«[An xeʼtsintaláb] u talaʼ abátnab kʼal an tenekláb.» (1 Juan 5:19.)

«Chích in Tsakámil a Dios abal kin talabedhanchij jawaʼ in tʼajál an tenekláb.» (1 Juan 3:8, An it jilchith cau [IJC].)

Neʼets ki ejtiy juʼtáj ti tujey an kʼibataláb in kʼal an xeʼtsintaláb (Revelación [Apocalipsis] 12:12).

Neʼets ki ejtow ki aychij jún i xeʼtsintaláb más alwaʼ (1 Juan 2:17).

Antsanaʼ, i ejtowal ki belaʼ abal an xeʼtsintaláb neʼets ka alwaʼméj. Neʼets ki tsuʼuw expidh óx i tʼipláb:

• In eyaltal a Satanás neʼets ka talabedháj. A Satanás yabáts neʼets kin abatnaʼ an kʼwajílomchik, kom a Jehová, neʼets kin talabédhanchij in abatnaxtal. Jajáʼ in ulal abal neʼets «kin talabedhaʼ an Tenekláb», ani neʼets kin boliy patal an odhnaxtaláb axi in tʼajámal (Hebreos 2:14).

• A Dios in takuyámal a Jesucristo abal kin abatnaʼ an xeʼtsintaláb. A Jesús yab pél jantʼiniʼ an abatnom pojkax ani kʼadhat axi xowéʼ in abatnál an xeʼtsintaláb. Jaxtám, a Dios in ulal tin kwéntaj in eyaltal a Cristo: «Neʼets kin yájnanchij axi tsaʼat ani an tsʼejwantál [...]. Kʼal an odhnaxtaláb neʼets kin kʼániy» (Salmo 72:13, 14, Traducción del Nuevo Mundo [TNM]).

• A Dios yab in ejtowal ti janamkáw. An Biblia lej chubax in ólnál abal «a Dios yab in ejtowal ti janamkáw» (Hebreos 6:18, IJC). Antsanaʼ, tam a Jehová in ulal jantʼoj in putuwal (Isaías 55:10, 11). Ani jawaʼ in ulúmal pél abal «An abatnom kʼal axéʼ xi xeʼtsintaláb neʼets ka petnáj eléb» (Juan 12:31, TNM).