AJUMTALÁB 31
¿Jantʼoj játs in Eyaltal a Dios?
Jawaʼ más in olnál an Biblia játs tin kwéntaj in Eyaltal a Dios. A Jehová neʼets kin eyendhaʼ axéʼ xi eyaltaláb abal kin putuw an tsalap axi etsʼey in koʼoyamal abal an Tsabál. ¿Jantʼoj játs in Eyaltal a Dios? ¿Jaleʼ i belál abal kʼwajatits ti abatnom? ¿Jantʼoj in tʼajámal ma xowéʼ axéʼ xi eyaltaláb? ¿Jantʼoj neʼets kin tʼajaʼ axi taʼtal a kʼicháj? Al axéʼ xi ajumtaláb, ban 32 ani ban 33 neʼets ki tókʼtsiy axéʼchik xi konowixtaláb.
1. ¿Jantʼoj játs in Eyaltal a Dios ani jitaʼ játs an Eyal?
A Jehová játs jitaʼ in punumal axéʼ xi eyaltaláb. A Jesús játs axi bijiyámej ti Eyal ani kʼwajat tiwaʼ ti éb (Mateo 4:17; Juan 18:36). An Biblia in ulal axéʼ tin kwéntaj a Jesús: «A Cristo abadh kʼal a Dios kin tʼajaʼ ti lej tsʼalej, […] ani antsanáʼ neʼets kin tʼajaʼ abal etsʼey» (Apocalipsis 11:15). Kom pel kʼal a Dios ti bijiyámej ti tsʼalej, neʼets kin abatnaʼ patal an Tsabál.
2. ¿Jitaʼchik neʼets ti abatnom kʼal a Jesús?
A Jesús yab neʼets ti abatnom kwetém. «I atiklábchik axi pil in káwintal, axi tin patál an bíchowchik ani tin patál i pakdhaʼ bichówlomchik neʼets kin bajuw ti abatnom kʼal an inikchik axi tejéʼ Tsabál» (Apocalipsis 5:9, 10). ¿Jay neʼets ti abatnom kʼal a Cristo? Ma tam ti a Jesús xeʼtsin tejéʼ tsabál, yan i atikláb in takuyámal kin tʼajaʼ ti aykol kʼal jajáʼ. Pero yab patal neʼets ka kʼalej ti abatnom kʼal jajáʼ ti éb, expidh 144.000 (ka ajiy Apocalipsis 14:1-4). Patal axi más in aykolil a Cristo, axi yab ka kʼalej ti éb, neʼets ka jílkʼon tejéʼ Tsabál ani neʼets ka abatnáj kʼal in Eyaltal a Dios (Salmo 37:29).
3. ¿Jaleʼ ti an eyalchik axi tejéʼ Tsabál yab in báwchal in Eyaltal a Dios?
Bélits abal waʼats i eyal axi in léʼ kin tólmiy an atikláb, yab in éjtowalchik kin putuw patal jawaʼ in tsálpayal, ani tam ka talíts ti eyal, walám ka otsits kʼeʼat axi yab in lej léʼ ti tólmix. Pero a Jesús pel jun i Eyal axi yab jaykʼiʼ neʼets ka kálchiyat kʼal kʼeʼat i eyal. A Dios in punuw «jun i eyaltaláb axi yab jaykʼiʼ neʼets ka tixkʼáj» (Daniel 2:44). A Jesús neʼets kin tʼajaʼ ti kwéntaj patal an atikláb ani neʼets kin tsuʼuw jununúl. Jajáʼ lej kʼanidhom, alwaʼ inik ani etsʼey in tʼajál jawaʼ tekedh. Jayej neʼets kin exóbchij an atiklábchik abal ka nítsʼbiyat: abal kin tʼajaʼchik ti kʼanidhom, ti alwaʼ inik ani etsʼey kin tʼajaʼchik jawaʼ tekedh (ka ajiy Isaías 11:9).
ABAL KA EXÓBNAʼ MÁS
Ki exóbnaʼ, jaleʼ ti an eyalchik yab jaykʼiʼ neʼets kin báwchij in Eyaltal a Dios.
