AJUMTALÁB 44
¿Jantʼoj in tsálpayal a Jehová tin kwéntaj an ajib?
A Jehová yab tu kʼanchal ku kʼijidhbéj ani ki tʼajaʼ i ajib tam junchikíl. Pero, ¿walám in bátsʼuwal patal an ajib axi u tʼajnal? ¿Jantʼiniʼ i éjtowal ki tejwamédhanchij abal i kʼanidhál ani abal i tʼajál ti kwéntaj jawaʼ in tsálpayal?
1. ¿Jaleʼ ti waʼats yan i ajib axi a Jehová yab in kulbetnál?
Walám neʼets ka jikʼpaʼ ka exlaʼ abal yan i ajib axi u tʼajnal, u kalel kʼal i exobchixtaláb axi yab tekedh, axi yab kʼwajat ti Biblia. Kʼeʼat i ajib kalnek kʼal an kʼakʼnaxtaláb axi yab chubax. Jayej waʼats i ajib axi u tʼajnal abal ka kʼakʼnáj an tsemélom. Waʼats jayej jitaʼchik in tʼajál i ajib abal yab kin watʼaʼ jantʼoj kidháb ani kin konoy i alwataláb (Isaías 65:11). Jaxtám a Jehová in uchál axéʼ in tʼojnálil: «Kit tíxkʼanchik kʼal axi yab alwaʼ, ma ni wéʼ yab ka tákaʼchik jawaʼ atʼax» (2 Corintios 6:17). a
2. ¿In kulbetnál a Jehová an ajibchik axi in puwénchal i atikláb?
A Jehová tu uchál abal lej kʼakʼadh ki «puwénchij i atiklábchik» (ka ajiy Jeremías 17:5). Talchik i ajib u tʼajnal abal ka puwénchat i eyal o i atiklábchik axi in tolmiyámal in bichówil. Waʼats jayej i ajib axi u tʼajnal abal ka kʼakʼnáj an bandera o abal ka puwénchat jun i bichow axi in ataʼ kʼeʼat (1 Juan 5:21). Talchik i ajib jayej u tʼajnal abal ka tólmiyat jun i eyal o jun i tsalap axi jajáʼchik in kwaʼal. ¿Jantʼoj walám neʼets kin atsʼaʼ a Jehová max ki puwénchij jun i atikláb o jun i tsalap axi in kwaʼal jun i eyal?
3. ¿Jantʼoj játs axi yab in tomnál ka tʼajan al jun i ajib?
An Biblia in ulal abal yab tekedh ki tʼajaʼ i ajib juʼtáj tu tʼajnal i «kʼidháb leʼnomtaláb» ani juʼtáj tu tʼajnal abal ku lej «utsʼalin» (1 Pedro 4:3). Al yan i ajib, an atiklábchik yabáts u tsálpanal ani in tʼajál yan jantʼoj axi lej tidhetál. Max i léʼ ki jaʼúbnaʼ a Jehová, yab in tomnál ki tʼajaʼ nixéʼchik xi kidháb tʼajbiláb.
ABAL KA EXÓBNAʼ MÁS
Ki tsuʼuw jantʼoj i éjtowal ki tʼajaʼ tam ku kániyat al jun i ajib ani jayej ki exóbnaʼ jantʼiniʼ ki kulbédhaʼ a Jehová.
4. Yab ka tʼajaʼ i ajib axi a Jehová yab in kulbetnál
Ka ajiychik Efesios 5:10 ani ka tsálpaychik kʼal axéʼ:
-
¿Jantʼoj kwaʼal ki lej tʼajaʼ ti kwéntaj okʼxidh ki takuy max neʼets ku kʼalej al jun i ajib?
-
¿Jantʼoj tam ajib u tʼajnal juʼtáj tatáʼ it kʼwajíl?
-
¿Jantʼoj a tsálpayal? ¿Walám in kulbetnál a Jehová?
Jun i tʼiplab, ¿jantʼoj walám in tsálpayal a Jehová tin kwéntaj an cumpleaños? An Biblia yab in olnál max in tʼojnálil a Dios in tʼajálakchik i cumpleaños. Pero in olnál tsab i cumpleaños axi in tʼajaʼchik i atikláb axi yab in kʼakʼnál a Jehová. Ka ajiychik Génesis 40:20-22 ani Mateo 14:6-10. Talbél ka tsálpaychik kʼal axéʼ:
-
¿Jantʼoj watʼey al axéʼ xi tsab i cumpleaños?
-
Kʼal jawaʼ a ajiy, ¿jantʼoj walám in tsálpayal a Jehová tin kwéntaj an cumpleaños?
Pero walám tatáʼ ka tsalpay, «¿walám ka tʼeʼpin a Jehová max ku tʼajaʼ jun i cumpleaños o kin kʼalej al jun i ajib, axi an Biblia in ulal abal yab alwaʼ?». Ka ajiychik Exódo 32:1-8. Talbél, ka tsuʼuwchik an VIDEO ani ka tʼilaʼchik jawaʼ a tsuʼuw.
-
¿Jaleʼ ti kwaʼal ki lej tʼajaʼ ti kwéntaj jantʼoj in kulbetnál a Jehová?
-
¿Jantʼiniʼ i éjtowal ki exlaʼ jantʼoj in kulbetnál a Jehová?
¿Jantʼiniʼ i éjtowal ki exlaʼ max a Dios in kulbetnál jun i ajib?
