¿Ti kaniyamal jun i ólchix kʼal a Jehová ki tamkun kʼal jajáʼchik? Walám a atsʼál wéʼ tidhebél max yab jaykʼiʼ it kʼalnek. Pero walám a léʼ ka exlaʼ jantʼoj in tʼajál an ólchixchik kʼal a Jehová ban tamkuntaláb. ¿Jaleʼ ti lej exbadh abal jajáʼchik, ka tamkun? ¿Walám alwaʼak max kit kʼalej? Al axéʼ xi ajumtaláb neʼets ka exóbnaʼ abal max kit tamkun kʼal an ólchixchik kʼal a Jehová neʼets ti tólmiy abal kit utey más kʼal a Jehová ani jayej neʼets ti lej tólmiy ta ejatal.

1. ¿Jaleʼ ti lej exbadh ku tamkun?

Jun i atikláb axi in dhuchaʼ jun i pejach kʼal an Biblia in uluw: «Neʼets ku puwenchij a Jehová ban tamkuntaláb» (Salmo 26:​12). Xowéʼ ta kʼicháj, an ólchixchik kʼal a Jehová jayej in lej kulbetnál ka tamkun. Tin puwél an tsabál, an ólchixchik kʼal a Jehová u támkunal semana ti semana abal kin kʼakʼnaʼ a Jehová, kin ájtinchij ani kin ólonchij. Junchikíl in tʼajál i tamkuntalábchik axi más pakdhaʼ.

2. ¿Jantʼoj neʼets ka exóbnaʼ ban tamkuntaláb?

Jawaʼ más u eyendháb ban tamkuntalábchik pel an Biblia, tanáʼ «u wilkʼáb lej alwaʼ jawaʼ in léʼ tu ku exóbchij» (ka ajiy Nehemías 8:8). Max tatáʼ kit kʼalej, neʼets ka exóbnaʼ más tin kwéntaj a Jehová ani jantʼiniʼ játs in ey. Tam ka tʼajaʼ ti kwéntaj abal a Jehová ti lej kʼanidhál neʼets ka léʼnaʼ ka jaʼúbnaʼ más, jayej neʼets ka exóbnaʼ jantʼiniʼ in éjtowal ti tólmiy a Jehová abal kit kʼwajiy kulbél (Isaías 48:​17, 18).

3. ¿Jantʼiniʼ neʼets ti tólmiy jitaʼchik u kʼalel ti tamkuntaláb?

A Jehová tu uchál abal lej exbadh «ki kulbédhanchij in ichích an epchalchik, ku tʼajaxin ti kwéntaj abal ku tolmíxin ani yab ki jilaʼ ku tamkun» (Hebreos 10:​24, 25). Ban tamkuntaláb, neʼets ka exlaʼ i atikláb axi chubax u kʼanidháx ani axi jayej in léʼ kin exlaʼ más tin kwéntaj a Dios. Neʼets ka tsuʼuw abal in kulbetnálchik kin ólnaʼ ti tamkuntaláb jawaʼ in exobnámal ban Biblia (ka ajiy Romanos 1:​11, 12). Jayej neʼets ka exlaʼ i atiklábchik axi in exlamal jantʼiniʼ kin támetnaʼ yan i kʼibataláb, talchik tomkidh ani kʼeʼatchik kwetém. Jaxtám, a Jehová in léʼ abal ku tamkun.

 ABAL KA EXÓBNAʼ MÁS

4. An tamkuntaláb axi in tʼajál an ólchixchik kʼal a Jehová

Ban kʼaʼál siglo, in aykolil a Jesús u támkunalakchik abal kin kʼakʼnaʼ a Jehová (Romanos 16:​3-5). Ka ajiychik Colosenses 3:​16 ani ka tsálpaychik kʼal axéʼ:

• ¿Jantʼiniʼ tu kʼakʼnabak a Jehová kʼal in aykolil a Jesús ti kʼaʼál siglo?

1. Ban tamkuntalábchik neʼets ka atsʼaʼ i tʼilomtaláb ani neʼets ka tsuʼuw i videos. Etsʼey u tujél ani u talél kʼal jun i oláb.

2. Al talchik i pejach ban tamkuntaláb, patal axi tamkudh in éjtowal kin dhayaʼ in kʼubak abal kin bínaʼ jun i tokʼtsixtaláb.

3.   Jitakits in éjtowal ka kʼalej ti tamkuntaláb: axi páynekits, axi tsákamej ani patal jitaʼ kin léʼnaʼ.

4. Yab u konoyáb i tumín. Yab jitaʼ kwaʼal kin jalbiy abal ka otsits.

5. Neʼets kin yéjenchij ka jolkʼaʼ i kʼij abal kit kʼalej ti tamkuntaláb

• ¿Jaleʼ ti lej exbadh ki ujnaʼ ku tamkun?

 JAWAʼ I EXOBNÁMAL

Max kit kʼalej ti tamkuntaláb neʼets ka exlaʼ más a Jehová, neʼets kit utey más kʼal Jajáʼ ani neʼets ka kʼakʼnaʼ kʼal kʼeʼat i atiklábchik.

Ki tʼilaʼ jawaʼ i exóbnaʼ

• ¿Jaleʼ tu konchal a Jehová ku tamkun?

• ¿Jantʼoj neʼets ka exóbnaʼ ban tamkuntaláb axi in tʼajál an ólchixchik kʼal a Jehová?

• ¿Jantʼoj tam alwataláb a tsálpayal abal neʼets ka batsʼuw max kit tamkun?