A Dios in tʼajaʼ jún i bichow kʼal in tsakámilchik a Abrahán ani in bijiy axéʼ xi bichow ti Israel. A Jehová in pidhaʼ i abatnaxtaláb ani in uchaʼ jantʼiniʼ ti kwaʼalak ka kʼakʼnáj. Jayej in uchaʼ abal kwaʼalak kin exóbchij axi más an atiklábchik kin tʼajaʼ jawaʼ in úlalak nixéʼ xi abatnaxtaláb (Salmo 147:19, 20). Antsanáʼ, axi más an bichowchik jayej neʼetsak kin batsʼuw i alwaʼtaláb. Ka ajiy Génesis 22:18.

A Dios in tákuy an israelitas abal kin tʼajaʼ ti ólchixchik. Patal jawaʼ jajáʼchik in watʼaʼ, in tejwamedhál abal max ki belkaʼ in abatnaxtal a Dios i ejtowal ki batsʼuw yán i alwaʼtaláb (Deuteronomio 4:6). Tám, tin ebál an israelitas kʼeʼat i atiklábchik in ejtowalak kin exlaʼ a Jehová. Ka ajiy Isaías 43:10, 12.

An bichow Israel jalkʼuyat kʼal an tamkuntaláb axi in jilaʼ a Cristo tam ti yabáts in belkaʼ a Jehová (Mateo 21:43; 23:37, 38). An israelitas yabáts in tʼójonchal a Dios. Xóʼ ta kʼicháj, an belomchik axi chubax, játs axi a Jehová in takuyámal jantʼiniʼ i ólchix kʼal jajáʼ. Ka ajiy Hechos 15:14, 17, NM.

A Jesús in exóbchij in aykólilchik ka kʼalej kin ólchij an atiklábchik in Káwintal a Dios tin puwél an Tsabál abal antsanáʼ kin belkaʼchik a Dios (Mateo 10:7, 11; 24:14; 28:19, 20). Axéʼ xi tʼojláb kʼwajatits ti putnal xóʼ ta kʼicháj kom weʼits neʼets ka chích an kʼibeltaláb. A Jehová yabak jaykʼij in mulkuwámal lej yán i atiklábchik jantʼiniʼ xóʼ, abal ka kʼwajiy al an kʼakʼnaxtaláb axi tekedh (Revelación [Apocalipsis] 7:9, 10). Kom kʼwajatchik júnkudh, an belomchik axi chubax in ejtowal ka tólmíxin. Ani tin puwél an Tsabál, tam u tamkunalchik, patal in batsʼwal jayetsekʼij an exobchixtaláb tin kwéntaj an Biblia. Ka ajiy Hebreos 10:24, 25.

An ólchixchik kʼal a Jehová in tujchij ti 1870 tam ti jún i tsakam mudhél i exóbal kʼal an Biblia in tsáb elaʼ an chubaxtaláb axi lej owatits ti kʼwajatak tsinat. A Jesucristo in exóbchij in aykólilchik ka kʼalej ti ólchix ani an belomchik axi chubax kwaʼalak kin tʼajaʼ jayetsekʼij. Jaxtám tin tujchichik kin olnaʼ an alwaʼ káw tin kwéntaj in Eyaltal a Dios tin puwél an Tsabál. Ti 1931 in yakʼwaʼchik an bijláb ólchixchik kʼal a Jehová. Ka ajiy Hechos 1:8; 2:1, 4, 11, ani 5:42.

Ti kʼaʼál siglo waʼatsak jún kwenél i ókʼnomchik axi takudh abal kin beletnaʼ an tamkuntaláb tin puwél an Tsabál. Axéʼ xi inikchik in tsuʼtalak a Cristo jantʼiniʼ an Ókʼnom kʼal an tamkuntaláb (Hechos 16:4, 5). Xóʼ ta kʼicháj jayetsejkʼij, an ólchixchik kʼal a Jehová u tolmiyáb kʼal an tsakam kwenél i ókʼnomchik abal kin beletnaʼ patal an tamkuntaláb axi waʼats tin puwél an Tsabál. Axéʼchik xi epchaláb in beletnál an tʼojláb axi u tʼajnal ti sucursales. Tanáʼ u wilkʼáb, u tsʼejkáb ani u bukʼuwab an publicaciones axi kaldhach ti Biblia kʼal watʼadh 600 i kawintaláb. Axéʼ xi tsakam mudhél i ókʼnomchik in eyendhál an Biblia abal kin tólmiy an más de cien mil i tamkuntaláb axi waʼats tin puwel an Tsabál. Al kʼalejkʼij tam tamkuntaláb, waʼats i epchaláb axi bijiyámej ti beletnom kʼal an epchalábchik axi ti tamkuntaláb. Ka ajiy 1 Pedro 5:2, 3.

An ólchixchik kʼal a Jehová u kʼalel kʼimádh ti kʼimádh kin ólchij an atiklábchik in Káwintal a Dios jantʼiniʼ tin tʼajaʼ an abatwálejchik. Antsanáʼ más i atiklábchik in tʼajál ti áykol kʼal a Cristo (Hechos 20:20). Jayej in exóbchal an atiklábchik axi in léʼ kin exlaʼ an chubaxtaláb. An ólchixchik kʼal a Jehová yab expidhkʼij pél jún i bichow, jajáʼchik u kʼanidháx ani u tólmíx jantʼiniʼ i epchalábchik axi beletnadh kʼal a Jehová (2 Tesalonicenses 1:3). Ani kom tin yanél, jantʼiniʼ i bichow, in tsápnanchalchik kin kʼakʼnaʼ a Jehová ani kin tólmiy an kʼwajílom, pél an atiklábchik axi más kulbél u kʼwajíl. Ka ajiy Salmo 33:12 ani Hechos 20:35.