AJUMTALÁB 16
¿Jantʼoj in tʼajaʼ a Jesús tam ti xeʼtsin tejéʼ ti Tsabál?
Yan i atikláb expidh in tʼilál a Jesús jantʼiniʼ jun i tʼeleʼ, jun i kawlómej o jun i inik axi kʼwajat ti tsemel. Pero max ki exóbnaʼ más jawaʼ in tʼajaʼ a Jesús tam ti xeʼtsin tejéʼ ti Tsabál, neʼets ki alwaʼ exlaʼ, ¿yab aníts? Al axéʼ xi ajumtaláb neʼets ki exóbnaʼ i tʼajbilábchik axi más exbadh in tʼajaʼ a Jesús ani jantʼoj i éjtowal ki exóbnaʼ kʼal jawaʼ in tʼajaʼ.
1. ¿Jawaʼ játsak an tʼojláb axi más exbadh abal a Jesús?
Abal a Jesús lej éxbadhak kin ólchij an atiklábchik «an alwaʼ kaw tin kwéntaj in Eyaltal a Dios» (ka ajiy Lucas 4:43). In ólnaʼ abal in Eyaltal a Dios játs axi neʼets kin tixkʼaʼ patal an kʼibataláb axi in tametnál an atiklábchik. a Al ox i támub kʼal tsʼejel, a Jesús in tʼajaʼ axéʼ xi tʼojláb (Mateo 9:35).
2. ¿Jaleʼ tin tʼajaʼ a Jesús i labidh tʼajbiláb?
An Biblia in ulal abal a Jesús eyendháj kʼal a Dios abal kin tʼajaʼ «i jikʼpadh labidh tʼajbiláb» (Hechos 2:22). Kʼal an tsapláb axi pidhan kʼal a Dios, a Jesús in ejtow kin koydhaʼ i ikʼlom, kin pijchiy yan i atikláb, kin jeldhaʼ i yaʼul ani kin edhaʼ talchik i tsemélom (Mateo 8:23-27; 14:15-21; Marcos 6:56; Lucas 7:11-17). Jawaʼ in tʼajaʼ a Jesús in tejwamédhaʼ abal tákuyat kʼal a Dios abal kin putuw jun i exbadh tʼojláb. Jayej in tejwamédhaʼ abal a Jehová in kwaʼal an tsapláb abal kin tixkʼaʼ patal an kʼibataláb.
3. ¿Jantʼoj i exobnál kʼal jawaʼ in tʼajálak a Jesús?
A Jesús etsʼey in belkaʼ a Jehová (ka ajiy Juan 8:29). In áynanchij putudh kʼal a Jehová bélits abal yan i atikláb in exaʼ kin tʼajaʼ abal yab kin putuw kʼal jawaʼ uchbiyámej kin tʼajaʼ. Axéʼ in tejwamédhaʼ abal i éjtowal ki áynanchij ki tʼojonchij a Jehová bélits max ki támetnaʼ i kʼibataláb. Jayej, a Jesús «in punchij an tʼiplab in aykolil abal kin nitsʼbiy jawaʼ jajáʼ in yajchiknaʼ» (1 Pedro 2:21).
ABAL KA EXÓBNAʼ MÁS
Ki exóbnaʼ jantʼiniʼ a Jesús in putuw kʼal in tʼojlábil ani in tʼajaʼ i labidh tʼajbiláb.
4. A Jesús in ólnaʼ i alwaʼ kaw
A Jesús beláts lej owél abal kin ólchij an atiklábchik an alwaʼ kaw. Ka ajiychik Lucas 8:1 ani ka tsálpaychik kʼal axéʼ:
-
¿Walám in áychalak ka kʼalej ti aliyáb abal kin ólchij an alwaʼ kaw?
-
¿Jantʼoj koʼoy kin tʼajaʼ a Jesús abal kin ólnaʼ an alwaʼ kaw?
A Dios in uluw abal an Mesías neʼetsak kin ólnaʼ i alwaʼ kaw tam ka ulits. Ka ajiychik Isaías 61:1, 2 ani ka tsálpaychik kʼal axéʼ:
-
¿Jantʼiniʼ tin putuw a Jesús axéʼ xi kʼej kaw?
-
Jantʼoj a tsálpayal, ¿walám an atiklábchik in yéjenchal xowéʼ kin exlaʼ axéʼ xi alwaʼ kaw?
5. A Jesús in ólnaʼ yan i alwaʼ exobchixtaláb
A Jesús olnomáts tin kwéntaj in Eyaltal a Dios, pero jayej in ólnaʼ yan i alwaʼ exobchixtaláb abal an atikláb kin eyendhaʼ tin ejatal. Ki tsuʼuw talchik kʼal axéʼ xi exobchixtaláb axi in ólnaʼ ban Sermón del Monte. Ka ajiychik Mateo 6:14, 34 ani 7:12, ani ka tsálpaychik kʼal axéʼ:
-
¿Jawaʼ játs an alwaʼ exobchixtaláb axi in ólnaʼ a Jesús al axéʼ xi versículos?
