Ajumtaláb 4
¿Jitaʼ játs a Jesucristo?
¿Jantʼoj in tejwamedhál abal jitákits tam atikláb in ejtowalak ka útey kʼal a Jesús? (MATEO 11:29; MARCOS 10:13-16)
1. ¿Jantʼiniʼ tin tujchij in ejatal a Jesús?
An kʼaʼál atikláb axi a Dios in tsʼejkaʼ pél a Jesús. A Jesús yab ejtíl wawáʼ kom okʼxidh ka chích tejéʼ ti Tsabál, jajáʼ pélak jún i ángel tiwaʼ ti éb (Juan 8:23). A Jehová kwetém in tsʼejkaʼ a Jesús. Jaxtám ti a Jesús u bijiyáb ti «lej junkats» Tsakámil a Dios. A Jesús in tólmiy a Jehová kin tsʼejkaʼ patal jawaʼ waʼats (Juan 1:14). A Jesús jayej u bijiyáb ti «Káw», kom biyat u kʼwajílak ti éb a Jehová in eyendhaʼ abal ka káwin tin bij a Dios kʼal an atiklábchik. Ka ajiy Proverbios 8:22, 23, 30 ani Colosenses 1:15, 16.
2. ¿Jaleʼ ti chích a Jesús tejéʼ ti Tsabál?
A Jesús chích kin putuw óx i tsalap: 1) abal tu ku exóbchij an chubaxtaláb tin kwéntaj a Dios, 2) abal tu ku ólchij jantʼiniʼ ki tʼajaʼ in kulbétal a Dios bélakits max ki támetnaʼ i yajchiktaláb ani 3) abal kin «jálbiy» i wálab. A Dios in punchij in ejatal a Jesús tin chukul a María abal ka waʼtsin tejéʼ ti Tsabál jantʼiniʼ i tʼeleʼ. Jaxtám ti ulal abal in Tátaj a Jesús pél a Dios ani yab jún i inik tejéʼ ti Tsabál (Lucas 1:30-35). Ka ajiy Mateo 20:28, NM.
3. ¿Kʼal jantʼoj ti yéjenchal ku walkáj?
Junchikíl, tam jún i atikláb u koʼoyáb wikʼat o u leʼnáb ka tsemdháj u bináb jún i jalbixtaláb abal ka walkáj (Éxodo 21:29, 30). A Dios yab in léʼak abal wawáʼ ku yejtselbej ani ku tsemets. ¿Jaleʼ ti ulal nixéʼ? Kom jajáʼ in okʼxidh uchaʼ a Adán abal max ka walbin, neʼets ka tsemets. Tám, max jajáʼ yabak walbinének, yabak tsemnekak (Génesis 2:16, 17; 5:5). An Biblia in ulal abal wawáʼ u tsémel kom a Adán tu watʼbanchij an walabtaláb. Jaxtám ti yéjenchalak jitaʼ tu ku kʼániy. Ka ajiy Romanos 5:12 ani 6:23.
¿Jitaʼ in ejtowalak kin jálbiy i wálab ani tu ku kʼániy kʼal an tsémláj? Tam wawáʼ u tsémel i jalbiyal i wálab, pero expidh axi wawáʼ i kʼál. Yab i ejtowal ki jalbinchij in wálab axi más. Ka ajiy Salmo 49:7-9.
4. ¿Jaleʼ ti tsemets a Jesús?
A Jesús yab tsemets abal kin jálbiy in wálab kom jajáʼ yabak wálbidh. Tsemets abal kin jálbiy i wálab. A Dios in tejwamedhaʼ abal watʼadh tu kʼanidhál tam tin jilaʼ ka tsemdháj in tsakámil abal tu ku kʼániy. A Jesús jayej in tejwamedhaʼ abal tu kʼanidhál kom in belkaʼ a Jehová ani in bínaʼ in ejatal abal tu ku kʼániy kʼal an walabtaláb ani an tsémláj. Ka ajiy Juan 3:16 ani Romanos 5:18, 19.
5. ¿Jantʼonéy kʼwajat in tʼajál xóʼ a Jesús?
Tam ti kʼwajiy tejéʼ ti Tsabál, a Jesús in ilaliy i yaʼul, in wíchbanchij in ejatal axi tsémenek ani in tólmiy axi in yajchiknálak. Antsanáʼ, in tejwamedhaʼ jantʼoj neʼets kin tʼajaʼ al an kʼicháj axi taʼtál abal an atiklábchik axi in belkál a Dios (Mateo 15:30, 31; Juan 5:28). Talbél tam ti tsemets a Jesús, a Dios in wíchbanchij in ejatal jantʼiniʼ i espíritu tiwaʼ ti éb (1 Pedro 3:18). A Jesús in aychij tin winab a Dios ma ti bijiyat ti Tsʼálej abal kin abatnaʼ an Tsabál (Hebreos 10:12, 13). Xóʼ pél i Tsʼálej tiwaʼ ti éb ani in aykólilchik kʼwajat in ólnál axéʼ tin puwel an Tsabál. Ka ajiy Daniel 7:13, 14 ani Mateo 24:14.
Axéʼ xi Tsʼálej, axi pidhnének i awiltaláb kʼal a Dios lej utatits neʼets kin talabedhaʼ an yajchiktaláb ani an atiklábchik axi in tʼajál ki yajchiknaʼ. Patal axi kin belaʼ ani kin belkaʼ a Jesús, neʼets ka kʼwajiy kulbél abal etsʼey al jún i Alabél Tsabál. Ka ajiy Salmo 37:9-11.
