neʼets ka putun nixéʼ xi oláb.

  Tam ti a Jesús kʼwajiy tejéʼ ti tsabál in píjchiy axi u kʼaʼilák, in jeldhaʼ axi u yaʼulchik ma in wíchbanchij in ejatal axi tsémenek (Mateo 15:29-38; Juan 11:38-44). Kom pélak an Tsʼale kʼal in Eyaltal a Dios, in ejtow kin tejwaʼmédhaʼ an lablixtaláb axi neʼets kin chiʼdhaʼ nixéʼ xi Éyal tam kin abatnaʼ an kʼwajílomchik (Revelación 11:15).

• Jawaʼ kʼwajat ti watʼel ti an xeʼtsintaláb in tejwaʼmédhál abal in Eyaltal a Dios weʼits neʼets ka chích. Okʼxidh kin chiʼdhaʼ i koyattaláb in Eyaltal a Dios tejéʼ ti tsabál, a Jesús in uluw abal neʼetsak ka waʼtsin i pejextaláb, jáyil ani neʼetsak ka tʼeleláts an tsabál (Mateo 24:3, 7).

  Xowéʼ ta kʼícháj kʼwajat ti watʼel patal axéʼ xi kʼibataláb. Jaxtám i belal abal in Eyaltal a Dios weʼits neʼets kin talabedhaʼ patal axéʼ.