Ajumtaláb 7
¿Jantʼonéy játs in Eyaltal a Dios?
¿Jaleʼ ti a Jesús pél an más alwaʼ Tsʼálej? (MARCOS 1:40-42)
1. ¿Jantʼonéy játs in Eyaltal a Dios?
Pél jún i Eyaltaláb axi kʼwajat ti éb ani neʼets kin tʼajaʼ ka putun in kulbétal a Jehová tejéʼ ti Tsabál ani ti éb. Jayej neʼets kin jalkʼuy patal an éyalchik axi waʼats tejéʼ ti Tsabál. In Eyaltal a Dios neʼets kin pidhaʼ an atiklábchik patal jawaʼ in yéjenchal. Jayej neʼets kin tʼajaʼ ku kʼwajiy júnkudh ani ku kʼanidháxin. Jawaʼ a Dios tu ólchal lej alwaʼ ¿yab aníts? Ka ajiy Daniel 2:44; Mateo 6:9, 10, NM, ani 24:14.
Jún i abatnaxtaláb in kwaʼal jún i ókʼnom ¿yab aníts? Antsanáʼ jayej tin Eyaltal a Dios. Jajáʼ in bijiy a Jesucristo ti Tsʼálej tin Eyaltal. Ka ajiy Revelación (Apocalipsis) 11:15.
2. ¿Jaleʼ ti a Jesús játs an más alwaʼ Tsʼálej?
A Jesús játs an más alwaʼ Tsʼálej kom jajáʼ alwaʼ inik ani etsʼey in tʼajál jawaʼ tekedh (Juan 1:14). Tam a Jesucristo kin abatnaʼ an Tsabál ma ti éb, neʼets kin eyendhaʼ an awiltaláb axi in kwaʼal abal kin tólmiy an atiklábchik. Talbél tam ti a Jesús wíchbanchat in ejatal, wichiy ti éb ani in aychij tin winab a Jehová ma ti pidhan in éy (Hebreos 10:12, 13). Xóʼ pélits i Tsʼálej ani weʼits neʼets kin abatnaʼ an Tsabál ma ti éb. Ka ajiy Daniel 7:13, 14.
3. ¿Neʼets ka kʼwajiy ti Éyal kwetém a Jesús?
A Jesús neʼets ka tolmiyat ti eyal kʼal jún mudhél in tʼojnálilchik a Dios axi an Biblia in bijiyál ti tʼokatchik o santos (Daniel 7:27). An abatwálejchik játs axi okʼox takuyat kʼal a Dios abal ka kʼalej ti éyal kʼal a Jesús. Yab jitákits neʼets ka kʼalej ti éb. A Dios in aynanchámal kin tákuy ma xowéʼ axéʼ xi atiklábchik. Tam jajáʼchik ka tsemets neʼets ka kʼalej ti éb ani u pidhnal jún i ejataláb espiritual jantʼiniʼ ti watʼey kʼal a Jesús. Ka ajiy Juan 14:1-3 ani 1 Corintios 15:42-44.
¿Jáy i atiklábchik neʼets ka kʼalej ti éb? A Jesús in uluw abal yab yán, ani in bijiy ti ‹tsakam kwenél i ovejas› (Lucas 12:32). ¿Jaleʼ? Kom expidh 144.000 axi neʼets kin tólmiy a Cristo kin abatnaʼ an Tsabál ma tiwaʼ ti éb. Ka ajiy Revelación 14:1.
4. ¿Jantʼonéy watʼey tam ti a Jesús in tujchij ti Éyal?
Tam ti a Jesús in tujchij ti Éyal ti 1914, jawaʼ okʼox in tʼajaʼ pél kin jolow abal tejéʼ ti Tsabál a Satanás ani in tolmiwálchik. * A Satanás watʼadh tsákuy ani in tʼajaʼ ka waʼtsin yán i yajchiktaláb tin puwél an Tsabál (Revelación 12:7-10, 12). Ma ti tam lej yánenek an pextaláb, an yawʼláts ani an jáyil. Jayej ma ti tam lej u tʼelelél an tsabál. Patal axéʼ pél jún i tsuʼbixtaláb axi in tejwamedhál abal in Eyaltal a Dios weʼits neʼets kin abatnaʼ tin puwél an Tsabál. Ka ajiy Lucas 21:7, 10, 11, 31.
5. ¿Jantʼoj kʼwajat in tʼajál in Eyaltal a Dios ani jantʼoj neʼets kin tʼajaʼ axi taʼtál a kʼicháj?
In Eyaltal a Dios neʼets kin talabedhaʼ axéʼ xi kidháb xeʼtsintaláb. Pero okʼox kin tʼajaʼ nixéʼ, kʼwajat in támkuyal jún i «púlik mudhél» i atiklábchik. Jaxtám, xóʼ ta kʼicháj u kʼalel ti olnáb in Eyaltal a Dios tin puwél an Tsabál. Xóʼ yán i kʼwajílomchik in tejwamedhálits abal in léʼ ka abatnáj kʼal a Jesús. Axéʼchik neʼets ka kʼaniyat tam ka chích an kʼibeltaláb. Jaxtám, max i léʼ ku kʼaniyat, kwaʼal ki belkaʼ a Jesús. Ka ajiy Revelación 7:9, NM, 14, 16, 17.
A Jesucristo neʼets ka kʼwajiy ti Éyal mil i tamub. Al nixéʼ xi kʼij, neʼets kin putuw jawaʼ a Dios etsʼey in tsalpayámal kin tʼajaʼ. Tíkʼalej tam, tin puwél an Tsabál neʼets ka kʼwajiy alabél. Tam ka taley ti Éyal, a Jesús neʼets kin wíchbanchij an Eyaltaláb a Jehová (1 Corintios 15:24-26). ¿A léʼ ka ólchij kʼeʼat tin kwéntaj in Eyaltal a Dios? Ka ajiy Salmo 37:10, 11, 29.
^ párr. 12 Abal ka exlaʼ más tin kwéntaj an kʼejkáw axi in ólnál an tamub 1914, ka tsuʼuw an páginas 215-218 axi tal ti libro ¿Qué enseña realmente la Biblia?
