AJUMTALÁB 41
¿Jantʼiniʼ tin ulal an Biblia abal yab tekedh ki eyendhaʼ i iniktal?
Yan i atikláb u tidhebél ka kawin tin kwéntaj i iniktal. Pero an Biblia yab tu tidhebedhál, ani jawaʼ tu ólchal lej tajax. Jayej tu lej tólmiyal. A Jehová játs axi tu tsʼejkaʼ, jaxtám in éjtowal tu ku exóbchij jantʼoj játs axi más alwaʼ abal wawáʼ. Jajáʼ tu exóbchal jantʼiniʼ ki eyendhaʼ i ejatal abal ki kulbédhaʼ ani jantʼoj i éjtowal ki tʼajaʼ abal ku kʼwajiy kulbél abal etsʼey.
1. ¿Jantʼoj in tsálpayal a Jehová tin kwéntaj an sexo?
Axéʼ pel jun i tsʼejwalixtaláb axi a Jehová tu pidhámal. A Jehová in léʼ abal expidh jun i uxum ani jun i inik axi tómkidh, ka kwátsiychik junax. Antsanáʼ in éjtowalchik kin koʼoy i tsakam ani jayej pel abal ka kʼijidhbéj tin tsablóm. Jaxtám an Biblia in ulal: «Tómkidh inik, kit kʼijidhbéj kʼal a kʼimádhil» (Proverbios 5:18, 19). A Jehová yab in léʼ abal jun i inik axi tómkidh kin kʼibchij in kʼimádhil, jaxtám yab in tomnál ka kʼambíxin (ka ajiy Hebreos 13:4).
2. ¿Jantʼiniʼ ti yab in tomnál ki eyendhaʼ i iniktal?
An Biblia in ulal abal an atikláb axi yab «in eyendhál tekedh in iniktal [...] yab neʼets ka lábliyat kʼal in Eyaltal a Dios» (1 Corintios 6:9, 10). An dhúchumchik kʼal an Biblia in eyendhaʼ an kaw ti griego pornéia, abal kin uluw jantʼoj játs axi yab in tomnál ki tʼajaʼ kʼal i iniktal. Axéʼ xi kaw in bájuwal ox jantʼoj, 1) tam tsab i atikláb axi yab tómkidh u kwatsíl junax, a 2) tam jun i inik u kwatsíl kʼal in at inik ani 3) tam jun i atikláb u kwatsíl kʼal jun i koʼnél. Neʼets ki batsʼuw yan i alwataláb ani neʼets ki kulbédhaʼ a Jehová, max yab ki tʼajaʼ axéʼchik xi kidháb tʼajbiláb (1 Tesalonicenses 4:3).
ABAL KA EXÓBNAʼ MÁS
Ki tsuʼuw jantʼoj neʼets ti tólmiy abal yab ka tʼajaʼ jun i kidháb tʼajbiláb, jayej ka tsuʼuw jantʼoj tam alwataláb neʼets ka batsʼuw max ka tsápnanchij ka koʼoy tʼokat a ejatal.
3. Yab kit kwatsiy kʼal jitaʼ axi yab a tomkíl
Jun i inik axi ti biyál, axi in bij José, in tsápnanchij kin koʼoy tʼokat in ejatal. Ka ajiychik Génesis 39:1-12 ani ka tsálpaychik kʼal axéʼ:
-
¿Jaleʼ ti adhláts a José? (Ka exóbnaʼchik an versículo 9).
-
¿Walám tekedh jawaʼ in tʼajaʼ a José? ¿Jaleʼ?
¿Jantʼiniʼ in éjtowal an tsákamchik kin nítsʼbiy a José ani yab kin tʼajaʼ jun i kidháb tʼajbiláb? Ka tsuʼuwchik an VIDEO.
A Jehová in léʼ abal ki pojkaʼ axéʼchik xi kidháb tʼajbiláb. Ka ajiychik 1 Corintios 6:18 ani ka tsálpaychik kʼal axéʼ:
-
¿Jantʼoj in éjtowal kin tʼajaʼ abal jun i atikláb ka atáj kʼal jun i kidháb tʼajbiláb?
-
¿Jantʼoj a éjtowal ka tʼajaʼ abal yab ti ataʼ jun i kidháb tʼajbiláb, ejtíl axéʼ?
4. Tatáʼ a éjtowal ka ataʼ jun i kidháb leʼnomtaláb
¿Jantʼoj in éjtowal kin tʼajaʼ abal ki atsʼaʼ kʼibat ki ataʼ jun i kidháb leʼnomtaláb? Ka tsuʼuwchik an VIDEO ani ka tʼilaʼchik jawaʼ a tsuʼuw.
-
¿Jantʼoj in tʼajaʼ an epchal tam tin tʼajaʼ ti kwéntaj abal in éjtowalak kin kʼambiy in kʼimádhil?
Jitaʼchik biyálits in tʼojonchal a Jehová, kwaʼal kin tsápnanchij abal yab kin koʼoy i kidháb tsalap. ¿Jantʼoj a éjtowal ka tʼajaʼ abal ka kaldhaʼ ta ókʼ jun i kidháb tsalap? Ka ajiychik Filipenses 4:8 ani ka tsálpaychik kʼal axéʼ:
-
¿Jantʼoj játs axi in tomnál ki koʼoy ti tsalapil?
