AJUMTALÁB 38
Ki kʼakʼnaʼ an ejataláb kom pel jun i tsʼejwalixtaláb
Ti ejatal i watʼál yan jantʼoj kʼijidh. Bélits max i watʼál i kʼibataláb, waʼats yan jantʼoj axi tu kulbédhanchal i ejatal. ¿Jantʼiniʼ i éjtowal ki tejwamédhanchij a Jehová abal i kʼakʼnanchal an ejataláb? ¿Ani jaleʼ ti lej exbadh ki kʼakʼnanchij?
1. ¿Jaleʼ ti kwaʼal ki kʼakʼnaʼ an ejataláb?
Kwaʼal ki kʼakʼnaʼ kom pel jun i tsʼejwalixtaláb axi a Jehová tu pidhámal. An «ejataláb tal kʼal a Jehová», kom Jajáyej in tsʼejkámal patal jawaʼ in kwaʼal i ejataláb (Salmo 36:9). «Jajáʼ játs axi tu pidhál i ejataláb ani i ixakʼ ani patal jawaʼ i kwaʼal» (Hechos 17:25, 28). Tam, a Jehová játs axi tu pidhál patal jawaʼ i yéjenchal abal ku kʼwajiy ejat. Pero jayej tu pidhál yan jantʼoj abal ki atsʼaʼ kʼijidh tu kʼwajíl (ka ajiy Hechos 14:17).
2. ¿Jantʼiniʼ i tejwamédhanchal a Jehová abal i kʼakʼnál an ejataláb?
A Jehová ti tʼajaʼ ti kwéntaj ma tam ta tujchij tit púwel tin chúkul a mamá. Al jun i oláb, a David in uchaʼ a Jehová axéʼ: «Tatáʼ Dios, tin tsuʼuw tam ti nanáʼ yabayej in wáʼtsinal, tam tin kʼwajatakej tin tsʼejkanal» (Salmo 139:16). Tatáʼ a kwaʼal yan a jalbíl abal a Jehová (ka ajiy Mateo 10:29-31). A Jehová neʼets kin lej yajnaʼ, max jun i atikláb kin tíxkʼaʼ in ejatal o max kin tíxkʼanchij in ejatal kʼeʼat i atikláb (Éxodo 20:13). a Jayej neʼets kin lej yajnaʼ max ki ódhnachikiy i ejatal o max yab ki tólmiy axi kʼeʼat abal kin béletnaʼ in ejatal. Max ki béletnaʼ i ejatal ani in kʼál axi kʼeʼat, i tejwamedhál abal i kʼakʼnál an ejataláb.
ABAL KA EXÓBNAʼ MÁS
Ki tsuʼuw jantʼoj i éjtowal ki tʼajaʼ abal ki tejwamédhaʼ abal i kʼakʼnál an ejataláb.
3. Ka béletnaʼ a ejatal
An atiklábchik axi in pidhámal in ejatal a Jehová abal kin tʼójonchij, in tsápnanchal kin béletnaʼ in ejatal. Kwaʼalchik kin béletnaʼ in ejatal, kom pel ejtíl jun i tsʼakchixtaláb axi in pidhámal a Jehová. Ka ajiychik Romanos 12:1, 2 ani ka tsálpaychik kʼal axéʼ:
-
¿Jaleʼ ti kwaʼal ka béletnaʼ a ejatal?
-
¿Jantʼiniʼ a éjtowal ka béletnaʼ a ejatal?
4. Etsʼey ka tʼajaʼ ti kwéntaj abal yab kit tsʼojbéj ani yab ka tsʼojbédhaʼ axi kʼeʼat
An Biblia in ulal abal ki tʼajaʼ ti kwéntaj jantʼiniʼ u xéʼtsinal, abal yab ku tsʼojbéj. Ka tsuʼuwchik an VIDEO ani ka tsuʼuwchik jantʼoj a éjtowal ka tʼajaʼ abal yab kit tsʼojbéj.
Ka ajiychik Proverbios 22:3 ani ka tsálpaychik jantʼiniʼ i éjtowal ki béletnaʼ i ejatal ani in ejatal axi kʼeʼat, tam...
-
... u kʼwajat ti kʼimáʼ.
-
... u kʼwajat ban tʼojláb.
-
... u adhíl o tam u xeʼets tu ubátʼ.
-
... u neʼets tu beldhom o tam u neʼdháb al jun i carro.
5. Yab ki ódhnaʼ an tʼeleʼ axi yabayej u waʼtsinal
A David in uluw i kaw axi lej kʼijidh abal kin tejwamédhaʼ jantʼoj in tsálpayal a Jehová kʼal an tʼeleʼchik axi kʼwajatej tin chúkul in mim. Ka ajiychik Salmo 139:13-17 ani ka tsálpaychik kʼal axéʼ:
-
¿Jaykʼiʼ u tujél kin tʼajaʼ ti kwéntaj a Jehová in ejatal jun i atikláb? ¿Tam ka waʼtsin, o tam in mamá ka jílkʼon koʼodh?
