A Dios in kaniyal patal an atiklábchik abal ka ólonchat ani antsanáʼ kin ejtow ka útey kʼal jajáʼ (Salmo 65:2). Pero nixéʼ yab in léʼ kin uluw abal in tʼajál ti kwéntaj patal an oláb axi u tʼajchinal. Ejtíl, an Biblia in ulal abal a Dios yab in tʼajchal ti kwéntaj an oláb axi in tʼajál jún i inik axi in odhnál in kʼimádhil (1 Pedro 3:7, NM). Tam ti an israelitas in tʼajálak jawaʼ yab alwaʼ, a Dios yab in atsʼanchalak in olábil. Pero a Jehová in atsʼál an oláb axi in tʼajál jún i atikláb axi walbinének max ka tʼeʼpin o ka jikʼtson kʼal in wálab. Chubax, an oláb lej in kwaʼal in jalbíl. Ka ajiy Isaías 1:15 ani 55:7.

A Jehová yab in léʼ ki tʼajchij i oláb axi dhuchadh al i úw o ki tsáb uluw jayetsekʼij an káw. Jajáʼ in léʼ ki uchaʼ jawaʼ i atsʼál ti ichích. Tam u ól, kʼwajat i kʼakʼnál a Dios. Jaxtám ti kwaʼal ki ólonchij expidh a Jehová (Mateo 4:10; 6:9). Ani kom u wálbidh, kwaʼal ki tʼajaʼ an oláb tin bij a Jesucristo kom jajáʼ tsemets abal tu ku kʼániy kʼal i wálab (Juan 14:6). Ka ajiy Mateo 6:7 ani Filipenses 4:6, 7, NM.

A Dios in ejtowal kin atsʼaʼ ma an oláb axi i tʼajál ti tsalápil (1 Samuel 1:12, 13). Jajáʼ etsʼey in léʼ ki ólonchij. Ejtíl, tam ku tsʼakiykʼij, tam neʼtsits tu wáyal, tam neʼets tu kʼapul o tam jún jantʼoj tu tʼeʼpindhál. Ka ajiy Salmo 55:22 ani Mateo 15:36.

U kʼwajíl kʼal i atiklábchik axi u telax ani yab in belál jawaʼ a Dios in ulal abal neʼets kin tʼajaʼ. Axéʼ in ejtowal kin tʼajaʼ abal yabáts ki léʼnaʼ ki exlaʼ más tin kwéntaj a Dios (2 Timoteo 3:1, 4; 2 Pedro 3:3, 13). Jaxtám tin yéjenchal ku tamkun  kʼal an epchalábchik abal ku tolmíxin ani ki tsapikmédhaʼ i bélomtal. Ka ajiy Hebreos 10:24, 25, NM.

Max ku tamkun kʼal an epchalábchik neʼets tu ku tólmiy ku útey kʼal a Dios. An tamkuntaláb axi in tʼajál an ólchixchik kʼal a Jehová tu tólmiyal ki exlaʼ i atiklábchik axi in kwaʼal tsapik in bélomtal axi i ejtowal ki nitsʼbiy. Ka ajiy Romanos 1:11, 12.

Abal kit útey kʼal a Dios in yéjenchal kit koyóts jún i wéʼ ani ka tsalpay kʼal patal jawaʼ a exobnámal tin kwéntaj an Biblia, jawaʼ a Dios in tʼajámal ani jawaʼ jajáʼ neʼetsej kin tʼajaʼ axi taʼtál a kʼicháj. Max wawáʼ ki tʼajaʼ axéʼ ani jayej ki ólonchij, neʼets ki exbay abal in kʼanidhomtal a Dios lej púlik ani abal jajáʼ lej tsalpadh. Ka ajiy Josué 1:8 ani Salmo 1:1-3.

Expidh neʼets ka ejtow kit kʼwajiy utat kʼal a Dios max chubax ka belaʼ patal jawaʼ jajáʼ tu ólchal. An belomtaláb pél jantʼiniʼ jún i wits axi in yéjenchal ka wakʼyat abal ka kʼwajiy ejat. Aniyej kʼal i bélomtal, abal ka kʼwajiy ejat, in yéjenchal ki tsalpay jaleʼ ti belál jawaʼ a Dios tu ólchal. Ka ajiy Mateo 4:4 ani Hebreos 11:1, 6.

Jún i alwaʼtaláb axi in batsʼwal jitaʼ ka útey kʼal a Dios pél abal neʼets ka kʼanidhaʼ kʼal jajáʼ. Jayej u beletnancháb in bélomtal ani an aychixtaláb axi in kwaʼal abal ka kʼwajiy abal etsʼey (Salmo 91:1, 2, 7-10). In ólchal an tʼajbiláb axi yab alwaʼ abal yab kin tʼajaʼ ani in exóbchal jantʼiniʼ ka kʼwajiy más alwaʼ. Ka ajiy Salmo 73:27, 28 ani Santiago 4:4, 8.