-
¿A tsálpayal abal max ki ajiy an Biblia ani ki tsápnanchij ki tʼojonchij más a Jehová, neʼets ki ejtow ki ataʼ jun i kidháb leʼnomtaláb? ¿Jaleʼ?
5. An abatnaxtaláb axi a Jehová tu pidhál tu tólmiyal
A Jehová in exlál jantʼoj játs axi más alwaʼ abal wawaʼ. Jaxtám tu exóbchal jantʼiniʼ ki koʼoy tʼokat i ejatal ani jantʼoj tam alwataláb i bátsʼuwal. Ka ajiychik Proverbios 7:7-27 ani ka tsuʼuwchik an VIDEO ani ka tʼilaʼchik jawaʼ a tsuʼuw.
-
¿Jaleʼ ti wálbin axéʼ xi kwitól? (Ka tsuʼuwchik Proverbios 7:8, 9).
-
Proverbios 7:23, 26, in tejwamedhál abal max jun kin tʼajaʼ jun i kidháb tʼajbiláb, neʼets kin lej yajchiknaʼ. ¿Jantʼoj tam alwataláb neʼets ki batsʼuw max ki tsápnanchij ki koʼoy tʼokat i ejatal?
-
¿Jantʼiniʼ neʼets tu ku tólmiy abal ku kʼwajiy kulbél, max ki koʼoy tʼokat i ejatal?
Waʼats axi in tsálpayal abal an Biblia yab in tomnál tu ku kʼanchij, ku kwatsiy kʼal i at inik o kʼal i at uxum. Pero a Jehová tu lej kʼanidhál ani in léʼ abal ku kʼwajiy abal etsʼey. Jaxtám in tomnál ki lej belkaʼ jawaʼ tu konchal ki tʼajaʼ. Ka ajiychik 1 Corintios 6:9-11 ani ka tsálpaychik kʼal axéʼ:
-
A Jehová yab in kulbetnál abal jun i atikláb ka kwatsiy kʼal in at inik o kʼal in at uxum. Pero, ¿walám játs expidh nixéʼ xi tʼajbiláb axi in pojkál a Jehová?
Patal kwaʼal ki jalkʼuy jantʼiniʼ i ey, max i léʼ ki kulbédhaʼ a Jehová. ¿Walám alwaʼak max ki tsápnanchij? Ka ajiychik Salmo 19:8, 11 ani ka tsálpaychik kʼal axéʼ:
-
¿A tsálpayal abal tékedhits jawaʼ a Jehová tu konchal ki tʼajaʼ? ¿Jaleʼ ta tsálpayal antsanáʼ?
A Jehová in tolmiyámal yan i atikláb abal kin alwamédhaʼ in ejatal ani jayej in éjtowal ti tólmiy tatáʼ.
JAWAʼ TALCHIK IN TSÁLPAYAL: «Yab kidháb abal tsab i atikláb axi u kʼanidháx ka kwátsiychik junax».
-
¿Jantʼoj neʼets ka tókʼtsiy?
JAWAʼ I EXOBNÁMAL
A Jehová in léʼ abal expidh jun i inik ani jun i uxum axi tómkidh ka kwátsiychik junax. Axéʼ pel jun i tsʼejwalixtaláb axi pidhnénekchik kʼal a Jehová.
Ki tʼilaʼ jawaʼ i exóbnaʼ
-
¿Jantʼiniʼ ti yab in tomnál ki eyendhaʼ i iniktal?
-
¿Jantʼoj neʼets tu ku tólmiy abal yab ki tʼajaʼ i kidháb tʼajbiláb kʼal i iniktal?
-
¿Jantʼoj tam alwataláb neʼets ki batsʼuw max ki belkaʼ jawaʼ a Jehová tu konchal ki tʼajaʼ?
KA EXÓBNAʼ JANTʼOJ ÍT
Ka exóbnaʼ jaleʼ ti a Jehová in konchal an inik ani an uxum axi in léʼ ka kʼwajiy junax, ka tómkin.
Ki exóbnaʼ abal an Biblia yab tu exóbchal ki pojkaʼ an atikláb axi u kwatsíl kʼal in at inik o in at uxum.
Jawaʼ tu exóbchal an Biblia tu tólmiyal abal yab ki tʼajaʼ jawaʼ yan i atikláb in tʼajál xowéʼ ta kʼicháj kʼal in iniktal.
Ka exóbnaʼ jantʼiniʼ jun i inik, axi in kulbetnálak in at inik, in jalkʼuy in ejatal abal kin kulbédhaʼ a Dios. Ka ajiy an biografía «Yab in pojkáj».
«Tólmiyatchik kʼal an Biblia abal kin jalkʼuy in ejatal» (La Atalaya, 1 de abril de 2011)
a Talchik kʼal axéʼ xi kidháb tʼajbiláb pel an penetración, an sexo oral o anal ani ki ubátʼnanchij in iniktal kʼeʼat i atikláb.