AJUMTALÁB 15
¿Jitaʼ játs a Jesús?
A Jesús pel jitaʼ axi lej exladh tin puwél an Tsabál. Pero yan i atikláb expidh in éxlanchal in bij, yabchik in exlál más tin kwéntaj in ejatal a Jesús. ¿Jantʼoj tu exóbchal an Biblia tin kwéntaj a Jesús?
1. ¿Jitaʼ játs a Jesús?
A Jesús pel jun i espíritu axi u kʼwajíl ti éb ani in kwaʼal yan i tsapláb. Játs axi kʼaʼál tsʼejkáj kʼal a Jehová. An Biblia in ulal abal in éy a Jesús játs axi más «púlik kʼal patal in tsʼejkábil a Dios» (Colosenses 1:15). Jayej in ulal abal a Jesús pel «in lej junkats Tsakámil» a Dios, ani játs kom a Jehová in kwetém tsʼejkaʼ a Jesús (Juan 3:16). A Jesús in tólmiy a Jehová abal kin tsʼejkaʼ patal jawaʼ waʼats (ka ajiy Proverbios 8:30). Ani ma xowéʼ bélej u tʼojnalchik junax. A Jesús u bijiyáb «ti Kaw», kom játs axi u eyendháb kʼal a Jehová abal kin bínaʼ i olchixtaláb (Juan 1:14).
2. ¿Jaleʼ ti aban a Jesús tejéʼ ti Tsabál?
In tʼajál watʼadh 2.000 i támub, a Jehová in tʼajaʼ jun i labidh tʼajbiláb: in watʼbaʼ in ejatal a Jesús tin chúkul a María abal ka waʼtsin jantʼiniʼ jun i tʼeleʼ, bélits abal a Jesús pelak jun i ángel axi lej watʼadh tsapik. Antsanáʼ, a Jesús in ejtow ka waʼtsin jantʼiniʼ jun i atikláb tejéʼ ti Tsabál (ka ajiy Lucas 1:34, 35). Jajáʼ chich tejéʼ ti Tsabál abal kin putuw jun i tʼojláb axi bijchin kʼal a Jehová ani abal tu ku kʼaniy, jaxtám u bijiyáb Mesías o takudh. a A Jesús in putuw patal an kʼej kaw axi u kaw tin kwéntaj an Mesías. Antsanáʼ an atiklábchik neʼetsak kin exlaʼ abal a Jesús pel «an Cristo, in Tsakámil a Dios» (Mateo 16:16).
3. ¿Juʼtáj ti kʼwajat a Jesús xowéʼ?
A Jesús tsemets ani talbél edháj kʼal a Jehová jantʼiniʼ jun i espíritu abal ka wichiy ti éb. Tam ti a Jesús wichiy ti éb, pidhan kʼal a Jehová yan in éy. In éy a Jesús játs axi «más tʼekʼat axi waʼats» (Filipenses 2:9). Xowéʼ a Jesús in kwaʼal lej púlik in éy tiwaʼ ti éb, expidh yab in éjtowal kin watʼenchij in éy a Jehová.
ABAL KA EXÓBNAʼ MÁS
Ki exóbnaʼ más tin kwéntaj a Jesús abal ki exlaʼ jitaʼ lej chubax játs jajáʼ, ani jaleʼ ti lej exbadh ki exlaʼ.
4. A Jesús yab pel a Dios
Bélits abal a Jesús in kwaʼal lej púlik in éy tiwaʼ ti éb, an Biblia in ulal abal in belkál a Jehová. A Jesús in exlál abal játs in Tátaj ani an Dios axi chubax. ¿Jaleʼ ti belál abal játs antsanáʼ? Ka tsuʼuwchik an VIDEO abal ka exlaʼ jantʼoj in ulal an Biblia tin kwéntaj a Jesús, ani jaleʼ ti yab junat in éy kʼal a Jehová.
Axéʼ xi textos neʼets tu ku tólmiy ki exbay jaleʼ ti a Jesús yab in báwchal in éy a Jehová. Ka ajiy ti junchik an texto ani ka tsálpaychik kʼal axéʼ:
Ka ajiychik Lucas 1:30-32.
-
Kʼal jawaʼ in uluw an ángel, ¿jitaʼ játs a Jesús?
Ka ajiychik Mateo 3:16, 17.
-
Tam ti pujan a Jesús, ¿jantʼoj tam kaw atsʼatbéj ma ti éb?
-
¿Jitaʼ a tsálpayal abal játs axi kawin?
Ka ajiychik Juan 14:28.
-
¿Jitaʼ in kwaʼal más in éy: jun i tataláb o in tsakámil?
