AJUMTALÁB 23
Lej alwaʼak max ka tsápnanchij abal kit pujan
A Jesús in uluw abal max i léʼ ki tʼajaʼ tu aykol kʼal jajáʼ, kwaʼal ku pujan (ka ajiy Mateo 28:19, 20). Pero, ¿jantʼoj in léʼ kin uluw ku pujan? ¿Ani jantʼoj kwaʼal kin tʼajaʼ jun i atikláb abal ka pujan?
1. ¿Jantʼoj in léʼ kin uluw ku pujan?
An kaw pujan tal ti griego ani in léʼ kin uluw abal ka «lúptsʼiyat» jun i atikláb ban jáʼ. Tam ti a Jesús pujan, lúptsʼiyat ban río Jordán, ani talbél «kalej ban jáʼ» (Marcos 1:9, 10). Tam jun i atikláb chubax in léʼ kin tʼajaʼ ti aykol kʼal a Cristo, kwaʼal ka pujan antsanáʼ jantʼiniʼ jajáʼ in tʼajaʼ; kwaʼal ka lúptsʼiyat ban jáʼ.
2. ¿Jantʼoj in tejwamedhál jun i atikláb tam ka pujan?
Tam jun i atikláb ka pujan, in tejwamedhál abal in pidhámalits in ejatal a Jehová. ¿Jantʼoj in léʼ kin uluw axéʼ? Axéʼ játs tam jun i atikláb in ólonchal a Jehová ani in uchál abal neʼets kin tʼojonchij abal etsʼey. Axéʼ xi oláb in tʼajál okʼxidh ka pujan. In ólchal a Jehová abal expidh neʼets kin kʼakʼnaʼ Jajáʼ ani abal játs jawaʼ más neʼets kin pidhaʼ in jalbíl. Jayej, in léʼ kin tsápnanchij kin nitsʼbiy a Jesús ani kin tʼajaʼ jawaʼ jajáʼ tu exóbchij. A Jesús in uluw: «Kin tʼajat jílkachikiy in kwéteʼ kulbétal jitats in léʼ ka tsʼatʼey kʼal nanáʼ, [...] ti kin tsʼatʼenchij» (Mateo 16:24). Tam jun i atikláb kin pidhaʼ in ejatal a Jehová ani ka pujan, in éjtowal kin jaʼúbnaʼ. Jayej in éjtowal kin tʼajaʼ tin jaʼúb kʼeʼat i atikláb axi jayej in kʼakʼnál a Jehová.
3. ¿Jantʼoj kwaʼal kin tʼajaʼ jun i atikláb abal kin ejtow ka pujan?
Max tatáʼ a léʼ kit pujan, okʼox kwaʼal ka exlaʼ tin kwéntaj a Jehová ani ka lej belaʼ kʼal Jajáʼ (ka ajiy Hebreos 11:6). Biyat neʼets a exlál tin kwéntaj a Jehová neʼets ka lej belaʼ kʼal Jajáʼ ani neʼets ka kʼanidhaʼ más. Nixéʼ neʼets kin tʼajaʼ abal ka léʼnaʼ tit ólnom ani ka tʼajaʼ ta ejatal jawaʼ a exobnál ti Biblia (2 Timoteo 4:2; 1 Juan 5:3). Tam an atikláb ka «xeʼtsin tekedh jantʼiniʼ in tomnál» ani jantʼiniʼ in kónoyal a Jehová, walám kin tsalpay kin pidhaʼ in ejatal a Jehová ani ka pujan (Colosenses 1:9, 10). a
ABAL KA EXÓBNAʼ MÁS
Ki exóbnaʼ jantʼoj in tʼajaʼ a Jesús abal ka pujan ani jantʼoj kwaʼal kin tʼajaʼ jun i atikláb axi jayej in léʼ ka pujan.
4. Jawaʼ i exobnál kʼal jawaʼ in tʼajaʼ a Jesús tam ti pujan
Abal ka exlaʼ jantʼoj watʼey tam ti pujan a Jesús, ka ajiychik Mateo 3:13-17 ani ka tsálpaychik kʼal axéʼ:
-
¿Pelak jun i tʼeleʼ tam ti pujan a Jesús?
-
¿Jantʼiniʼ ti pujan? ¿Walám expidh jolchin wéʼ i jáʼ abal ka pujan?