-
Jantʼoj a tsálpayal, ¿walám axéʼchik xi exobchixtaláb belej in éjtowal tu ku tólmiy?
6. A Jesús in tʼajaʼ i labidh tʼajbiláb
A Jesús pidhan i tsapláb kʼal a Jehová abal kin tʼajaʼ i labidh tʼajbiláb. Abal ka tsuʼuwchik jun i tʼiplab, ka ajiychik Marcos 5:25-34 o ka tsuʼuwchik an VIDEO. Talbél ka tsálpaychik kʼal axéʼ:
-
¿Jantʼoj in lej belálak an mimláb axi u yaʼulak?
-
¿Jantʼoj játs axi más a kulbétnaʼ kʼal an labidh tʼajbiláb axi in tʼajaʼ a Jesús?
Ka ajiychik Juan 5:36 ani ka tsálpaychik kʼal axéʼ:
-
¿Jantʼoj tu tejwamédhanchal an labidh tʼajbiláb axi in tʼajaʼ a Jesús?
¿A exlalak?
Yan kʼal jawaʼ i exlál tin kwéntaj a Jesús kʼwajat al tseʼ i libros axi ti Biblia axi u bijiyáb ti Evangelios. A Mateo, a Marcos, a Lucas ani a Juan játs axi in dhuchaʼchik axéʼ xi Evangelios. Jajáʼchik in tʼilaʼ yan jantʼoj axi in tʼajaʼ a Jesús tam ti xeʼtsin tejéʼ ti Tsabál. Patal jawaʼ jajáʼchik in dhuchaʼ lej junat ani tu tejwamédhanchal jawaʼ in tʼajaʼ a Jesús.
-
A MATEO
in dhuchaʼ an kʼaʼál Evangelio axi in olnál tin kwéntaj a Jesús. Jajáʼ in dhuchaʼ yan i exobchixtaláb axi in bínaʼ a Jesús. Ejtíl, in dhuchaʼ abal a Jesús in lej ólnaʼ tin kwéntaj in Eyaltal a Dios.
-
A MARCOS
in dhuchaʼ an Evangelio axi más jamat. In punchij yan in kanat ani antsanáʼ tu tejwamél kʼal jawaʼ in dhuchaʼ.
-
A LUCAS
in dhuchaʼ abal a Jesús in lej pidhálak in jalbíl an oláb ani in lej tʼajálak ti kwéntaj an mimlábchik.
-
A JUAN
tu lej tejwamédhanchal jantʼiniʼ játsak in ey a Jesús, kom in dhuchaʼ jantʼiniʼ u tʼilomak kʼal in jaʼúbchik ani kʼal kʼeʼat i atikláb.
JAWAʼ TALCHIK IN TSÁLPAYAL: «A Jesús pelak jun i inik ejtíl wawáʼ».
-
¿Jantʼoj a tsálpayal tatáʼ?
JAWAʼ I EXOBNÁMAL
A Jesús in ólnaʼ tin kwéntaj in Eyaltal a Dios, in tʼajaʼ i labidh tʼajbiláb ani etsʼey in belkaʼ a Jehová.
Ki tʼilaʼ jawaʼ i exóbnaʼ
-
¿Jawaʼ játsak an tʼojláb axi más exbadh abal a Jesús tam ti kʼwajiy ban Tsabál?
-
¿Jantʼoj tu exóbchal an labidh tʼajbiláb axi in tʼajaʼ a Jesús?
-
¿Jantʼoj tam exbadh exobchixtaláb in bínaʼ a Jesús?
KA EXÓBNAʼ JANTʼOJ ÍT
¿Jawaʼ játsak an exobchixtaláb axi más exbadh, axi in olnalak a Jesús?
«¿Jaleʼ ti lej exbadh abal a Jesús in Eyaltal a Dios?» (La Atalaya, 1 de octubre de 2014)
Ka exóbnaʼ jaleʼ ti lej belál abal a Jesús chubax in tʼajaʼ i labidh tʼajbiláb.
Ki ajiy jantʼiniʼ ti jalkʼun in ejatal jun i inik tam ti in ejtiy abal a Jesús yab expidh in tsálpayalak tin kwetémtal.
«Expidh u tsálpayalak kʼal nanáʼ» (La Atalaya, 1 de octubre de 2014)
Ka tsuʼuw jantʼiniʼ ti kʼalej ti watʼel jawaʼ a Jesús in tʼajaʼ.
a Ban ajumtaláb 31 ma ti 33 neʼets ki exóbnaʼ más tin kwéntaj in Eyaltal a Dios.