AJUMTALÁB 19
¿Chubax pel i aykol kʼal a Cristo an ólchixchik kʼal a Jehová?
An ólchixchik kʼal a Jehová chubax i belál abal i kʼakʼnál a Jehová jantʼiniʼ tin tomnál. ¿Jaleʼ i belál antsanáʼ? Ki exóbnaʼ juʼtáj i kaldhál an exobchixtaláb axi i olnál, juʼtáj ti kaldhaʼ i bij ani jantʼiniʼ i tejwamedhál i kʼanidhomtaláb.
1. ¿Juʼtáj tin kaldhál an exobchixtaláb an ólchixchik kʼal a Jehová?
A Jesús in uchaʼ a Dios: «A káwintal játs an chubaxtaláb» (Juan 17:17). An ólchixchik kʼal a Jehová i tsápnanchal abal ki nitsʼbiy a Jesús: etsʼey i kaldhál an exobchixtaláb ban Biblia. Ki tsuʼuw jantʼoj in tʼajaʼ an ólchixchik kʼal a Jehová tam ti tujeykʼij. Ti 1870, jun i kwenél i atikláb tujey in exobnál an Biblia abal kin ejtiychik alwaʼ. Tujeychik in tʼajál jawaʼ in exobnálak ban Biblia, bélits abal kʼeʼat i belomtaláb yab in tʼajálakchik. Jayej, in ólchalak axi kʼeʼat jawaʼ kʼwajatak in exobnál. a
2. ¿Jaleʼ i bij ólchixchik kʼal a Jehová?
A Jehová in bíjiyal in tʼojnalil ti ólchixchik, kom in olnálchik jawaʼ in exlál tin kwéntaj Jajáʼ (Hebreos 11:4-12:1). Ti biyál, a Jehová in uchaʼ in bichówil: «Tatáʼchik pel it ólchix kʼal Nanáʼ» (ka ajiy Isaías 43:10). Jayej, an Biblia in ulal abal a Jesús pel i Ólchix kom «in olnál tin tekédh an chubaxtaláb» (Apocalipsis 1:5). Jaxtám, ti 1931 i takuy ku bíjiyat tu ólchixchik kʼal a Jehová. I lej kulbetnál ku bíjiyat antsanáʼ.
3. ¿Jantʼiniʼ in tejwamedhál an ólchixchik kʼal a Jehová i kʼanidhomtaláb ejtíl a Jesús?
A Jesús in lej kʼanidhálak in aykolil, jaxtám in tsuʼtalakchik ejtíl in yanél (ka ajiy Marcos 3:35). An ólchixchik kʼal a Jehová jayej u kʼwajat lej junkudh, u kʼanidháx jantʼiniʼ max pel junkats u yaneláb. Jaxtám i uchál «epchal» jitakits tam ólchix kʼal a Jehová (Filemón 1, 2). Jayej, i belkál axéʼ xi abatnaxtaláb: «Ka kʼanidhaʼ axi pel i epchaláb» (1 Pedro 2:17). An ólchixchik kʼal a Jehová i aliyal jantʼiniʼ ki tejwamédhaʼ i kʼanidhomtaláb. Ejtíl, tam i epchalchik in watʼál jun i yajchiktaláb, i aliyal jantʼiniʼ ki tólmiy.
ABAL KA EXÓBNAʼ MÁS
Ki exóbnaʼ más tin kwéntaj an ólchixchik kʼal a Jehová ani ki tʼajaʼ ti kwéntaj jaleʼ i belál abal chubax pel u aykol kʼal a Cristo.
An ólchixchik kʼal a Jehová in kaldhál ti Biblia jawaʼ in belál ani in ólchal kʼeʼat i atikláb.
4. I kaldhál an exobchixtaláb ti Biblia
A Jehová in uluw ti biyál abal kʼayum kʼayum neʼetsak ka éxbayat jawaʼ in ulal an Biblia. Ka ajiychik Daniel 12:4 ani ka tsálpaychik kʼal axéʼ:
-
¿Jantʼoj játs «axi neʼetsak ka yaney» tam in tʼojnalil a Dios kin alwaʼ exóbnaʼchik an Biblia?
Ka tsuʼuw jantʼiniʼ in exobnálak an Biblia jun kwenél i atikláb, tanáʼ jayej kʼwajatak a Charles Russell. Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jantʼiniʼ in exobnálak an Biblia a Charles Russell ani in tolmiwálchik?
¿A exlalak?
Junchikíl, i koʼoyamal ki wéʼ jalkʼuy jawaʼ i belálakits. ¿Jaleʼ? Antsanáʼ jantʼiniʼ a kʼicháj kʼayum kʼayum tu tájkʼanal, a Dios kʼayum kʼayum tu tájkʼanchal in Káwintal (ka ajiychik Proverbios 4:18). An Biblia yab jaykʼiʼ u jálkʼunal, pero biyat neʼets i éxbayal más alwaʼ, neʼets ki yéjenchij ki jalkʼuy jawaʼ i belál.
