AJUMTALÁB 17
¿Jantʼiniʼ játs in ey a Jesús?
Tam ki exóbnaʼ jawaʼ in tʼajaʼ ani in uluw a Jesús tam ti kʼwajiy tejéʼ ti Tsabál, u utel más kʼal jajáʼ ani kʼal a Jehová. ¿Jantʼiniʼ játsak in ey a Jesús, ani jantʼoj i éjtowal ki tʼajaʼ abal ki nitsʼbiy?
1. ¿Jaleʼ ti a Jesús lej ejtílits jantʼiniʼ a Jehová?
A Jesús kʼwajinek miles de millones i támub kʼal a Jehová, jaxtám tin lej exobnámal tin kwéntaj Jajáʼ. A Jesús u tsalpax ejtíl a Jehová, ani in nítsʼbiyal jawaʼ a Jehová in tʼajál (ka ajiy Juan 5:19). A Jesús in nitsʼbiy lej alwaʼ in Tátaj, jaxtám ma in uluw: «Jitats tin tsuʼchal u wal, [pel ejtíl max] in tsuʼchal jayej in wal u Tátaj ti éb» (Juan 14:9). Tam, max tatáʼ ka exlaʼ a Jesús, jayej neʼets ka exlaʼ a Jehová. Jun i tʼiplab, an yajnanchixtaláb axi a Jesús in koʼonchal an atikláb in tejwamedhál abal a Jehová jayétsej in atsʼál abal kʼal tatáʼ.
2. ¿Jantʼiniʼ in tejwamédhaʼ a Jesús abal in kʼanidhál in Tátaj?
A Jesús in uluw: «Expidh u tʼajál jawaʼ tin abatnál u Tátaj ti éb ku tʼajaʼ, antsanáʼ in tsoʼobnál axi yab bélomchik abal lej chubax u kʼanidhál u Tátaj ti éb» (Juan 14:31). Tam ti a Jesús kʼwajiy tejé ti Tsabál, in tejwamédhaʼ abal in kʼanidhál a Jehová, kom etsʼey in belkaʼ bélits abal junchikíl lej kʼibatak. A Jesús in lej kulbetnálak kin ólchij an atiklábchik tin kwéntaj a Jehová ani kin tólmiychik abal ka utey kʼal Jajáʼ (Juan 14:23).
3. ¿Jantʼiniʼ in tejwamedhál a Jesús abal tu kʼanidhál?
An Biblia in ulal abal a Jesús in atsʼál «jun i púlik kʼanidhomtaláb abal an atiklábchik» (Proverbios 8:31). In tejwamédhaʼ kom etsʼey in tólmiy an atiklábchik ani yab jaykʼiʼ in aychij abal ka kʼakʼnanchat. Kʼal an labidh tʼajbiláb axi in tʼajaʼ yab expidh in tejwamédhaʼ abal in kwaʼal i tsapláb, jayej in tejwamédhaʼ abal in yájnanchal an atiklábchik (Marcos 1:40-42). In tsuʼtalak jununúl an atiklábchik ani in kʼanidhálak. Tam in tʼilmayalak an atiklábchik, pelak abal kin kanatbédhaʼ ani kin ólchij tin kwéntaj an aychixtaláb. Jaxtám in jilaʼ ka odhnáj ani ma in bínaʼ in ejatal abal tu ku kʼaniy. Pero in atsʼál jun i púlik kʼanidhomtaláb kʼal patal jitaʼ in belkál an exobchixtaláb axi in bínaʼ (ka ajiy Juan 15:13, 14).
ABAL KA EXÓBNAʼ MÁS
Ki exóbnaʼ jantʼiniʼ játs in ey a Jesús ani jantʼiniʼ i éjtowal ki tʼajaʼ tu kʼanidhom ani tu alwaʼ inik ejtíl jajáʼ.
4. A Jesús in kʼanidhál in Tátaj
A Jesús tu exóbchij kʼal in tʼiplabil jantʼiniʼ ti éjtowal ki tejwamédhanchij a Jehová abal i kʼanidhál. Ka ajiychik Lucas 6:12 ani jayej Juan 15:10 ani 17:26. Ka ajiychik an texto ti junchik ani talbél ka tsálpaychik kʼal axéʼ:
-
Antsanáʼ jantʼiniʼ a Jesús, ¿jantʼiniʼ i éjtowal ki tejwamédhanchij a Jehová abal i kʼanidhál?
