AJUMTALÁB 34
¿Jantʼiniʼ i éjtowal ki tejwamédhaʼ abal i kʼanidhál a Jehová?
¿A atsʼál abal it kʼwajat más utat kʼal a Jehová ma tit tújenek tit exóbal? ¿A léʼ kit utey más kʼal Jajáʼ? Max a Jehová in tsuʼtal abal kʼwajat a tsápnanchal kiy utey kʼal Jajáʼ, neʼets ti kʼanidhaʼ más ani neʼets ti lej béletnaʼ. Tam, ¿jantʼiniʼ a éjtowal ka tejwamédhaʼ abal a kʼanidhál?
1. ¿Jantʼiniʼ neʼets ki tejwamédhaʼ abal i kʼanidhál a Jehová?
I tejwamedhál abal i kʼanidhál, tam ki belkaʼ (ka ajiy 1 Juan 5:3). A Jehová yab in nixoknál nibal jitaʼ abal ka belkáj. In léʼ abal wawáʼ ki takuy max neʼets ki belkaʼ o max imbáj. ¿Jaleʼ? Kom a Jehová in léʼ «ki belkaʼ kʼal jun putat i ichích» (Romanos 6:17). A Jehová in léʼ ka belkaʼ, pero yab kʼal i tsapláb, in léʼ abal ka belkaʼ kom a kʼanidhál. An pejach ox ani tseʼ in kʼál axéʼ xi libro neʼets ti tólmiy ka tʼajaʼ tsab jantʼoj kʼal axi neʼets ka tejwamédhaʼ abal a kʼanidhál a Jehová: ka tʼajaʼ jawaʼ Jajáʼ in kulbetnál ani ka jilaʼ ka tʼajaʼ jawaʼ yab in kulbetnál.
2. ¿Jaleʼ ti neʼets ki atsʼaʼ kʼibat ki tejwamédhanchij a Jehová abal i kʼanidhál?
«Jitaʼchik in tʼajál jawaʼ tekedh, in tametnál yan i kʼibataláb» (Salmo 34:19). Patal i atsʼál tʼojláb ki tʼajaʼ jawaʼ tekedh, kom etsʼey u ukʼpinal. Pero jayej i tametnál kʼeʼat i kʼibataláb, ejtíl tam yab i kwaʼal i tumín o tam u tʼajchinal jantʼoj axi yab tekedh. Tam i watʼal jun i kʼibataláb, neʼets ki atsʼaʼ más tʼojláb ki tʼajaʼ jawaʼ a Jehová tu konchal. Neʼets ki atsʼaʼ más kʼibat ki belkaʼ. Pero, tam tatáʼ ka tsápnanchij ka belkaʼ a Jehová, kʼwajat a tejwamédhanchal abal chubax a lej kʼanidhál. Antsanáʼ kʼwajat a tejwamédhanchal abal etsʼey neʼets ka putuw kʼal jawaʼ Jajáʼ ti konchal. Ani tam, Jajáʼ jayetsej neʼets kin tʼajaʼ, yab jaykʼiʼ neʼets ti jilaʼ (ka ajiy Salmo 4:3).
ABAL KA EXÓBNAʼ MÁS
Ki exóbnaʼ jaleʼ ti lej exbadh ki belkaʼ a Jehová, ani jantʼoj neʼets tu ku tólmiy abal etsʼey ki putuw kʼal jawaʼ tu konchal.
3. Jun i kaw axi jayej tatáʼ ti odhnál
An libro in kʼál a Job in olnál jun i kaw axi in uluw a Satanás abal kin odhnaʼ a Job, pero axéʼ xi kaw jayej pel abal patal jitaʼ in léʼ kin tʼojonchij a Jehová. Ka ajiychik Job 1:1 ani 1:6-2:10 ani ka tsálpaychik kʼal axéʼ:
-
¿Jaleʼ tin uluw a Satanás, abal a Job in belkalak a Jehová? (Ka exóbnaʼchik Job 1:9-11).
-
¿Jantʼoj in ulal a Satanás tin kwéntaj tatáʼ ani patal an atikláb? (Ka exóbnaʼchik Job 2:4).
Ka ajiychik Job 27:5b ani ka tsálpaychik kʼal axéʼ:
-
¿Jantʼiniʼ in tejwamédhaʼ a Job abal chubax in kʼanidhálak a Jehová?
A Job in tejwamédhaʼ abal in kʼanidhál a Jehová, kom kʼwajiy putudh kʼal Jajáʼ.