-
¿Kaldhach kʼal jun i exobchixtaláb axi yab kʼwajat ti Biblia? Ka tʼajaʼ ti kwéntaj juʼtáj ti kalnek nixéʼ xi ajib.
-
¿Pel abal ka puwénchat jun i atikláb, jun i bichow o kʼeʼat jantʼoj? Wawáʼ expidh i puwénchal a Jehová ani i lej belál abal Jajáʼ, játs axi neʼets kin tsʼejkaʼ patal an kʼibataláb axi waʼats.
-
¿Neʼets ka tʼajan jantʼoj axi an Biblia in ulal abal yab alwaʼ? Yab kwaʼal ki lukliy i ejatal kʼal jun i tʼajbiláb axi kidháb.
5. Ka tólmiy axi kʼeʼatchik abal kin exlaʼ jawaʼ a belál
Walám neʼets ki atsʼaʼ kʼibat ki uchaʼ axi kʼeʼat, abal yab neʼets ku kʼalej kʼal jun i ajib axi a Jehová yab in kulbetnál. Tam ka ólchij jun i atikláb jawaʼ a belál, ka tʼajaʼ kʼal i kʼayaʼtaláb ani i kʼakʼnaxtaláb. Abal ka exlaʼ jantʼoj in tʼajaʼ jun i atikláb axi in watʼaʼ antsanáʼ, ka tsuʼuwchik an VIDEO.
Ka ajiychik Mateo 7:12 ani ka tsálpaychik kʼal axéʼ:
-
Kʼal jawaʼ i ajiy ban versículo, ¿in tomnál ka uchaʼ jun a yanél abal yabáts kin tʼajaʼ jun i ajib?
-
Bélits abal yab it júnkunal kʼal a yanél abal ka tʼajaʼ i ajib, ¿jantʼiniʼ a éjtowal ka tejwamédhanchij abal a kʼanidhál?
6. A Jehová in léʼ abal ku kʼwajiy kulbél
A Jehová in léʼ abal ku kʼijidhbéj kʼal i yanél ani kʼal i jaʼúbchik. Ka ajiychik Eclesiastés 8:15 ani ka tsálpaychik kʼal axéʼ:
-
¿Jantʼiniʼ in tejwamedhál axéʼ xi versículo abal a Jehová in léʼ abal ku kʼwajiy kulbél?
A Jehová in léʼ abal in tʼojnálil ka támkun ani ka kʼijidhbéj. Ka tsuʼuwchik an VIDEO ani ka tʼajaʼ ti kwéntaj abal játs jawaʼ in tʼajálchik ban pakdhaʼ tamkuntaláb.
Ka ajiychik Gálatas 6:10 ani ka tsálpaychik kʼal axéʼ:
-
¿Walám wawáʼ jayej i yéjenchal ki tʼajaʼ yan i ajib abal ki tólmiy axi kʼeʼat?
-
¿Jantʼoj a kulbetnal tatáʼ, ka bínaʼ i tsʼejwalixtaláb kom it nixoknáb o kom tatáʼ a léʼ ka tʼajaʼ?
-
Talchik i ólchix kʼal a Jehová, in tʼajal i ajib ani in pidhálchik i tsʼejwalixtaláb in tsakámil. Max tatáʼ a kwaʼal i tsakam, ¿jantʼoj a éjtowal ka tʼajaʼ abal ka kʼijidhbéj?
JAWAʼ TALCHIK IN TSÁLPAYAL: «Yab ki tʼajaʼ ti kwéntaj max yab alwaʼ an ajib, jawaʼ más exbadh pel ku kʼijidhbéj ani ku kʼwajiy kʼal i jaʼúb ani i yanél».
-
¿Jantʼoj neʼets ka tókʼtsiy?
JAWAʼ I EXOBNÁMAL
A Jehová in léʼ abal ku kʼijidhbéj kʼal i yanél ani i jaʼúb, pero Jajáʼ yab in léʼ ki tʼajaʼ i ajib axi yab in kulbetnál.
Ki tʼilaʼ jawaʼ i exóbnaʼ
-
¿Jantʼoj kwaʼal ki konowiy ti baʼ abal ki exlaʼ max a Jehová in kulbetnál jun i ajib?
-
¿Jantʼiniʼ i éjtowal ki tólmiy i yanél ani i jaʼúb, abal kin exbay jaleʼ ti yab i tʼajál jun i ajib?
-
¿Jaleʼ i lej belál abal a Jehová in léʼ abal ku kʼijidhbéj ani ku kʼwajiy kulbél?
KA EXÓBNAʼ JANTʼOJ ÍT
Ka tsuʼuw talchik i ajib axi an ólchixchik kʼal a Jehová yab in tʼajál.
«¿Jaleʼ ti an ólchixchik kʼal a Jehová yab in tʼajál talchik i ajib?» (Artículo axi ti jw.org)
Ka tsuʼuw tseʼ i tsalap jaleʼ an ólchixchik kʼal a Jehová yab in tʼajál an cumpleaños.
«¿Jaleʼ ti an ólchixchik kʼal a Jehová yab in tʼajál an cumpleaños?» (Artículo axi ti jw.org)
Ka tsuʼuw jantʼoj in tʼajaʼ jun i kwitól tam ti kʼwajatak ti telnal kʼal in at juntal ti escuela, kom yab in tʼajál an navidad.
An ólchixchik kʼal a Jehová yab in tʼajál an navidad, ¿walám in atsʼálchik kulbél kom yab in tʼajál?
«In elaʼchik jantʼoj axi más kʼijidh» (La Atalaya, 1 de diciembre de 2012)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
