AJUMTALÁB 07
¿Jantʼiniʼ játs a Jehová?
¿Jantʼiniʼ a tsálpayal abal pel a Jehová? ¿A tsálpayal abal pel jitaʼ lej púlik, pero kʼwajat lej watʼadh owél kʼal wawáʼ? ¿O walám a tsálpayal abal pel ejtíl an mamláb axi u tumumúl, lej waʼtadh tsapik pero yab in atsʼál nibal jantʼoj abal kʼal wawáʼ? Ban Biblia, a Jehová tu tejwamédhanchal lej tájax jantʼiniʼ chubax játs in ey ani jawaʼ in atsʼál abal kʼal tatáʼ.
1. ¿Jaleʼ ti yab i éjtowal ki tsuʼuw a Dios?
«A Dios pel jun i espíritu» (Juan 4:24). A Jehová yab in kwaʼal in tʼuʼúl ejtíl wawáʼ, jaxtám yab i éjtowal ki tsuʼuw. Jajáʼ u kʼwajíl ti éb lej tʼekʼat, juʼtáj wawáʼ yab i éjtowal ki tsuʼuw.
2. ¿Jantʼiniʼ játs in ey a Jehová?
Wawáʼ yab i éjtowal ki tsuʼuw a Jehová, pero tam ki exlaʼ jantʼiniʼ játs in ey neʼets ki bajuw ki kʼanidhaʼ kom Jajáʼ chubax ejat ani tu kóʼonchal i kʼanidhomtaláb. An Biblia in ulal: «A Jehová in kulbetnál kin tʼajaʼ jawaʼ tekedh ani yab jaykʼiʼ neʼets kin wálbaʼ an atiklábchik kʼal axi tu kʼanidháb» (Salmo 37:28). Jayej «lej kʼanidhom ani in yájnanchal jitaʼ in watʼál i kʼibataláb» (Santiago 5:11). «A Jehová kʼwajat utat kʼal jitaʼ yajlidh in ichích ani in kʼaniyal jitaʼchik in atsʼál abal yab jantʼoj in ey» (Salmo 34:18). ¿A exlálak tatáʼ abal wawáʼ i éjtowal ki kulbédhaʼ a Jehová o ki yajbédhanchij in ichích? Tam jun i atikláb in tʼajál jawaʼ kidháb, in tʼajál ka tʼeʼpin a Jehová (Salmo 78:40, 41). Pero tam jun i atikláb kin tʼajaʼ jawaʼ alwaʼ, in kulbédhanchal in ichích (ka ajiy Proverbios 27:11).
3. ¿Jantʼiniʼ tu tejwamédhanchal a Jehová abal tu kʼanidhál?
Jawaʼ más in tejwamedhál a Jehová játs an kʼanidhomtaláb. An Biblia in ulal «a Dios in ey lej kʼanidhom» (1 Juan 4:8). A Jehová in eyendhál an Biblia ani patal jawaʼ in tsʼejkámal abal tu ku tejwamédhanchij abal tu kʼanidhál (ka ajiy Hechos 14:17). Wawáʼ i éjtowal ku kulbéj kʼal jawaʼ i tsuʼtal, ku kʼijidhbéj kʼal an son ani ki kulbétnaʼ an kʼapnél. A Jehová in léʼ abal ku kʼwajiy kulbél.
ABAL KA EXÓBNAʼ MÁS
Ki exóbnaʼ jantʼoj in eyendhámal a Jehová abal kin tsʼejkaʼ ani kin tʼajaʼ yan jantʼoj. Talbél neʼets ki exóbnaʼ jantʼiniʼ játs in ey a Jehová.
4. An espíritu santo pel in tsap in kʼal a Jehová
Wawáʼ i eyendhál i kʼubak abal ki tʼajaʼ i tʼojlábil ani a Jehová in eyendhál an espíritu santo. An Biblia in ulal abal an espíritu santo pel an tsapláb axi a Jehová in eyendhál abal kin putuw in tsalápil, yab pel jun i atikláb. Ka ajiychik Lucas 11:13 ani Hechos 2:17, ani ka tsálpaychik kʼal axéʼ:
-
Max ki konchij a Jehová i espíritu santo, Jajáʼ neʼets tu ku pidhaʼ. Tam, ¿a tsálpayal abal an espíritu santo pel jun i atikláb o pel an tsapláb in kʼál a Jehová? ¿Jaleʼ a tsálpayal antsanáʼ?
