AJUMTALÁB 11
¿Jantʼoj a éjtowal ka tʼajaʼ abal an Biblia chubax ti tólmiy?
Walám junchikíl tam a kwaʼal yan i tʼojláb, it tujel tit tsalpax kom yab a exlál max neʼets ka ejtow ka tʼajaʼ patal. Pero walám a tʼajámal ti kwéntaj abal tam kit tujey ka tʼajaʼ ti wachik, a éjtowal ka tʼajaʼ más dhubat ani yab it lej tsekel. Max a tsalpayámal ka ajiy an Biblia walám jayetsej a atsʼámal. Yab a exlál jantʼiniʼ kit tujey. Axéʼ xi ajumtaláb neʼets ti tólmiy ka exlaʼ jantʼoj a éjtowal ka tʼajaʼ abal ka kulbétnaʼ ka ajiy an Biblia ani ka exóbnaʼ.
1. ¿Jaleʼ ti lej alwaʼ ki ajiy an Biblia chudhél chudhél?
An atiklábchik axi in ajchal in «káwintal a Dios», an Biblia, in atsʼálchik kulbél, ani in exlál jantʼiniʼ kin eyendhaʼ in éjatal (ka ajiy Salmo 1:1-3). Ka exaʼ ka jolkʼaʼ wéʼ i kʼij abal ka ajiy an Biblia chudhél chudhél. Neʼets ka tʼajaʼ ti kwéntaj abal kʼayúm kʼayúm neʼets ka kulbétnaʼ ka ajiy an Biblia.
2. ¿Jantʼoj a éjtowal ka tʼajaʼ abal jawaʼ a ajiyal ban Biblia chubax ti tólmiy?
Tam kʼwajat i ajiyal an Biblia, i yéjenchal ki wéʼ kubdhaʼ an ajumtaláb abal ki tsalpay kʼal jawaʼ kʼwajat i ajiyal. Yab expidh kwaʼal ki ajiy an Biblia, kwaʼal ki «lupudh tsalpay» kʼal jawaʼ in ulal (Josué 1:8). Tam ka ajiy, ka konowiy ta kwetémtal: «¿Jantʼoj tin exóbchal tin kwéntaj a Jehová jawaʼ kʼwajat u ajiyal? ¿Jantʼiniʼ u éjtowal ku eyendhaʼ tu ejatal? ¿Jantʼiniʼ u éjtowal ku eyendhaʼ abal ku tólmiy axi kʼeʼat?».
3. ¿Jantʼoj a éjtowal ka tʼajaʼ abal kit jolkʼan ka ajiy an Biblia?
¿A atsʼál tʼojláb ka jolkʼaʼ i kʼij abal ka ajiy an Biblia? Yab expidh tatáʼ a atsʼál antsanáʼ. Ka tsápnanchij «ka eyendhaʼ alwaʼ an kʼij axi a kwaʼal» (Efesios 5:16). A éjtowal ka takuy jawaʼ tam hora a léʼ ka ajiy an Biblia. Talchik in ajiyal tam ka tsʼakiy. Waʼats jitaʼchik in ajiyal tsʼejel kʼicháj, tam neʼets ti kʼapul. Ani kʼeʼatchik in ajiyal tam akal. Ani tatáʼ, ¿jawaʼ tam hora a tsálpayal abal a éjtowal ka ajiy an Biblia?
ABAL KA EXOBNAʼ MÁS
Ki tsuʼuw jantʼoj i éjtowalej ki tʼajaʼ abal ki kulbétnaʼ más ki ajiy an Biblia. Jayej neʼets ki exóbnaʼ jantʼiniʼ i éjtowal ku tʼojojon abal ki exbay más alwaʼ tam u exóbal kʼal axéʼ xi publicación.
Kʼayúm kʼayúm i éjtowal ki kulbétnaʼ jun i kʼapnél. Jayej, kʼayúm kʼayúm i éjtowal ki kulbétnaʼ ki ajiy an Biblia
4. Jawaʼ a éjtowal ka tʼajaʼ abal ka kulbétnaʼ ka ajiy an Biblia
Walám yab a lej kulbetnál ka ajiy an Biblia. Pero ka tsalpay abal pel jantʼiniʼ jun i kʼapnél axi yab jaykʼiʼ a lekámal. Max ka tujchij ka lékaʼ, kʼayúm kʼayúm neʼets ka kulbétnaʼ. Jayetsej neʼets ka watʼey kʼal an Biblia, max ka áynanchij ka ajiy, kʼayúm kʼayúm neʼets ka lej kulbétnaʼ. Ka ajiychik 1 Pedro 2:2 ani ka tsálpaychik kʼal axé:
-
¿A tsálpayal abal max ka áynanchij ka ajiy an Biblia neʼets ka lej kulbétnaʼ?
Ka tsuʼuwchik an VIDEO abal ka exlaʼ jantʼoj in tʼajaʼ talchik i tsakam abal kin kulbétnaʼ kin ajiy an Biblia. Talbél ka tʼilaʼchik jawaʼ a tsuʼuw:
-
¿Jantʼoj in atsʼálak tʼojláb an tsákamchik axi i tsuʼuw ban video?
