AJUMTALÁB 05
Jawaʼ kʼwajat ti Biblia pel in tsalápil a Dios
A Jehová tu pidhámal jun i tsʼejwalixtaláb lej alabél: játs an Biblia. Tejeʼ kʼwajat 66 i tsakam libros. Pero walám a tsalpayámal: «¿Jantʼiniʼ ti tsʼejkáj ani jitaʼ in ábnaʼ abal ka tsʼejkaj?». Abal ki exlaʼ, okʼox ki tsuʼuw jantʼoj tʼajnének abal ki ejtow ki koʼoy an Biblia.
1. ¿Jaleʼ ti an Biblia in kwaʼal in tsalápil a Dios max dhuchan kʼal i inik?
An Biblia dhuchan kʼal 40 i inik. Jajáʼchik in kwaʼalak pílchik in tʼojlábil. Tujey ti dhuchnal ban támub 1513 okʼxidh ka waʼtsin a Cristo ani talabedháj ban támub 98 talbél ti waʼtsin a Cristo. Abal ka kídhbayat ka dhuchan watʼey 1.600 i támub. Patal an tsalap axi ti Biblia kʼwajat jununúl. ¿Jaleʼ ti jununúl patal an tsalap? Kom pel a Dios axi in ábnaʼ abal ka tsʼejkáj (ka ajiy 1 Tesalonicenses 2:13). Jajáʼchik yab in dhucha in kwetém tsalápil. «A Dios in eyendhaʼ an espíritu santo abal jajáʼchik kin exlaʼ jantʼoj kin dhuchaʼ» a (2 Pedro 1:21). Kʼal an espíritu santo, a Jehová in tʼajaʼ abal ka dhúchunchat in tsalápil kʼal axéʼchik xi inik (2 Timoteo 3:16).
2. ¿Ma juʼtáj in bajúmal an Biblia?
An atiklábchik «axi tin puwél an tsabál, al jawakits tam bichow ka kʼwajiy ani jawakits in káwintal» in éjtowal kin exlaʼ an alwaʼ kaw axi in olnál an Biblia (ka ajiy Apocalipsis 14:6). A Dios in tʼajámal abal ka wilkʼáj an Biblia al yan i kawintaláb. Játs an libro axi más wilkʼámej tin puwél an tsabál. Patal an atikláb in éjtowal kin koʼoy an Biblia al jawakits tam kawintaláb.
3. ¿Jantʼoj in tʼajámal a Jehová abal ki koʼoy ma xowéʼ an Biblia?
Tam ti tujey ti dhúchnal an Biblia, eyendháj in otʼol i koʼnél. Jayej tsʼejkáj kʼal i uw, kʼal jun i tsʼojól axi in bij papiro, pero patal axéʼ yab u ówel. Jaxtám, talchik i inik axi in leʼak ka exláj jawaʼ in ulal an Biblia in tsab dhuchalak. In lej tʼajálakchik ti kwéntaj tam kin dhuchaʼ. Waʼtsinének yan i inik axi pojkax axi in leʼnamal kin talabédhaʼ an Biblia. Pero jayej waʼtsinének kʼeʼatchik i inik axi in wilkʼamal, bélits abal u ejtowábak ka tsemdháj. A Jehová yab in jilámal abal nibal jitaʼ kin talabédhaʼ an Biblia. An Biblia in ulal: «In káwintal a Dios yab jaykʼiʼ neʼets ka talabedháj» (Isaías 40:8).
ABAL KA EXÓBNAʼ MÁS
Tejéʼ neʼets ki exóbnaʼ jantʼiniʼ a Jehová in wátʼbanchij in tsalápil axéʼchik xi inik abal kin dhuchaʼ. Jayej neʼets ki tsuʼuw jantʼoj in tʼajámal a Jehová abal yab ka talabedháj an Biblia ani abal patal an atikláb kin ejtow kin koʼoy.
4. An Biblia tu ólchal jitaʼ in kʼál an tsalap axi dhuchadh tanáʼ
Ka tsuʼuwchik an VIDEO. Talbél ka ajiychik 2 Timoteo 3:16 ani ka tsálpaychik kʼal axéʼ:
-
¿Jaleʼ ti an Biblia pel in káwintal a Dios max dhuchan kʼal i inik?
-
¿Jaleʼ i belál abal a Dios chubax in éjtowal kin wátʼbanchij in tsalápil an inikchik?