-
¿Jaleʼ ti a Jesús in bijiy «Tátaj» a Jehová?
Ka ajiychik Juan 12:49.
-
¿In tsálpayalak a Jesús abal jajáʼ ani a Jehová jayetsej? ¿Jantʼoj a tsálpayal tatáʼ?
5. A Jesús játsak an Mesías o takudh
Ti Biblia i elál yan i kʼej kaw axi neʼetsak kin tólmiy an atiklábchik kin exlaʼ jitaʼ játs an takudh axi aban kʼal a Dios abal tu ku kʼaniy. Ka tsuʼuwchik an VIDEO, tanáʼ neʼets ka tsuʼuw talchik i kʼej kaw axi in putuw a Jesús tam ti kʼwajiy tejéʼ ti Tsabál.
Ka ajiychik talchik i kʼej kaw axi ti Biblia ani ka tsálpaychik kʼal axéʼ:
Ka ajiychik Miqueas 5:2 abal ka exlaʼ juʼtáj ti neʼetsak ka waʼtsin an Mesías. b
-
¿Putun axéʼ xi kʼej kaw tam ti waʼtsin a Jesús? (Mateo 2:1).
Ka ajiychik Salmo 34:20 ani Zacarías 12:10 abal ka tsuʼuwchik talchik i kʼej kaw axi neʼetsak ka putun tam ka tsemets a Jesús.
-
¿Putun axéʼchik xi kʼej kaw? (Juan 19:33-37).
-
¿Walám in tʼajaʼ jantʼoj a Jesús abal ka putun axéʼ xi kʼej kaw kʼal jajáʼ?
-
¿Jantʼoj ti exóbchal tin kwéntaj a Jesús?
6. I éjtowal ki batsʼuw i alwataláb max ki exlaʼ tin kwéntaj a Jesús
An Biblia in ulal abal lej exbadh ki exóbnaʼ tin kwéntaj a Jesús ani ki exlaʼ jawaʼ tam tʼojláb pidhnének kʼal a Jehová. Ka ajiychik Juan 14:6 ani 17:3, ani ka tsálpaychik kʼal axéʼ:
-
¿Jaleʼ ti yéjenchal ki exlaʼ tin kwéntaj a Jesús?
A Jesús tu japchij jun i bel abal ki ejtow ki bajuw ti jaʼúb a Dios. Tu exóbchij an chubaxtaláb tin kwéntaj a Jehová. Ani kom in bínaʼ in ejatal, i éjtowal ki koʼoy i ejataláb abal etsʼey.
JAWAʼ TALCHIK IN TSÁLPAYAL: «An ólchixchik kʼal a Jehová yab in belál kʼal a Jesucristo».
-
¿Jantʼoj neʼets ka tókʼtsiy max kit uchan antsanáʼ?
JAWAʼ I EXOBNÁMAL
A Jesús pel jun i espíritu, pel in tsakámil a Dios ani játs an Mesías.
Ki tʼilaʼ jawaʼ i exóbnaʼ
-
¿Jaleʼ tin ulal an Biblia abal a Jesús játs axi más púlik in éy kʼal patal jawaʼ in tsʼejkámal a Dios?
-
¿Jawaʼ játsak in tʼojlábil a Jesús okʼxidh ka chich tejéʼ Tsabál?
-
¿Jaleʼ i belál abal a Jesús játs an Mesías o takudh?
KA EXÓBNAʼ JANTʼOJ ÍT
Ka exóbnaʼ kʼeʼat jantʼoj axi in tejwamedhál abal a Jesús játs an Mesías.
«¿Chubax in tejwamedhál an Biblia abal a Jesús pel an Mesías?» (Artículo axi ti jw.org)
Ka tsuʼuw jaleʼ an Biblia in ulal abal a Jehová pel in Tátaj a Jesús.
«¿Jaleʼ in ulal an Biblia abal a Jesús pel in tsakámil a Dios?» (Artículo axi ti jw.org)
Ka exóbnaʼ abal an Biblia yab in olnál tin kwéntaj an trinidad.
Ka exlaʼ jantʼiniʼ tin jalkʼuy in éjatal jun i mimláb tam ti in exlaʼ jawaʼ in ulal an Biblia tin kwéntaj a Jesús.
«Jun i judía tu ólchal jaleʼ tin jalkʼuy jawaʼ in belálak» (¡Despertad!, mayo de 2013)
a Ban ajumtaláb 26 ani 27 neʼets ki exóbnaʼ jaleʼ ti yéjenchalak abal a Jesús tu ku kʼaniy ani jantʼiniʼ tin tʼajaʼ.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