-
¿Jantʼoj in tʼajaʼchik abal kin tsápnanchij kin ajiy an Biblia bélits abal wéʼ kʼibatak in atsʼál?
-
¿Kʼal jantʼoj ti tólmiyatchik abal kin kulbétnaʼ kin ajiy an Biblia?
Jawaʼ a éjtowal ka tʼajaʼ:
-
Ka eyendhaʼ jun i Biblia axi yab ka atsʼaʼ kʼibat ka éxbanchij. Max an Traducción del Nuevo Mundo kʼwajat ta káwintal, játs ka exaʼ ka eyendhaʼ.
-
A éjtowal kit tujey kʼal an pejach axi más a kulbetnál. Abal ka exlaʼ jantʼiniʼ ka tʼajaʼ, a éjtowal ka eyendhaʼ an tabla axi in bij «Jantʼiniʼ ka tujchij ka ajiy an Biblia».
-
Ka dhuchaʼ jawaʼ tam pejach a ajiyámalits. Ka eyendhaʼ an tabla axi in bij «Jawaʼ u ajiyámalits», axéʼ neʼets ka elaʼ al axéʼ xi publicación.
-
Ka eyendhaʼ an aplicación JW Library®. Max ka paʼbaʼ axéʼ xi aplicación ban teléfono, neʼets ka ejtow ka atsʼaʼ an Biblia o ka ajiy juʼtámakits kit xeʼtsin.
-
Ka eyendhaʼ an tolmixtaláb axi in chiʼdhál an Traducción del Nuevo Mundo. Neʼets ka elaʼ i mapas, i tablas ani jun i glosario axi neʼets ti tólmiy abal ka kulbetnaʼ ka ajiy más an Biblia.
5. Kit tʼojojon okʼxidh kit pidhan an exobintaláb
Ka ajiychik Salmo 119:34 ani ka tsálpaychik kʼal axéʼ:
-
¿Jaleʼ ti lej exbadh kit oláts tam neʼets ka ajiy an Biblia o tit exóbal?
¿Jantʼoj a éjtowal ka tʼajaʼ abal ka exbay más jawaʼ a exobnál? Tam kit tʼojojon abal an exobintaláb, ka tsápnanchij ka tʼajaʼ axéʼ:
-
Ka ajiy an párrafos axi kʼwajat tin tujtal an ajumtaláb.
-
Ka aliy patal an textos, ka ajiy ani ka tsápnanchij ka exbay jaleʼ ti kʼwajat tanáʼ.
-
Ka kiloy an kaw axi a tsálpayal abal játs an tokʼtsixtaláb. Axéʼ neʼets ti lej tólmiy abal tam kit exobláts.
¿A exlalak?
An ólchixchik kʼal a Jehová i eyendhámal kʼeʼat i biblias, pero axi más i kulbetnál ki eyendhaʼ játs an Traducción del Nuevo Mundo kom yab in kwaʼal i kaw axi kʼibat ani in chiʼdhál in bij a Dios (ka tsuʼuw axéʼ xi artículo axi ti jw.org: «¿In tsʼejkámal an ólchixchik kʼal a Jehová jun i Biblia expidh abal jajáʼchik?».
JAWAʼ TALCHIK IN TSÁLPAYAL: «Yab in jólkʼanal ku exóbnaʼ an Biblia, ani yab u lej léʼ».
-
Ani tatáʼ, ¿jantʼoj a tsálpayal?
JAWAʼ I EXOBNÁMAL
Abal ka exbay alwaʼ jawaʼ in ulal an Biblia ani ti tólmiy, ka tsalpay al jawaʼ tam hora a éjtowal ka ajiy, ka konchij a Dios ti tólmiy ani kit tʼojojon abal an exobintaláb.
Ki tʼilaʼ jawaʼ i exóbnaʼ
-
¿Jantʼoj kwaʼal ka tʼajaʼ abal chubax ti tólmiy jawaʼ in ulal an Biblia?
-
¿Jawaʼ tam hora a tsálpayal abal a éjtowal ka takuy abal ka ajiy an Biblia ani ka exóbnaʼ ta kwetémtal?
-
¿Jaleʼ ti lej exbadh kit tʼojojon okʼxidh kit exobláts?
KA EXÓBNAʼ JANTʼOJ ÍT
Ka tsab tʼilaʼ talchik i tsalap axi in éjtowal ti tólmiy abal ka exbay jawaʼ in ulal an Biblia.
«Neʼets ka lej kʼijídhnaʼ ka ajiy an Biblia» (La Atalaya, núm. 1 2017)
Ka exóbnaʼ ox i tsalap abal jantʼiniʼ a éjtowal ka ajiy an Biblia.
Ka tsuʼuw jantʼoj a éjtowal ka tʼajaʼ abal ka kulbétnaʼ ka ajiy an Biblia.
Ka tsuʼuw kʼal jantʼoj ti tolmiyámej talchik i atikláb axi owatits in ajiyal an Biblia.
Jawaʼ i éjtowal ki tʼajaʼ abal ki exóbnaʼ an Biblia ani ki exbay (2:06)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
