AJUMTALÁB 25
¿Jantʼoj in léʼ a Dios abal kʼal wawáʼ?
An Biblia in ulal abal an atikláb lej wéʼ i támub u kʼwajíl ani in tametnál yan i kʼibataláb (Job 14:1). Pero, ¿játs antsanáʼ tin léʼ a Dios abal ku kʼwajiy? Max a Dios yab in léʼ abal ki yajchiknaʼ, ¿jantʼoj tam tsalap in kwaʼal abal kʼal wawáʼ? ¿Walám jun a kʼicháj ka putun jawaʼ in tsálpayal? Ki tsuʼuw jantʼoj tu exóbchal an Biblia.
1. ¿Jantʼiniʼ in léʼ a Dios abal ku kʼwajiy?
A Jehová tu léʼnanchal abal ku kʼwajiy kulbél. Tam ti a Jehová in tsʼejkaʼ a Adán ani a Eva, in punuw al jun i alabél Tsabál, an jardín de Edén. Tam ti púnuwatchik tanáʼ, «lábliyatchik kʼal a Dios ani uchan: Ka koʼoychik i tsakam, kit yaney, ka tʼuchiy an Tsabál, ka tʼójonchij» (Génesis 1:28). A Jehová in léʼak abal kin koʼoychik i tsakam, kin tʼójonchij an Tsabál abal ka puwey an paraíso, ani kin béletnaʼchik an koʼnél. A Jehová in léʼak abal patal an atikláb yab jaykʼiʼ ka yawʼláts ani ka kʼwajiy abal etsʼey.
Xowéʼ yab u kʼwajat jantʼiniʼ tin léʼak a Jehová, a pero yab pel kom in jalkʼuyámal in tsalápil (Isaías 46:10, 11). Jajáʼ belej in léʼ abal patal an atikláb axi belkax ka kʼwajiy kulbél ani abal etsʼey (ka ajiy Apocalipsis 21:3, 4).
2. ¿Jantʼoj i éjtowal ki tʼajaʼ abal ma xowéʼits ku kʼwajiy kulbél?
Patal an atikláb in yéjenchal a Dios, antsanáʼ tu tsʼejkaʼ a Jehová, abal ki léʼnaʼ ki exlaʼ ani ki kʼakʼnaʼ (ka ajiy Mateo 5:3-6). A Dios in léʼ abal ki jaʼúbnaʼ, ki tʼajaʼ «jawaʼ tu konchal», ki kʼanidhaʼ ani ki tʼójonchij kʼal patal i ichích (Deuteronomio 10:12; Salmo 25:14). Max ki tʼajaʼ patal axéʼ, neʼets ku kʼwajiy kulbél bélits max i tametnál i kʼibataláb. Ki kʼakʼnaʼ a Jehová in tʼajál abal ki atsʼaʼ kulbél ti ejatal.
ABAL KA EXÓBNAʼ MÁS
Ki tsuʼuw jantʼiniʼ in tejwamédhaʼ i kʼanidhomtaláb a Jehová, tam tin tʼojojoy an Tsabál abal wawáʼ ki ejtow ku kʼwajiy tejéʼ, jayej neʼets ki exóbnaʼ jaleʼ tu tsʼejkámal a Jehová.
3. A Jehová in léʼ abal patal an atikláb ka kʼwajiy kulbél
Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jaleʼ tin tsʼejkaʼ a Dios axéʼ xi alabél Tsabál?
Ka ajiychik Eclesiastés 3:11 ani ka tsálpaychik kʼal axéʼ:
-
¿Jantʼoj tu exóbchal axéʼ tin kwéntaj a Jehová?
4. A Dios yab in jalkʼuyámal in tsalápil
Ka ajiychik Salmo 37:11, 29 ani Isaías 55:11, ani ka tsálpaychik kʼal axéʼ:
-
¿Jantʼiniʼ i exlál abal a Jehová yab in jalkʼuyámal an tsalap axi in kwaʼal abal kʼal wawáʼ?
Jun i atáj axi lej biyálits awits ka tsab tsʼejkáj. Jayetsej in éjtowal kin tʼajaʼ a Dios. An Tsabál kʼwajat lej ódhnachits, pero a Dios in éjtowal kin tsʼejkaʼ abal ka kʼwajiy an atiklábchik kʼal axi tu kʼanidháb.
5. Ki kʼakʼnaʼ a Jehová játs jawaʼ tu kulbédhanchal i ejatal
Tam ki exlaʼ jaleʼ tu kʼwajat ejat i atsʼál kulbél. Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jantʼoj tam alwataláb in batsʼuw a Terumi tam tin exbay jaleʼ tu kʼwajat ejat?
Ka ajiychik Eclesiastés 12:13 ani ka tsálpaychik kʼal axéʼ:
-
¿Jantʼoj in tomnál ki tʼajaʼ abal ki kʼakʼnanchij a Jehová patal jawaʼ in tʼajámal abal kʼal wawáʼ?
JAWAʼ TALCHIK WALÁM TI KONOY: «¿Jaleʼ tu jilnének al axéʼ xi xeʼtsintaláb? ¿Jaleʼ tu kʼwajat ejat?».
-
¿Jantʼoj neʼets ka tókʼtsiy tatáʼ?
JAWAʼ I EXOBNÁMAL
A Jehová in léʼ abal ku kʼwajiy kulbél ani abal etsʼey al jun i alabél Tsabál. Ma xowéʼits i éjtowal ki atsʼaʼ kulbél max ki kʼakʼnaʼ a Jehová kʼal patal i ichích.
Ki tʼilaʼ jawaʼ i exóbnaʼ
-
¿Jantʼoj tam tsalap in kwaʼalak a Jehová tam tin tsʼejkaʼ a Adán ani a Eva?
-
¿Jaleʼ ti exlál abal an tsalap axi a Dios in kwaʼal abal kʼal wawáʼ yab jalkʼunének?
-
¿Jantʼoj in tomnál ka tʼajaʼ abal ka atsʼaʼ kulbél ta ejatal?
KA EXÓBNAʼ JANTʼOJ ÍT
Ka exóbnaʼ jaleʼ ti lej belál abal chubax waʼtsin an jardín de Edén.
«¿Chubax waʼtsin an jardín de Edén?» (La Atalaya, 1 de enero de 2011)
Ka exóbnaʼ jaleʼ ti lej belál abal an Tsabál yab jaykʼiʼ neʼets ka talabedháj.
«¿Walám neʼets ka talabedháj an Tsabál?» (Artículo axi ti jw.org)
Ka exóbnaʼ jantʼoj in ulal an Biblia abal jaleʼ tu kʼwajat ejat.
Ki tsuʼuw in tʼiplabil jun i inik axi in tsálpayalak abal in kwaʼalak patal, pero in tʼajaʼ ti kwéntaj abal in kʼíbchalej jantʼoj.
a Ban ajumtaláb 26 neʼets ki tsuʼuw jaleʼ ti yab putun axéʼ xi tsalap.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
