Ajumtaláb 6
¿Jantʼoj tam aychixtaláb waʼats abal an tsemélomchik?
A Dios in uchaʼ a Adán: «It tsʼejkadh kʼal i pojodh ani tit pojodh neʼets kit wichiy» (GÉNESIS 3:19).
1. ¿Jantʼoj tu ólchal a Dios tin kwéntaj an tsemélomchik?
Jún a kʼicháj, biyat a Jesús kʼwajatak tejéʼ ti Tsabál, tsemets in jaʼúb axi in bijak Lázaro. Jajáʼ u kʼwajílak ti Betania, jún i kwenchal utat ti Jerusalén. Tam ti ulits a Jesús ti Betania, a Lázaro in neʼdhálakits tséʼ a kʼicháj ti tsémenek. Tám, a Marta ani a María in neʼdháj a Jesús juʼtáj ti jolidhak in epchal. Tin adhík mulkun yán i atiklábchik. ¿A ejtowal ka tsalpay an kulbetaláb axi in atsʼaʼ a Marta ani a María tam ti a Jesús in wíchbanchij in ejatal a Lázaro? Ka ajiy Juan 11:21-24, 38-44.
Axéʼ játs jawaʼ a Dios tu ólchal tin káwintal: abal an tsemélomchik neʼets ka wichbanchat in ejatal junílekʼij ti Alabél tsabál. A Marta in belálak abal jún a kʼicháj a Jehová neʼetsak kin tʼajaʼ axéʼ. Ka ajiy Job 14:14, 15.
2. ¿Jantʼoj u watʼel tam jún i atikláb ka tsemets?
Tam jún i atikláb u tsémel yabáts i exlál ni i atsʼál ni jantʼoj. A Dios tu tsʼejkaʼ «kʼal i pojodh» (Génesis 2:7; 3:19). Yab i kwaʼal jún i espíritu ti ál i iniktal axi u jilkʼonal ejat tam ku tsemets. Jayej u tsémel i katsin, juʼtáj ti kwaʼal dhayach i tsalápil. Jaxtám, tam ti a Lázaro wichbanchat in ejatal, yab kʼwajiy in ulal max kʼalej ti kʼwajíl juʼtáj pil. Ka ajiy Eclesiastés 9:5, 6, 10.
¿Walám chubax u odhnáb ti kʼamal an tsemélomchik? An Biblia in ulal abal an tsemélomchik yabáts in exlál ni jantʼoj. Tám, axi in belál abal a Dios in odhnál an tsemélomchik ti kʼamal, in wálbiyal a Dios kʼal jún jantʼoj axi jajáʼ yab jaykʼij in tʼajál. Nixéʼ xi tsalap yab jaykʼij kʼwajinek tin ichích a Dios. Ka ajiy Jeremías 7:31.
3. ¿In ejtowal ti tʼilom an tsemélomchik kʼal wawáʼ?
Imbáj, kom an tsemélomchik yabáts u otsʼox ni u káw (Salmo 115:17). Pero waʼats i ángeles axi pojkax ani in nitsʼbiyal in káwintal axi tsémenekits. Antsanáʼ, in tʼajál abal an atiklábchik kin belaʼ abal axi u káw kʼal jajáʼ, pél in jaʼúb axi tsémenekits (2 Pedro 2:4). Jaxtám a Jehová in pojkál ki takaʼ ku tʼilmáts kʼal an tsemélomchik. Ka ajiy Deuteronomio 18:10, 11.
4. ¿Jitaʼchik neʼets ka tsáb wichbanchat in ejatal?
Neʼets ka tsáb wichbanchat in ejatal abal ka kʼwajiy tejéʼ ti Tsabál yán i atiklábchik. Ma axi yab in exlaʼ tin kwéntaj a Jehová ani axi in tʼajaʼchik jawaʼ yab alwaʼ. Ka ajiy Lucas 23:43, NM, ani Hechos 24:15.
An atiklábchik axi ka tsáb wichbanchat in ejatal neʼets kin ejtow kin exobnaʼ tin kwéntaj a Dios ani kin tejwamedhaʼ abal in belál a Jesús kʼal in bélkaxtal (Revelación [Apocalipsis] 20:11-13). Max kin tʼajaʼchik antsanáʼ, neʼets kin ejtow ka kʼwajiy abal etsʼey tejéʼ ti Tsabál. Ka ajiy Juan 5:28, 29.
5. A Jehová neʼets kin tsáb wíchbanchij in ejatal an tsemélomchik, ¿jantʼoj tu exóbchal axéʼ tin kwéntaj jajáʼ?
Axéʼ tu exóbchal abal a Jehová lej tu kʼanidhál ani abal tu lábliyal, bélakits abal tam junchikíl ma yab in tomnálak kin tʼajaʼ. Nixéʼ xi kʼanidhomtaláb, in tʼajaʼ abal kin abaʼ in Tsakámil tejéʼ ti Tsabál abal tu ku kʼániy. Ani tatáʼtij ¿Jitaʼ a léʼ ka tsuʼuw tam a Dios kin tsáb wíchbanchij in ejatal an tsemélomchik? Ka ajiy Juan 3:16 ani Romanos 6:23.