Max wawáʼ ku kʼwajiy putudh kʼal a Jehová, i tejwamedhál abal i kʼanidhál.
4. Ka tʼajaʼ abal a Jehová ka kulbéj in ichích
Ka ajiychik Proverbios 27:11 ani ka tsálpaychik kʼal axéʼ:
-
¿Jantʼiniʼ in atsʼál a Jehová tam ki belkaʼ ani ki takuy ki tʼajaʼ jawaʼ tekedh? ¿Jaleʼ?
5. Tatáʼ a éjtowal kit kʼwajiy putudh kʼal a Jehová
Kom i lej kʼanidhál a Jehová, i léʼ ki tʼilchij axi kʼeʼat tin kwéntaj Jajáʼ. Ani kom i léʼ ku kʼwajiy putudh kʼal Jajáʼ, i tʼajál bélits max kʼibat i atsʼál. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿A atsʼál kʼibat ka tʼilchij axi kʼeʼat tin kwéntaj a Jehová?
-
¿Jantʼoj in tʼajaʼ a Grayson abal yabáts ka lej jikʼey?
Max i kulbetnál ki tʼajaʼ jawaʼ tekedh ani i pojkál jawaʼ kidháb, yab neʼets ki atsʼaʼ lej kʼibat ku kʼwajiy putudh kʼal a Jehová. Ka ajiychik Salmo 97:10 ani ka tsálpaychik kʼal axéʼ:
-
¿Jantʼoj a exobnámal abal játs axi in kulbetnál a Jehová? ¿Ani jantʼoj yab in kulbetnál?
-
¿Jantʼoj neʼets ti tólmiy ka áynanchij ka tʼajaʼ jawaʼ tekedh ani ka pojkaʼ jawaʼ kidháb?
6. Ki belkaʼ a Jehová tu lej tólmiyal
Jawaʼ más tekedh játs etsʼey ki belkaʼ a Jehová. Ka ajiychik Isaías 48:17, 18 ani ka tsálpaychik kʼal axéʼ:
-
¿A tsálpayal abal a Jehová chubax in exlál jantʼoj játs axi más alwaʼ abal wawáʼ? ¿Jaleʼ ta tsálpayal antsanáʼ?
-
¿Jantʼoj tam alwataláb a batsʼumal kom a exobnámal an Biblia ani a exlámal más a Jehová, an Dios axi chubax?
JAWAʼ TALCHIK IN TSÁLPAYAL: «A Dios yab in tʼajál ti kwéntaj jawaʼ nanáʼ u tʼajál».
-
¿Jantʼoj tam texto axi ti Biblia a éjtowal ka eyendhaʼ abal ka tejwamédhaʼ abal i éjtowal ki kulbédhaʼ a Jehová o ki yajbédhanchij in ichích?
JAWAʼ I EXOBNÁMAL
Tatáʼ a tejwamedhál abal a kʼanidhál a Jehová tam ka belkaʼ ani tam ka tʼajaʼ jawaʼ ti konchal, bélits max a tametnál jun i kʼibataláb.
Ki tʼilaʼ jawaʼ i exóbnaʼ
-
¿Jantʼoj a exobnál kʼal jawaʼ in watʼaʼ a Job?
-
¿Jantʼiniʼ neʼets ka tejwamédhaʼ abal a kʼanidhál a Jehová?
-
¿Jantʼoj neʼets ti tólmiy abal kit kʼwajiy putudh kʼal a Jehová?
KA EXÓBNAʼ JANTʼOJ ÍT
Ka exóbnaʼ jantʼiniʼ a éjtowal kit kʼwajiy putudh kʼal a Jehová ani kʼal an epchalchik axi ti tamkuntaláb.
«Tatáʼ yab jaykʼiʼ neʼets ka jilaʼ jitaʼchik in tʼajál jawaʼ tekedh» (16:49)
Ka exóbna jantʼoj in uluw a Satanás abal kin jolbiy a Job.
«A Job u kʼwajíl putudh kʼal a Jehová» (La Biblia y su mensaje, sección 6)
Ka tʼajaʼ ti kwéntaj abal ma an tsákamchik in éjtowal kin tejwamédhaʼ abal in kʼanidhál a Jehová.
¿Jantʼiniʼ in éjtowal an tsákamchik ka kʼwajiy putudh kʼal a Jehová bélits max u nixoknáb kin tʼajaʼ jawaʼ kidháb?