Ajumtaláb 15
¿Jaleʼ ti kwaʼal ki aynaʼ ki exobnaʼ jawaʼ a Dios tu ólchal?
1. ¿Jantʼiniʼ ti neʼets ti tólminchij ka aynaʼ ka exobnaʼ an Biblia?
I exlál abal jawaʼ a exobnámal tin kwéntaj an Biblia in tʼajámal ka kʼanidhaʼ más a Dios. Pero xóʼ in yejénchalej ka aynanchij ka puwedhaʼ nixéʼ xi kʼanidhomtaláb (1 Pedro 2:2). Jaxtám, alwaʼ ki aynanchij ki exobnaʼ an Biblia abal ku útey kʼal a Jehová ani antsanáʼ neʼets ki ejtow ku kʼwajiy abal etsʼey tejéʼ ti Tsabál. Ka ajiy Juan 17:3, NM, ani Judas 21, NM.
Tam ka exlaʼ más tin kwéntaj a Dios, a bélomtal neʼets ka tsapikméj ani neʼets ka léʼnaʼ ka tʼajaʼ jawaʼ a Dios ti konchal (Hebreos 11:1, 6). Axéʼ neʼets ti tólmiy kit jikʼtson o kit tʼeʼpin kʼal a wálab ani ka jalkʼuy a xeʼtsintal. Ka ajiy Hechos 3:19.
Tatáʼ a ejtowal ka koʼoy jún i junkudhtaláb lej alwaʼ kʼal Jehová
2. ¿Jantʼiniʼ a ejtowal ka tólmiy kʼeʼat i atiklábchik kin exlaʼ a Dios?
A ejtowal ka tólmiy an atiklábchik max ka tʼilchij jawaʼ a exobnámalits ti Biblia. Jaxtám, ka aynanchij ka exobnaʼ. Antsanáʼ neʼets ka exlaʼ jantʼiniʼ ti ka eyendhaʼ abal ka ólchij an atiklábchik jawaʼ a Dios neʼets kin tʼajaʼ abal wawáʼ. Ka ajiy Romanos 10:13-15, NM.
¿Jaleʼ ti yab a tʼilchal a yanél ani a jaʼúb jawaʼ a exobnámalits ti Biblia? Tam ka tʼajaʼ axéʼ, ka tejwamédhanchij kʼal a káwintal abal a kʼanidhál ani a kʼakʼnál. Yab ka uchaʼ dhubatkʼij abal jawaʼ in belal yab alwaʼ. Okʼox ka ólchij jawaʼ a Dios neʼets kin tʼajaʼ abal an kʼwajílomchik. Ka tʼilaʼ abal jawaʼ más it tʼajchinal ti kwéntaj pél jawaʼ a tʼajál, ani yab jawaʼ a ulal. Ka ajiy 2 Timoteo 2:24, 25.
3. ¿Jantʼoj tam junkudhtaláb a ejtowal ka koʼoy kʼal a Dios?
Tatáʼ a ejtowal ka tsapikmédhaʼ a junkudhtal kʼal a Dios max ka aynanchij ka exobnaʼ más an Biblia. Antsanáʼ neʼets ka atsʼaʼ abal it kʼwajat más utat kʼal a Jehová. Tatáʼ aniyej a ejtowal kit kʼwajiy kʼal an atiklábchik axi jajáʼ in tsuʼtal jantʼiniʼ in tsakámil. Ka ajiy 2 Corintios 6:18.
4. ¿Jantʼiniʼ ta ejtowal kit útey chudhél chudhél kʼal a Dios?
A ejtowal kit útey chudhél chudhél kʼal a Dios max yab ka jilaʼ tit exóbal kʼal an Biblia (Hebreos 5:13, 14). Ka uchaʼ jún i ólchix kʼal a Jehová ti exóbchij kʼal an libro ¿Qué enseña realmente la Biblia? Max tatáʼ ka aynaʼ ka exobnaʼ más jawaʼ in ulal an Biblia, neʼets kit kʼwajiy más kulbél. Ka ajiy Salmo 1:1-3 ani 73:27, 28.
Jawaʼ an Biblia tu ólchal tal kʼal a Jehová, an Dios axi etsʼey kʼwajat kulbél. Tatáʼ a ejtowal kit útey kʼal jajáʼ max kit tamkun kʼal in bichówil (Hebreos 10:24, 25). Ani max ka tsápnanchij ka tʼajaʼ jawaʼ a Jehová in léʼ, neʼets ka ejtow kit kʼwajiy abal etsʼey. Chubax, jawaʼ más alwaʼ a ejtowal ka tʼajaʼ ta ejatal, pél kit útey kʼal a Jehová. Ka ajiy 1 Timoteo 1:11, NM, ani 6:19, NM.
Puede que también le interese
TAMKUNTALÁBCHIK
¿Jantʼoj u tʼajnal al jún i Atáj Tamkuntaláb?
Ka tsuʼuw ta kwetémtal jantʼoj u tʼajnal tanáʼ.
CAMPAÑA ESPECIAL
¿Jaleʼ ti lej exbadh ki Exóbnaʼ an Biblia?
An Biblia in tolmiyámal yán i atiklábchik tin puwél an tsabál abal kin elaʼ an tokʼtsixtaláb axi más exbadh tin ejatal. ¿Tatáʼ jaye a léʼ ka exlaʼ?
