AJUMTALÁB 21
¿Jantʼiniʼ kʼwajat ti olnáb an alwaʼ kaw?
Lej wéʼits, a Jehová neʼets kin eyendhaʼ in Eyaltal abal kin talabédhaʼ patal an kʼibataláb axi waʼats ban xeʼtsintaláb. ¡Axéʼ xi alwaʼ kaw i léʼ ki ólchij patal an atikláb! A Jesús in léʼak abal in aykolil kin ólnaʼ axéʼ xi alwaʼ kaw tin puwél an Tsabál (Mateo 28:19, 20). ¿Jantʼoj in tʼajámal an ólchixchik kʼal a Jehová abal kin putuw kʼal axéʼ xi abatnaxtaláb?
1. ¿Jantʼiniʼ ti kʼwajat ti putnal Mateo 24:14 xowéʼ ta kʼicháj?
A Jesús in uluw: «Axéʼ xi alwaʼ kaw tin kwéntaj in Eyaltal a Dios neʼets ka olnáj tin puwél an Tsabál» (Mateo 24:14). An ólchixchik kʼal a Jehová i lej kulbetnál ki putuw kʼal axéʼ xi tʼojláb. I olnál an alwaʼ kaw tin puwél an Tsabál al watʼadh 1.000 i kawintaláb. I yéjenchal yan i tsapláb ani ku tʼojon junkudh abal ki putuw kʼal axéʼ xi púlik tʼojláb. Max a Jehová yabák tu ku tólmiy, yab neʼets ki ejtow ki tʼajaʼ axéʼ xi tʼojláb.
2. ¿Jantʼoj i tʼajál abal ki ejtow ki ólchij an alwaʼ kaw an atiklábchik?
U ólnom juʼtámakits ka waʼtsin i atikláb. Antsanáʼ jantʼiniʼ in aykolil a Jesús, wawáʼ jayej u ólnom «atáj ti atáj» (Hechos 5:42). Antsanáʼ, támub ti támub i éjtowal ki ólchij millones i atikláb an alwaʼ kaw. Pero jayej i aliyal an atiklábchik juʼtáj i tsuʼtal abal u támkunalchik, kom waʼats yan axi yab i elál tin kʼimáʼ. Etsʼey i aliyal jantʼiniʼ ki ólchij an atiklábchik tin kwéntaj a Jehová ani jawaʼ in tsálpayal kin tʼajaʼ.
3. ¿Jitaʼchik in kwaʼal in uchbíl kin ólnaʼ an alwaʼ kaw?
Patal jitaʼ chubax pel i aykol kʼal a Cristo in tomnál kin ólnaʼ an alwaʼ kaw. Wawáʼ i lej tsápnanchal ki putuw kʼal axéʼ xi tʼojláb. I tʼajál patal jawaʼ ki ejtow abal ku olnomáts, kom antsanáʼ i tólmiyal an atiklábchik abal kin ejtow kin kʼaniy in ejatal (ka ajiy 1 Timoteo 4:16). Yab jitaʼ tu jálbiyal abal ki tʼajaʼ axéʼ xi tʼojláb, kom an Biblia in ulal: «Kom nanáʼ tu tsʼejwaliy, jaxtám yab ka batsʼuw i tumín» (Mateo 10:7, 8). Bélits abal yan i atikláb yab in léʼ tu ku otsʼówiy, wawáʼ i áynanchal tu ólnom kom antsanáʼ i puwénchal a Jehová ani i kulbedhál.
ABAL KA EXÓBNAʼ MÁS
Ki tsuʼuw jantʼoj kʼwajat i tʼajál an ólchixchik kʼal a Jehová abal ki ólnaʼ an alwaʼ kaw tin puwél an Tsabál ani jantʼiniʼ tu tólmiyal a Jehová.
4. I tsápnanchal ki ólchij an alwaʼ kaw patal an atikláb
I tʼajál patal jawaʼ ki ejtow abal ki ólchij an alwaʼ kaw an atiklábchik juʼtámakits ka kʼwajiy. Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jantʼoj játs axi más a jikʼpál kʼal jawaʼ in tʼajál an ólchixchik kʼal a Jehová abal ka olnomáts?
Ka ajiychik Mateo 22:39 ani Romanos 10:13-15, ani ka tsálpaychik kʼal axéʼ:
-
¿Jantʼiniʼ in tejwamedhál an olnomtaláb abal i kʼanidhál an atiklábchik?
