Ajumtaláb 8
¿Jaleʼ tin jilál a Dios ki yajchiknaʼ?
An kʼij axi a Dios in jilámal ti éyal an inikchik, in tejwamedhámal abal yab neʼets kin ejtow kin tixkʼaʼ patal jawaʼ in tʼajál ki yajchiknaʼ
1. ¿Jantʼiniʼ tin tujchij an kidhabtaláb?
An kidhabtaláb in tujchij tejéʼ ti Tsabál tam ti a Satanás in uluw an kʼaʼál janamtaláb. Tam ti tsʼejkájkʼij, pélak jún i ángel alwaʼ ani tʼokat, pero «yab kʼwajiy ti chubaxtaláb» (Juan 8:44, NM). Kʼayúm kʼayúm in léʼnaʼ kin tíxkʼanchij an kʼakʼnaxtaláb axi in tomnál kin batsʼuw expidh a Dios. Jaxtám tin kʼambiy a Eva abal ka belkáj jajáʼ ani yab a Dios. A Adán in tʼajaʼ jayetsekʼij. Játs ti xóʼ wawáʼ i yajchiknál ani u tsémel. Ka ajiy Génesis 3:1-6, 19.
A Satanás in tomolnaʼ in uchbíl axi in kwaʼal a Dios ti Éyal tam tin tʼajaʼ abal a Eva kin jekʼomnaʼ a Dios. Xóʼ jayetsekʼij, lej yán i atiklábchik in jekʼomnál in abatnaxtal a Dios ani antsanáʼ u wenkʼonal tin tolmiwal a Satanás. Jaxtám, a Satanás játs «axi in abatnál axéʼ xi xeʼtsintaláb». Ka ajiy Juan 14:30, NM, ani 1 Juan 5:19.
2. Tám ¿yab alwaʼ jawaʼ a Dios in tsʼejkámal?
Patal jawaʼ a Dios in tsʼejkámal lej alwaʼ. An ángeles ani an atiklábchik in ejtowalak kin belkaʼ in abatnaxtal a Dios jantʼiniʼ tin uchbíl (Deuteronomio 32:4, 5). Tam ti a Dios in tsʼejkaʼ an atiklábchik, in jilaʼ kin tákuy tin kwetémtal jantʼiniʼ tin léʼ kin eyendhaʼ in ejatal. Nixéʼ tu jilál ki tejwamédhanchij max chubax i kʼanidhál. Ka ajiy Santiago 1:13-15 ani 1 Juan 5:3.
3. ¿Jaleʼ tin jilámal a Dios ka waʼtsin i yajchiktaláb?
A Dios in kuxuyamal jún i wéʼ i kʼij ka tomólnanchat in uchbíl ti éyal. ¿Jaleʼ? Abal kin tejwamedhaʼ abal an inikchik yab in ejtowal kin abatnaʼ tin kwetémtal (Eclesiastés 7:29; 8:9). An inikchik kʼwajinek ti éyal más kʼal seis mil i tamub. Patal axéʼ xi kʼij, in tejwamedhámal abal yab neʼets kin ejtow kin tixkʼaʼ an yawʼláts, an pextaláb ani patal jawaʼ tu odhnál. Ka ajiy Jeremías 10:23 ani Romanos 9:17.
Pero max ki jilaʼ tu ku abatnaʼ a Dios, neʼets ki batsʼuw yán i alwaʼtaláb (Isaías 48:17, 18). A Jehová weʼits neʼets kin talabedhaʼ an éyalchik axi waʼats tejéʼ ti Tsabál. Expidh neʼets ka jilkʼon an atiklábchik axi in jilál ka abatnáj kʼal a Dios (Isaías 11:9). Ka ajiy Daniel 2:44.
Jawaʼ ki tákuy ki tʼajaʼ ti ejatal, neʼets kin tejwamedhaʼ max i léʼ tu ku abatnaʼ a Dios o imbáj
4. ¿Jantʼoj tu jilál ki tʼajaʼ in kʼayatal a Dios?
A Satanás in ulal abal wawáʼ i kʼakʼnál a Dios kom jajáʼ tu lábliyal. In kʼayatal a Dios tu jilál ki tejwamedhaʼ max chubax jawaʼ in ulal an Satanás o imbáj. Kʼal i xeʼtsintal neʼets ki tejwamedhaʼ jitaʼ i léʼ tu ku abatnaʼ: a Dios o a Satanás. Ka ajiy Job 1:8-12 ani Proverbios 27:11.
5. ¿Jantʼiniʼ ti tejwamedhál abal i takuyal in abatnaxtal a Dios?
I ejtowal ki tejwamedhaʼ abal i takuyal in abatnaxtal a Dios max ki belkaʼ ani ki kʼakʼnaʼ jajáʼ jantʼiniʼ tin ulal in Káwintal (Juan 4:23). Jayej i tejwamedhál abal i pojkál in abatnaxtal a Satanás max ki tʼajaʼ jantʼiniʼ a Jesús; jajáʼ yab otsits kʼal i política ni i pextaláb. Ka ajiy Juan 17:14.
A Satanás in eyendhál in tsap abal kin tʼajaʼ kin tsalpay an atiklábchik abal tit utsʼál, tit jutsʼul, tit kwéʼ, ka eyendhaʼ i drogas, ka xeʼtsindhaʼ yán i inik o uxum ani kʼeʼat más i tʼajbiláb yab jantʼoj in kwaʼal. Tam ki jilaʼ ki tʼajaʼ nixéʼchik xi tʼajbiláb, walám i yanél o i jaʼubchik tu ku telaʼ o tu ku tomolnaʼ (1 Pedro 4:3, 4). Max antsanáʼ ki watʼaʼ, ka aliy in jaʼubchik a Dios ani ka belkaʼ in abatnaxtal a Jehová. Max ki tʼajaʼ antsanáʼ, neʼets ki tejwamedhaʼ abal a Satanás janamkáwin tam tin uluw abal yab jitaʼ neʼets kin belkaʼ a Dios tam kin támetnaʼ i takaxtaláb. Ka ajiy 1 Corintios 6:9, 10, NM, ani 15:33.
A Dios neʼets kin talabedhaʼ patal jawaʼ tu odhnál ani jawaʼ in tʼajál ki yajchiknaʼ. Wawáʼ kwaʼal ki tejwamedhaʼ abal i takuyal a Dios jantʼiniʼ i Éyal. Max anstanáʼ ki tajaʼ, neʼets ku kʼwajiy abal etsʼey tejéʼ ti Tsabál. Ka ajiy Juan 3:16.