5. I tejwamedhál abal pel u ólchix kʼal a Jehová
¿Jaleʼ i takuy ku bíjiyat tu ólchixchik kʼal a Jehová? Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jaleʼ ti tekedh ku bíjiyat ólchixchik kʼal a Jehová?
¿Jaleʼ in takuyámal a Jehová i atiklábchik abal ka ólnanchat in bij? Yan i atikláb in ulumal i janamtaláb tin kwéntaj a Jehová, jaxtám an ólchixchik kʼal a Jehová kwaʼal kin ólnaʼ an chubaxtaláb. Ki tsuʼuw talchik i janamtaláb axi uluwámej tin kwéntaj a Dios.
Talchik i belomtaláb in ulal abal a Dios in léʼ ki eyendhaʼ i walekláb abal ki kʼakʼnaʼ. Pero, ¿walám chubax nixéʼ? Ka ajiychik Levítico 26:1 ani ka tsálpaychik kʼal axéʼ:
-
¿Jawaʼ játs an chubaxtaláb? ¿Jantʼoj in tsálpayal a Dios tin kwéntaj an waleklábchik?
Talchik i atikláb axi in okʼnál jun i belomtaláb, in exóbchal an atiklábchik abal a Jesús pel a Dios. Pero, ¿walám chubax nixéʼ? Ka ajiychik Juan 20:17 ani ka tsálpaychik kʼal axéʼ:
-
¿Jawaʼ játs an chubaxtaláb? ¿A Dios ani a Jesús jayetsej?
-
¿Jantʼoj a atsʼál tatáʼ kom a Jehová in abamal in tʼojnalil abal kin ólnaʼ an chubaxtaláb tin kwéntaj Jajáʼ ani a Jesús?
6. U kʼanidháx
An Biblia in ulal abal in aykolil a Cristo kʼwajatchik junkudh jantʼiniʼ max pelak junkats i atikláb. Ka ajiychik 1 Corintios 12:25, 26 ani ka tsálpaychik kʼal axéʼ:
-
¿Jantʼoj in tomnál kin tʼajaʼ jitaʼchik chubax in kʼakʼnál a Jehová, tam kin exlaʼ abal jun in epchal kʼwajat in yajchiknál?
-
¿Jantʼiniʼ a tsuʼumal abal an ólchixchik kʼal a Jehová in tejwamedhál abal u kʼanidháx?
Tam ki exlaʼ abal jun i ólchix kʼal a Jehová kʼwajat in yajchiknál, dhúbatkʼij i tólmiyal. Abal ka exlaʼ jun i tʼiplab, ka tsuʼuwchik an VIDEO. Talbél ka tʼilaʼchik jawaʼ a tsuʼuw:
-
¿A tsálpayal abal kʼal jawaʼ in tʼajaʼ an ólchixchik kʼal a Jehová in tejwamédhaʼ abal chubax u kʼanidháx? ¿Jaleʼ?
An ólchixchik kʼal a Jehová in tólmiyal axi kʼeʼat kom in kʼanidhál.
JAWAʼ TALCHIK IN TSÁLPAYAL: «An ólchixchik kʼal a Jehová ítekʼij ti kalnek».
-
¿Jaykʼiʼ ti tuyej a Jehová in bíjiyal ti «ólchixchik» an atikláb kʼal axi tu kʼakʼnáb?
JAWAʼ I EXOBNÁMAL
An ólchixchik kʼal a Jehová chubax pel i aykol kʼal a Cristo. I kʼakʼnál junkudh a Jehová tin puwél an Tsabál jantʼiniʼ max pel u yaneláb, i kaldhál an exobchixtaláb ti Biblia ani i olnál an chubaxtaláb tin kwéntaj a Jehová.
Ki tʼilaʼ jawaʼ i exóbnaʼ
-
¿Jaleʼ i takuy ku exláj jantʼini u ólchixchik kʼal a Jehová?
-
¿Jantʼiniʼ i tejwamedhál abal u kʼanidháx?
-
¿A tsálpayal abal an ólchixchik kʼal a Jehová pel i chubax aykol kʼal a Cristo?
KA EXÓBNAʼ JANTʼOJ ÍT
Ka exlaʼ más tin kwéntaj an ólchixchik kʼal a Jehová.
Ka exlaʼ jantʼiniʼ an ólchixchik kʼal a Jehová in ólnaʼ an chubaxtaláb tin kwéntaj jun i exobchixtaláb axi yab tekedh.
Ka elaʼ an tokʼtsixtaláb kʼal talchik i konowixtaláb axi walám a tʼajámal tin kwéntaj an ólchixchik kʼal a Jehová.
A Stephen in tʼajálak yan jantʼoj axi kidháb kom lej tsákulom. Ka exlaʼ jantʼoj in tsuʼuw ban ólchixchik kʼal a Jehová kʼal axi ti tólmiyat abal kin jalkʼuy in ejatal.
«Kʼwajatak u lej odhnál u ejatal» (La Atalaya, 1 de julio de 2015)
a An revista La Atalaya tujey ti tsʼejkáb ti 1879, ani ma xowéʼ in áynanchal ka kaldháj.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
