AJUMTALÁB 37
Jawaʼ in ulal an Biblia tin kwéntaj an tʼojláb ani an tumín
¿A atsʼámal jun a kʼicháj it tʼeʼpidh, kom yab a kwaʼal i tʼojláb ani i tumín? Walám kʼibat a atsʼál ka koʼoy jawaʼ a yéjenchal ani ka tʼojonchij a Jehová. Pero an Biblia, tu ólchal jantʼoj ki tʼajaʼ abal yab ki atsʼaʼ antsanáʼ.
1. ¿Jantʼoj in ulal an Biblia tin kwéntaj an tʼojláb?
A Dios in léʼ abal ki kʼijídhnaʼ an tʼojláb. Ma an Biblia in ulal «abal lej alwaʼ abal an atiklábchik [...] kin kulbétnaʼ in tʼojlábil» (Eclesiastés 2:24). A Jehová etsʼey kʼwajat ti tʼojnal. Tam ki nitsʼbiy a Jehová ani ku tʼojon tsapik, u kulbél wawáʼ ani jayej a Jehová.
Lej exbadh ku tʼojon pero an tʼojláb yab kwaʼal kin tʼajaʼ abal ki jilaʼ ki tʼojonchij a Jehová jantʼiniʼ tin tomnál (Juan 6:27). A Jehová tu uchámal abal max ki tsápnanchij ki tʼojonchij, Jajáʼ neʼets tu ku pidhaʼ jawaʼ i yéjenchal.
2. ¿Jay in exbádh kwaʼal ki pidhaʼ an tumín?
An Biblia in ulal abal «an tumín tu tólmiyal», pero jayej in ulal abal yab játs axi neʼets kin tʼajaʼ abal ku kʼwajiy kulbél (Eclesiastés 7:12). Jaxtám an Biblia tu uchál abal yab in tomnál ki kʼanidhaʼ an tumín. Jayej tu uchál axéʼ xi kaw: «Ka neʼdhaʼ kulbél a ichích kʼal jawákits a kwaʼal» (ka ajiy Hebreos 13:5). Max u kulbél kʼal jawaʼ i kwaʼal, yab neʼets ku xeʼtsin tu tsalpopól abal i léʼ ki koʼoy más. Jayej, yab neʼets ku alkʼidh tokʼlin (Proverbios 22:7). Jayej yab neʼets ki léʼnaʼ ku ubatʼin abal ki ataʼ i tumín.
3. ¿Jantʼiniʼ ki eyendhaʼ an tumín abal ki tólmiy axi kʼeʼat?
A Jehová in binál kʼal in kulbétal jawaʼ in kwaʼal ani wawáʼ i nítsʼbiyal tam i tʼajchal «i alwataláb» axi kʼeʼat ani i tʼajál tu «tsʼejwalix» kʼal jawaʼ i kwaʼal (1 Timoteo 6:18). I eyendhál alwaʼ i tumínal tam i binál i donaciones ti tamkuntaláb ani tam i tólmiyal an epchalchik. A Jehová yab in tʼajál ti kwéntaj jay i binál, jawaʼ in tʼajál ti kwéntaj játs, jaleʼ ti binál. Max ki bínaʼ kʼal i kulbétal jawaʼ i kwaʼal, neʼets ki atsʼál u kulbél ani jayej neʼets ki kulbédhaʼ a Jehová (ka ajiy Hechos 20:35).
ABAL KA EXÓBNAʼ MÁS
Ki tsuʼuw jantʼoj tam lablixtaláb neʼets ki batsʼuw, max yab ki lej watʼkʼanchij tu tʼojnal abal ki ataʼ i tumín ani ku kʼwajiy kulbél kʼal jawaʼ i kwaʼal.
4. Ka tʼajaʼ jun i alwaʼ tʼojláb abal ka puwénchij a Jehová
In exbádh axi ki pidhaʼ i tʼojlábil, neʼets kin tejwamédhaʼ max u kʼwajat utat kʼal a Jehová. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼoj játs axi más a kulbetnál kʼal jawaʼ in tʼajál tin tʼojlábil a Jason?
-
¿Jantʼoj in tʼajaʼ abal yab ka lej tíxkʼanchat i kʼij kʼal in tʼojlábil?
Ka ajiychik Colosenses 3:23, 24 ani ka tsálpaychik kʼal axéʼ:
-
¿Jaleʼ ti lej exbadh ku tʼojon «kʼal patal i kanát»?
Lej exbadh ku tʼojon, pero yab in tomnál ki jilaʼ abal tu ku tíxkʼanchij an kʼij axi i eyendhál abal ki tʼojonchij a Jehová.