-
¿Jantʼoj in tsálpayal a Jehová kʼal jitaʼchik in olnál an alwaʼ kaw? (Ka tsuʼuwchik an versículo 15).
5. Pel u tólmix kʼal a Dios
Waʼats yan i tʼiplab axi in tejwamedhál abal a Jehová kʼwajat in okʼnál an olnomtaláb. Ki tsuʼuw jantʼoj watʼey ti Nueva Zelanda. Jun a kʼicháj jun i ólchix kʼal a Jehová axi in bij Paul xeʼetsak ti ólnom tam ti wákalits, ani in elaʼ jun i mimláb. An mimláb in uluw abal nixéʼ xi dhajuw in éyendhanchij in bij a Dios abal kin ólonchij ani in uchaʼ abal in léʼak ka tsaʼbiyat. «Ani nixéʼ xi wákal nanáʼ in kʼwajatak tanáʼ abal ku ólchij an alwaʼ kaw».
Ka ajiychik 1 Corintios 3:9 ani ka tsálpaychik kʼal axéʼ:
-
¿Jantʼiniʼ in tejwamedhál i tʼilab jantʼiniʼ axéʼ, abal a Jehová kʼwajat in okʼnál an olnomtaláb?
Ka ajiychik Hechos 1:8 ani ka tsálpaychik kʼal axéʼ:
-
¿Jaleʼ ti yéjenchal abal a Jehová tu ku tólmiy abal ki putuw kʼal axéʼ xi tʼojláb?
¿A exlalak?
Ban tamkuntaláb axi i kwaʼal ti tsʼejel semana, u exóbchinal jantʼiniʼ ku olnomáts. Max tatáʼ it kʼalnek al axéʼ xi tamkuntaláb, ¿jantʼoj a tsálpayal ka jawaʼ a exóbnaʼ?
6. I pútuwal kʼal i uchbíl axi a Dios tu pidhámal abal tu ólnom
Ti kʼaʼál siglo, in aykolil a Jesús u kʼanchinalak ti ólnom kʼal jitaʼchik tu kʼwiynalak. Jajáʼchik in tʼajaʼ patal jawaʼ in ejtow abal ka jílanchik ti ólnom (Filipenses 1:7). Xowéʼ ta kʼicháj, jayej an ólchixchik kʼal a Jehová i tsápnanchal abal ku jílan tu ólnom. a
Ka ajiychik Hechos 5:27-42 ani ka tsálpaychik kʼal axéʼ:
-
¿Jaleʼ ti yab neʼets ki jilaʼ tu ólnom? (Ka tsuʼuwchik an versículos 29, 38 ani 39).
JAWAʼ TALCHIK WALÁM TI KONOY: «¿Jaleʼ ti an ólchixchik kʼal a Jehová u ólnom atáj ti atáj?».
-
¿Jantʼoj neʼets ka tókʼtsiy?
JAWAʼ I EXOBNÁMAL
A Jesús in uchaʼ in aykolil abal ka olnomáts tin puwél an Tsabál. A Jehová kʼwajat in tólmiyal in bichówil abal kin putuw kʼal axéʼ xi tʼojláb.
Ki tʼilaʼ jawaʼ i exóbnaʼ
-
¿Jantʼoj kʼwajat ti tʼajnal abal ka olnáj an alwaʼ kaw tin puwél an Tsabál?
-
¿Jantʼiniʼ i tejwamedhál tam u ólnom abal i kʼanidhál an atiklábchik?
-
¿A tsálpayal abal an olnomtaláb tu tólmiyal abal ki atsʼaʼ kulbél? ¿Jaleʼ?
KA EXÓBNAʼ JANTʼOJ ÍT
Ka tsuʼuw jantʼiniʼ tu ólnom an ólchixchik kʼal a Jehová ban pakdhaʼ bichow.
¿Jantʼiniʼ ti tolmiyámej kʼal an ólchixchik kʼal a Jehová an atiklábchik axi u kʼalel ti tsinél al pil i bichow?
I tólmiyal jitaʼchik kʼalnek ti tsinél al pil i bichow (5:59)
Ka tsuʼuw jantʼiniʼ tin atsʼál jun i epchal axi in eyendhál in ejatal abal ti ólnom.
Ka ajiy jawaʼ in tsapnanchámal kin tʼajaʼ an ólchixchik kʼal a Jehová abal kin éjtowchik kin áynanchij ti ólnom.
a Kom pel a Jehová axi tu uchál ku kʼalej tu ólnom, jaxtám an eyalchik yab in éjtowal tu ku kʼanchij.