A Jehová in eyendhámal an espíritu santo abal kin tsʼejkaʼ ani kin tʼajaʼ yan jantʼoj. Ka ajiychik Salmo 33:6 ani 2 Pedro 1:20, 21, ani ka tsálpaychik kʼal axéʼ:
-
¿Jantʼiniʼ in eyendhámal a Jehová an espíritu santo?
5. I lej kulbetnál jantʼiniʼ játs in ey a Jehová
A Moisés in kʼakʼnálakits a Jehová pero in léʼak kin exlaʼ más jantʼiniʼ játs in ey, jaxtám a Moisés in uchaʼ a Jehová: «Ti kin exóbchij jantʼiniʼ játs a ey abal ku ejtow tu exlaʼ» (Éxodo 33:13). Tam, a Jehová in tejwamédhanchij jantʼiniʼ játs in ey. Ka ajiychik Éxodo 34:4-6 ani ka tsálpaychik kʼal axéʼ:
-
¿Jantʼiniʼ in uluw a Jehová abal játs in ey?
-
Tatáʼ, ¿jantʼoj a kulbetnál más tin kwéntaj a Jehová?
6. A Jehová in tʼajál ti kwéntaj jawaʼ i watʼál
An hebreos pelak an bichow axi tákudhak kʼal a Jehová ti biyál. Jajáʼchik u lej tʼojondhábak ani u odhnábak ti Egipto. ¿Jantʼiniʼ in atsʼalak a Jehová kom u odhnanchábak in bichówil? Ka atsʼaʼchik an AUDIO in kʼál an ajumtaláb o ka ajiychik Éxodo 3:1-10. Talbél ka tsálpaychik kʼal axéʼ:
-
¿Jantʼoj in atsʼál a Jehová tam in tsuʼtal abal i yajchiknál? (Ka tsuʼuwchik an versículos 7 ani 8).
-
¿Walám a Jehová chubax in léʼ tu ku tólmiy? ¿Walám chubax in éjtowal kin tʼajaʼ? ¿Jaleʼ a tsálpayal antsanáʼ?
7. Kʼal jawaʼ in tsʼejkámal a Jehová u tejwamél jantʼiniʼ játs in ey
A Jehová in eyendhál patal jawaʼ in tsʼejkámal abal tu ku exóbchij jantʼiniʼ játs in ey. Ka tsuʼuwchik an VIDEO. Talbél, ka ajiychik Romanos 1:20 ani ka tsálpaychik kʼal axéʼ:
-
¿Jantʼoj tu exóbchal tin kwéntaj a Jehová jawaʼ in tsʼejkámal?
JAWAʼ TALCHIK IN TSÁLPAYAL: «A Dios kʼwajat juʼtámkʼij. Yab jitaʼ in éjtowal kin exlaʼ».
-
¿Jantʼoj a tsálpayal tatáʼ?
-
¿Jaleʼ a tsálpayal antsanáʼ?
JAWAʼ I EXOBNÁMAL
A Jehová pel jun i espíritu, jaxtám yab i éjtowal ki tsuʼuw. I lej kulbétnanchal jantʼiniʼ játs in ey, jawaʼ más in tejwamedhál játs abal u kʼanidhom.
Ki tʼilaʼ jawaʼ i exóbnaʼ
-
¿Jaleʼ ti yab i éjtowal ki tsuʼuw a Jehová?
-
¿Jantʼoj játs an espíritu santo?
-
¿Jantʼiniʼ játs in ey a Jehová?
KA EXÓBNAʼ JANTʼOJ ÍT
Ka exóbnaʼ más jantʼiniʼ játs in ey a Jehová. Ka tsuʼuw tseʼ jantʼiniʼ in tejwamedhál.
Ka exlaʼ jaleʼ i belál abal a Jehová yab kʼwajat juʼtámkʼij.
Ka tsuʼuw jaleʼ in ulal an Biblia abal an espíritu santo pel ejtíl in «kʼubak» a Dios.
Jun i inik axi jokʼtsej kʼibatak in atsʼál kin belaʼ abal u kʼanidháb kʼal a Dios. Ka tsuʼuw kʼal jantʼoj ti tólmiyat abal kin jalkʼuy in tsalápil.
«Xowéʼ u atsʼál abal u éjtowal tin tólmix» (La Atalaya, 1 de octubre de 2015)