An inik expidh in dhuchál jawaʼ u uxnal kʼal axi tu abatnáb. Jayetsej watʼey kʼal an Biblia: pel i inik axi in dhuchaʼ pero an tsalap pel in kʼál a Dios.
5. An Biblia in kuxuyamal yan jantʼoj
A Jehová in beletnámal an Biblia kom jajayej in káwintal. Waʼtsinének yan i éyal axi in leʼnamal kin talabédhaʼ an Biblia. Ani kʼeʼatchik i atikláb al pílchik i belomtaláb in kʼanchamal an atiklábchik kin ajiy an Biblia. Pero, jayej waʼtsinének yan i atikláb axi in wilkʼamal an Biblia bélits abal odhnáj, talchik ma tsemdháj. Abal ka exlaʼchik jun i tʼiplab, ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Yab aníts abal i leʼ ki ajiy kʼal más i kanataláb an Biblia xowéʼ abal i exlálits jantʼiniʼ ti beletnáj?
Ka ajiychik Salmo 119:97 ani ka tsálpaychik kʼal axéʼ:
-
¿Jaleʼ ti yan i atikláb in wilkʼaʼchik ani in bukʼuw an Biblia bélits abal u ejtowábak ka tsemdháj?
6. An libro axi más bukʼuwámej tin puwél an tsabál
An Biblia játs an libro axi más wilkʼámej al yan i kawintaláb ani bukʼuwámej tin puwél an tsabál. Ka ajiychik Hechos 10:34, 35 ani ka tsálpaychik kʼal axéʼ:
-
¿Jaleʼ tin tʼajámal a Jehová abal ka wilkʼáj an Biblia al yan i kawintaláb ani ka búkʼuwat tin puwél an tsabál?
-
¿Jantʼoj játs axi más a kulbetnál tin kwéntaj an Biblia?
Lej
yanits
i atikláb
axi in éjtowal kin ajiy an Biblia al jun i kawintaláb axi in éxbayal
Kʼwajatits al
3.000
i kawintaláb,
al talchik kʼwajat kidhat al kʼeʼatchik, pejach
5.000 millones
U tsalpancháb abal játs an biblias axi bukʼuwámej tin puwél an tsabál,
yab waʼats kʼeʼat i libro axi lej bukʼuwámej ejtíl an Biblia
JAWAʼ TALCHIK IN TSÁLPAYAL: «An Biblia lej biyálits ani pel i inik axi in dhuchaʼ».
-
¿Jantʼoj a tsálpayal tatáʼ?
-
¿Jaleʼ a belál abal an Biblia pel in káwintal a Dios?
JAWAʼ I EXOBNÁMAL
Jawaʼ kʼwajat ti Biblia pel in tsalapil a Dios. Jajáʼ in tʼajámal yan jantʼoj abal yab ka talabedháj an Biblia.
Ki tʼilaʼ jawaʼ i exóbnaʼ
-
¿Jantʼoj in leʼ kin uluw abal a Dios in eyendhaʼ i inik abal kin dhuchaʼ an Biblia?
-
¿Jantʼoj a atsʼál kom yab jitaʼ in ejtowámal kin talabédhaʼ an Biblia? Ani, ¿jantʼoj a tsálpayal kom wilkʼámej al yan i kawintaláb ani bukʼuwámej tin puwél an tsabál?
-
¿Jantʼoj a atsʼál kʼal patal jawaʼ in tʼajámal a Jehová abal ka éxlanchij in káwintal?
KA EXÓBNAʼ JANTʼOJ ÍT
Ka exóbnaʼ jantʼiniʼ ti tujey ti dhúchnal an Biblia ani jantʼoj tʼajnének abal ki koʼoy xowéʼ ta kʼicháj.
«Jawaʼ tʼajnének abal ki koʼoy an Biblia» (¡Despertad!, noviembre de 2007)
Ka exóbnaʼ óx jantʼoj axi yab in ejtowámal kin talabédhaʼ an Biblia.
«Patal jawaʼ in kuxuyámal an Biblia» (La Atalaya núm. 4 2016)
Ka tsuʼuw jantʼoj in yajchiknaʼ talchik i atikláb axi in wilkʼaʼ an Biblia.
¿Jantʼiniʼ i éjtowal ki exlaʼ abal an Biblia yab jalchámej i kaw, max lej yanits axi tsʼejkámej?
«¿Jaluwámej an kaw axi kʼwajat ti Biblia?» (Artículo axi ti jw.org)
a An espíritu santo pel an tsapláb axi a Jehová in eyendhál abal kin putuw in tsalápil.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
