A Dios tu ólchal abal in tsʼejkaʼ an Tsabál ani patal jawaʼ waʼats kom lej tu kʼanidhál ani in léʼ ku kʼwajiy kulbél. Jayej tu ólchal abal weʼits neʼets kin talabedhaʼ patal jawaʼ in tʼajál ki yajchiknaʼ abal ku kʼwajiy kulbél axi taʼtál a kʼicháj. Ka ajiy Jeremías 29:11.

An éyalchik yab in ejtowamal kin tixkʼaʼ an pojkaxtaláb, an yawʼláts ani an tsémláj. A Dios tu ólchal abal weʼits neʼets kin tixkʼaʼ patal an éyalchik axi waʼats tejéʼ ti Tsabál ani neʼets kin punuw axi jajáʼ in kʼál. Tám ka watʼey nixéʼ, in bichówil a Dios yabáts neʼets ka tʼeʼpin kʼal ni jantʼoj ani yabáts neʼets ka yawʼláts. Ka ajiy Isaías 25:8; 33:24, ani Daniel 2:44.

Lej alwaʼ kom a Dios tu ólchal abal weʼits neʼets kin talabedhaʼ an yajchiktaláb ani an atiklábchik axi pojkax (Sofonías 2:3). ¿Jaykʼij ti neʼets kin tʼajaʼ a Dios nixéʼ? An Biblia owatits tin olnámal patal an kidhabtaláb axi kʼwajat i tsuʼtal xóʼ. Axéʼ in tejwamedhál abal yabáts neʼets ka owey. Ka ajiy 2 Timoteo 3:1-5.

Kwaʼal ki exobnaʼ an Biblia abal ki exlaʼ más alwaʼ a Dios. An Biblia pél jantʼiniʼ jún i dhuchadh úw axi jún i kʼanidhom tataláb in tsʼejkanchal in tsakámil. Tanáʼ tu ólchal jantʼiniʼ tu ku kʼwajiy kulbél xóʼ ta kʼicháj ani jantʼoj kwaʼal ki tʼajaʼ abal ku kʼwajiy abal etsʼey tejéʼ ti Tsabál. Chubax, yab patal neʼets ka kulbéj max tatáʼ kit exobláts kʼal an Biblia. Pero yab ka jilaʼ abal nixéʼ ti tʼókʼbay kom an lablixtaláb axi i aychal ki batsʼuw, lej alwaʼ. Ka ajiy Proverbios 29:25 ani Revelación (Apocalipsis) 14:6, 7.