A Jehová in pidhaʼ i abatnaxtaláb an bichow Israel, abal ka lej tʼajan ti kwéntaj an uxum axi koʼodh. Ka ajiychik Éxodo 21:22, 23 ani ka tsálpaychik kʼal axéʼ:
-
¿Jantʼiniʼ tin tsuʼtalak a Jehová tam ka jídhkʼowat jun i tʼeleʼ bélits abal yab tʼajchíl?
-
¿Jantʼiniʼ neʼets kin atsʼaʼ a Jehová max tʼajchíl ka jídhkʼowat jun i tʼeleʼ? b
-
Tatáʼ, ¿jantʼoj a ulal kʼal jawaʼ in tsálpayal a Jehová?
Ma jun i mimláb axi in pidhál in jalbíl an ejataláb, in éjtowal kin tsalpay kin jídhkʼow an tʼeleʼ. Ka ajiychik Isaías 41:10 ani ka tsálpaychik kʼal axéʼ:
-
Max jun i mimláb u nixoknáb abal kin jídhkʼow an tʼeleʼ, ¿jitaʼ in tomnál kin konchij abal ka tólmiyat? ¿Jaleʼ?
JAWAʼ TALCHIK IN TSÁLPAYAL: «An mimláb játs axi kwaʼal kin takuy max neʼets kin koʼoy an tʼeleʼ, o max neʼets kin jídhkʼow. Jajáʼ in éjtowal kin tʼajaʼ jawaʼ kin léʼnaʼ kʼal in ejatal».
-
¿Jaleʼ ta lej belál abal a Jehová in pidhál yan in jalbíl an mimláb ani an tʼeleʼ axi in neʼdhál tin chúkul?
JAWAʼ I EXOBNÁMAL
Pel a Jehová axi tu tsʼejwaliyámal kʼal i ejatal. An Biblia tu exóbchal abal kwaʼal ki kʼakʼnaʼ ani ki béletnaʼ i ejatal ani jayej in ejatal axi kʼeʼat.
Ki tʼilaʼ jawaʼ i exóbnaʼ
-
¿Jaleʼ ti exlál abal a Jehová in lej pidhál in jalbíl an ejataláb?
-
¿Jantʼiniʼ in atsʼál a Jehová tam jun i atikláb kin tixkʼaʼ tʼajchíl in ejatal o kin tíxkʼanchij in ejatal kʼeʼat i atikláb?
-
¿Jantʼoj játs axi más a kulbetnál tin kwéntaj an ejataláb?
KA EXÓBNAʼ JANTʼOJ ÍT
¿Jantʼiniʼ i éjtowal ki kʼakʼnanchij a Jehová kom tu pidhámal i ejatal?
An ejataláb pel jun i alabél tsʼejwalixtaláb (ajatláb 141) (2:41)
¿In éjtowal a Dios kin pákwlanchij jun i mimláb axi ti biyál in jídhkʼow an tʼeleʼ?
«¿Jantʼoj in ulal an Biblia tin kwéntaj an aborto?» (Artículo axi ti jw.org)
Max ki exlaʼ jantʼoj in tsálpayal a Jehová tin kwéntaj an ejataláb, neʼets ki exlaʼ jantʼiniʼ ku kʼijidhbéj.
¿Jantʼoj tam tólmixtaláb in binál an Biblia max jun i atikláb in tsalpayámal kin tíxkʼaʼ in ejatal?
a A Jehová in léʼ kin tólmiy jitaʼchik in kwaʼal lej yajlidh in ichích (Salmo 34:18). Jajáʼ in éxbayal jaleʼ ti yan i atikláb in atsʼál lej tʼeʼpidh ani ma in tsalpayámalchik kin tíxkʼaʼ in ejatal. Ani in léʼ kin tólmiy jitaʼchik in atsʼál antsanáʼ. Abal ka tsuʼuw jantʼiniʼ tu tólmiyal an kaw axi kʼwajat ti Biblia, ka ajiy axéʼ xi artículo «¿In éjtowal ti kin tólmiy an Biblia max u tsalpayámal ku tíxkʼaʼ u ejatal?», axéʼ jayej neʼets ka elaʼ ban pejach «Ka exóbnaʼ jantʼoj ít», axi kʼwajat al axéʼ xi ajumtaláb.
b Max ti biyál jun i atikláb in jídhkʼow an tʼeleʼ, in éjtowal kin lej belaʼ abal neʼets ka pákwlanchat kʼal a Jehová. Neʼets ki exóbnaʼ más tin kwéntaj axéʼ, ban artículo «¿Jantʼoj in ulal an Biblia tin kwéntaj an aborto?», axéʼ jayej neʼets ka elaʼ ban pejach «Ka exóbnaʼ jantʼoj ít» axi kʼwajat al axéʼ xi ajumtaláb.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