Tam ti a Jesús pujan, in tujchij kin tʼajaʼ an tʼojláb axi bijchinének kʼal a Jehová. Ka ajiychik Lucas 3:21-23 ani Juan 6:38, ani ka tsálpaychik kʼal axéʼ:
-
Tam ti a Jesús pujan, ¿jawaʼ játs an tʼojláb axi in pidhaʼ más in exbádh?
5. Jitákits in éjtowal kin tsápnanchij abal kin bajuw ka pujan
Walám ka atsʼaʼ wéʼ it jikʼél ka tsalpay kit pujan, max ka áynanchij tit exóbal neʼets ka exbay jaleʼ ti lej exbadh kit pujan ani neʼets ka léʼnaʼ ka tʼajaʼ. Abal ka exlaʼ jantʼoj in tʼajaʼ talchik i atikláb abal kin ejtow ka pujan, ka tsuʼuw an VIDEO.
Ka ajiychik Juan 17:3 ani Santiago 1:5, ani ka tsálpaychik kʼal axéʼ:
-
¿Jantʼoj in éjtowal kin tʼajaʼ jun i atikláb abal kin bajuw ka pujan?
-
I pidhál i ejatal a Jehová tam ki uchaʼ al jun i oláb abal i léʼ ki tʼojonchij abal etsʼey.
-
Tam ku pujan, i tejwamedhál abal i pidhámalits i ejatal a Jehová.
6. Tam jun i atikláb ka pujan, in bájuwal ka kʼwajiy tin bichówil a Jehová
Tam ku pujan, i bájuwal ku kʼwajiy tin bichówil a Jehová axi pel ejtíl jun i yaneláb axi junkudh ani axi kʼwajat tin puwél an Tsabál. Bélits abal pilchik i bichówil ani pil jantʼiniʼ tu yedháj, an exobchixtaláb axi i bátsʼuwal jayetsej, ani i tsápnanchal ki tʼajaʼ jawaʼ tekedh. Ka ajiychik Salmo 25:14 ani 1 Pedro 2:17, ani ka tsálpaychik kʼal axéʼ:
-
¿Jantʼiniʼ tu tólmiyal an pujantaláb ki kʼanidhaʼ más a Jehová ani in jaʼúbchik?
JAWAʼ TALCHIK IN TSÁLPAYAL: «U atsʼál abal in kʼíbchalej yan jantʼoj abal kin pujan»
-
Bélits abal antsanáʼ a atsʼál, ¿walám alwaʼak ka tsápnanchij kit pujan?
JAWAʼ I EXOBNÁMAL
A Jesús in uluw abal max i léʼ ki bajuw tin aykolil, kwaʼal ku pujan. Ani abal ki ejtow ku pujan, kwaʼal ki koʼoy yan i belomtaláb kʼal a Jehová, ki tʼajaʼ jawaʼ tu konchal ani ki pidhaʼ i ejatal.
Ki tʼilaʼ jawaʼ i exóbnaʼ
-
¿Jantʼoj játs an pujantaláb ani jaleʼ ti lej exbadh ku pujan?
-
¿Jantʼoj in léʼ kin uluw ki pidhaʼ i ejatal a Jehová okʼxidh ku pujan?
-
¿Jantʼoj kwaʼal kin tʼajaʼ jun i atikláb okʼxidh kin pidhaʼ in ejatal a Jehová ani ka pujan?
KA EXÓBNAʼ JANTʼOJ ÍT
Ka exóbnaʼ jantʼoj in léʼ kin uluw ku pujan ani talchik i tsalap axi yab tekedh tin kwéntaj an pujantaláb.
«¿Jantʼoj in léʼ kin uluw ku pujan?» (Artículo axi ti jw.org)
Ka tsuʼuw jantʼoj a éjtowal ka tʼajaʼ abal ka bajuw kit pujan.
Ka ajiy tin kwéntaj jun i inik axi in léʼnaʼ ka pujan tam ti in tʼajaʼ ti kwéntaj abal lej exbadh kin tʼajaʼ.
Ka tsuʼuw jaleʼ ti lej exbadh kit pujan ani jantʼoj a éjtowal ka tʼajaʼ abal ka bajuw.
a Max jun i atikláb pujnénekits al kʼeʼat i belomtaláb, kwaʼal ka pujan ti ít. ¿Jaleʼ? Kom tanáʼ yab exóbchat jawaʼ chubax in ulal an Biblia (ka tsuʼuw Hechos 19:1-5 ani an ajumtaláb 13.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