A Jesús in lej ólonchalak in Tátaj, kom in lej kʼanidhálak.
5. A Jesús in tʼajál ti kwéntaj jitaʼ in yéjenchal ka tólmiyat
Jawaʼ más exbadhak abal a Jesús pel kin tólmiy an atiklábchik. Bélits abal junchikíl in atsʼálak lej tsékenek, in tsápnanchalak kin tólmiy an atiklábchik. Ka ajiychik Marcos 6:30-44 ani ka tsálpaychik kʼal axéʼ:
-
¿Jantʼiniʼ u tejwamél al axéʼ xi versículos abal a Jesús u tʼeʼpinalak kʼal an atiklábchik? (Ka tsuʼuwchik an versículos 31, 34, 41, ani 42.
-
¿Jaleʼ ti a Jesús in tólmiy nixéʼ an atiklábchik? (Ka tsuʼuwchik an versículo 34.
-
Kom a Jesús in nitsʼbiy lej alwaʼ in Tátaj, ¿jantʼoj tu exóbchal nixéʼ tin kwéntaj a Jehová?
-
¿Jantʼiniʼ i éjtowal ki tʼajaʼ ti kwéntaj an atiklábchik, antsanáʼ jantʼiniʼ tin tʼajaʼ a Jesús?
6. A Jesús in bínaʼ kʼal in kulbétal jawaʼ in kwaʼalak
A Jesús yab in kwaʼalak yan jantʼoj, pero tam in binálak, in tʼajálak kʼal in kulbétal ani tu exóbchal abal wawáʼ jayej ki tʼajaʼ antsanáʼ. Ka ajiychik Hechos 20:35 ani ka tsálpaychik kʼal axéʼ:
-
¿Jantʼoj játs axi in uluw a Jesús abal neʼets kin tʼajaʼ abal ki atsʼaʼ kulbél?
Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jantʼoj i éjtowal ki bínaʼ, bélits max yab i kwaʼal yan jantʼoj?
¿A exlalak?
An Biblia in ulal abal kwaʼal ki eyendhanchij in bij a Jesús tam ki ólonchij a Jehová (ka ajiychik Juan 16:23, 24). Antsanáʼ i tejwamedhál abal i kʼakʼnál jawaʼ in tʼajámal a Jesús abal ku utey kʼal a Jehová.
JAWAʼ TALCHIK IN TSÁLPAYAL: «A Dios yab in tʼajál ti kwéntaj an yajchiktaláb axi i watʼál».
-
¿Jantʼiniʼ u tejwamél kʼal jawaʼ in tʼajaʼ a Jesús abal a Jehová tu lej tʼajál ti kwéntaj?
JAWAʼ I EXOBNÁMAL
A Jesús in kʼanidhál a Jehová ani jayej an atiklábchik. A Jesús in nítsʼbiyal lej alwaʼ a Jehová, jaxtám, máx ki exlaʼ más tin kwéntaj a Jesús, neʼets ki ejtow ki exlaʼ más a Jehová.
Ki tʼilaʼ jawaʼ i exóbnaʼ
-
¿Jantʼiniʼ i éjtowal ki tejwamédhaʼ abal i kʼanidhál a Jehová, antsanáʼ jantʼiniʼ tin tʼajaʼ a Jesús?
-
¿Jantʼiniʼ i éjtowal ki tejwamédhaʼ abal i kʼanidhál an atiklábchik, antsanáʼ jantʼiniʼ tin tʼajaʼ a Jesús?
-
¿Jantʼoj játs axi más a kulbetnál tin kwéntaj a Jesús?
KA EXÓBNAʼ JANTʼOJ ÍT
Ka exóbnaʼ jantʼoj a éjtowal ka nitsʼbiy tin kwéntaj a Jesús.
«Ki nitsʼbiy in tʼiplabil a Jesús». (Jesús: el camino, la verdad y la vida, página 317)
Ka exlaʼ jaleʼ kwaʼal ki eyendhanchij in bij a Jesús tam i ólonchal a Jehová.
«¿Jaleʼ ti kwaʼal ki eyendhanchij in bij a Jesús tam u ól?» (La Atalaya, 1 de febrero de 2008)
¿In olnál an Biblia jantʼiniʼ ti wálkidhak a Jesús?
¿Jantʼoj i exobnál kom a Jesús in lej tʼajaʼ ti kwéntaj an mimlábchik?
«A Dios in pidhál yan in jalbíl an mimlábchik» (La Atalaya, 1 de septiembre de 2012)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