5. An alwataláb axi i bátsʼuwal max ku kulbéj kʼal jawaʼ i kwaʼal
Yan i atikláb u lej tʼojnal abal kin tamkuy i tumín, pero an Biblia tu uchál jantʼoj in tomnál ki tʼajaʼ. Ka ajiychik 1 Timoteo 6:6-8 ani ka tsálpaychik kʼal axéʼ:
-
¿Jantʼoj tu exóbchal an Biblia?
I éjtowal ku kʼwajiy kulbél, bélits max yab i kwaʼal yan jantʼoj. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jaleʼ tin atsʼál kulbél axéʼchik xi yaneláb, bélits abal yab in lej kwaʼalchik i tumín?
¿Jantʼoj neʼets ka watʼey max i kwaʼalits ani i leyej más i tumín? A Jesús in eyendhaʼ jun i tʼiplab abal kin tejwamédhaʼ abal lej kʼakʼadh ki léʼnaʼ más. Ka ajiychik Lucas 12:15-21 ani ka tsálpaychik kʼal axéʼ:
-
¿Jantʼoj a exobnál kʼal an tʼiplab axi in punuw a Jesús? (Ka exóbnaʼchik an versículo 15).
Ka ajiychik Proverbios 10:22 ani 1 Timoteo 6:10. Talbél ka tsálpaychik kʼal axéʼ:
-
¿Jantʼoj a tsálpayal abal más alwaʼ: ki tʼajaʼ ti jaʼúb a Jehová o ki koʼoy yan i tumín? ¿Jaleʼ?
-
¿Jantʼoj awil ka watʼey max ki lej léʼnaʼ an tumín?
6. A Jehová neʼets tu ku pidhaʼ jawaʼ i yéjenchal
Tam yab i kwaʼal i tʼojláb ani yab i kwaʼal i tumín, i éjtowal ki tejwamédhaʼ max chubax i belál kʼal a Jehová. Ka tsuʼuwchik an VIDEO abal ka exlaʼchik jantʼiniʼ ka tamétnaʼ jun i kʼibataláb ejtíl axéʼ, talbél ka tʼilaʼchik jawaʼ a tsuʼuw:
-
¿Jantʼoj tam kʼibataláb in koʼoy an epchal axi i tsuʼuw ban video?
-
¿Jantʼiniʼ tin jekʼaʼ an epchal an kʼibataláb?
Ka ajiychik Mateo 6:25-34 ani ka tsálpaychik kʼal axéʼ:
-
¿Jantʼoj in ulúmal a Jehová abal neʼets kin pidhaʼ kʼal jitaʼchik in tsápnanchal ka tʼojonchat?
JAWAʼ TALCHIK IN TSÁLPAYAL: «Kwaʼal kin lej tʼojon abal ku béletnaʼ u yanél. Jaxtám yab u éjtowal kin kʼalej ti tamkuntaláb etsʼey».
-
¿Jawaʼ tam texto axi ti Biblia ti tolmiyámal abal ka tʼajaʼ ti kwéntaj, abal ka tʼojonchij a Jehová játs axi más alwaʼ?
JAWAʼ I EXOBNÁMAL
I yéjenchal ku tʼojon ani ki aliy an tumín, pero yab kwaʼal kin tʼajaʼ abal ki jilaʼ ki tʼojonchij a Jehová.
Ki tʼilaʼ jawaʼ i exóbnaʼ
-
¿Jantʼoj neʼets ti tólmiy abal yab ka lej watʼkʼanchij tit tʼojnal?
-
¿Jantʼoj tam alwataláb neʼets ka batsʼuw max kit kʼwajiy kulbél kʼal jawaʼ a kwaʼal?
-
Max a Jehová in ulúmal abal neʼets kin pidhaʼ in tʼojnálil jawaʼ in yéjenchal, ¿jantʼiniʼ a tejwamedhál tatáʼ abal a belál kʼal jawaʼ in ulúmal?
KA EXÓBNAʼ JANTʼOJ ÍT
Ka exlaʼ max an Biblia in ulal abal yab alwaʼ ki koʼoy i tumín.
«¿Walám játs an tumín axi in tʼajál abal ka waʼtsin patal an kʼibataláb?» (Artículo axi ti jw.org)
Ka exlaʼ jantʼiniʼ in kulbetnál a Jehová ki eyendhaʼ i tumínal.
«¿Jantʼoj in ulal an Biblia abal i éjtowal ki tʼajaʼ kʼal jawaʼ i kwaʼal?» (Artículo axi ti jw.org)
¿Walám kidháb ku ubatʼin abal ki ataʼ i tumín?
Ka tsuʼuw jantʼiniʼ in jalkʼuy in ejatal jun i inik, axi u ubatʼak abal kin ataʼ i tumín ani u kweʼak.
«U kulbetnálak ku jalbiy abal ku tsuʼuw ka adhláts an bichim» (La Atalaya, 1 de noviembre de 2011)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