4. In Eyaltal a Dios in kwaʼal an tsapláb abal kin abatnaʼ patal an Tsabál
A Jesucristo in kwaʼal yan i tsapláb ani i awiltaláb abal ti eyal. Nibal jun i eyal axi tejéʼ Tsabál in éjtowal kin báwchij. Ka ajiychik Mateo 28:18 ani ka tsálpaychik kʼal axéʼ:
-
¿Jaleʼ ti yab waʼats kʼeʼat i eyal axi kin báwchij a Jesús abal ti abatnom?
An eyalchik axi tejéʼ Tsabál u bíjchinal ma juʼtáj neʼets ti abatnom ani yabchik in éjtowal ti abatnom yan i támub. Pero, ¿walám jayetsej neʼets ka watʼey kʼal in Eyaltal a Dios? Ka ajiychik Daniel 7:14 ani ka tsálpaychik kʼal axéʼ:
-
¿Jaleʼ ti lej alwaʼ abal in Eyaltal a Dios neʼets ka kʼwajiy abal etsʼey?
-
¿Jaleʼ ti lej alwaʼ abal neʼets kin abatnaʼ patal an Tsabál?
5. An eyalchik axi tejéʼ Tsabál kwaʼalits ka jálkʼuyat
¿Jaleʼ in Eyaltal a Dios kwaʼal kin kálchiy an eyalchik axi waʼats xowéʼ? Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jantʼoj in tʼajámal an eyalchik?
Ka ajiychik Eclesiastés 8:9 ani ka tsálpaychik kʼal axéʼ:
-
¿A tsálpayal abal in Eyaltal a Dios in tomnál kin kalchiy patal an eyalchik? ¿Jaleʼ?
6. Axi neʼets ti tólmix ti abatnom kʼal a Jesús tu éxbayal alwaʼ
A Jesús játs axi neʼets tu ku abatnaʼ ani kom jajáʼ kʼwajiy tejéʼ ban Tsabál, jaxtám tu éxbayal ani «in lej witʼál tu ku yájnanchij» (Hebreos 4:15). A Jehová in takuyámal 144.000 i inik ani i uxum abal ka kʼalej ti tólmix kʼal a Jesús ti abatnom. Jajáʼchik pel i atikláb «axi pil in káwintal, axi tin patál an bíchowchik ani tin patál an pakdhaʼ bichówlomchik, neʼets kin bajuw ti abatnom kʼal an inikchik axi tejéʼ Tsabál» (Apocalipsis 5:9).
-
¿Jantʼoj a atsʼál kom a Jesús ani axi neʼets ti abatnom kʼal jajáʼ tu éxbayal lej alwaʼ?
A Jehová in takuyámal i inik ani i uxum axi pilchik in káwintal ani in bichówil, abal ka kʼalej ti abatnom kʼal a Jesús.
7. Jawaʼ an eyalchik tu konchal ki tʼajaʼ yab junat kʼal jawaʼ tu konchal in Eyaltal a Dios
An eyalchik in púnuwal i abatnaxtaláb abal kin tólmiy an atiklábchik. In Eyaltal a Dios jayej in binámal i abatnaxtaláb. Jitaʼchik in léʼ abal ka abatnáj kʼal axéʼ xi eyaltaláb, kwaʼal kin putuw. Ka ajiychik 1 Corintios 6:9-11 ani ka tsálpaychik kʼal axéʼ:
-
¿Jantʼiniʼ a tsálpayal abal neʼets ku kʼwajiy, tam patal an atikláb kin belkaʼ an abatnaxtaláb axi in binámal a Dios? a
-
¿Walám in tomnál a Jehová tu ku konchij abal ki putuw kʼal axéʼchik xi abatnaxtaláb? ¿Jaleʼ a tsálpayal antsanáʼ?
-
¿Jaleʼ i exlál abal an atiklábchik axi yabayej in tʼajál jawaʼ tekedh, in éjtowal kin jálkʼuychik in ejatal? (Ka exóbnaʼchik an versículo 11.
An eyalchik in púnuwal i abatnaxtaláb abal kin béletnaʼ an atiklábchik. In Eyaltal a Dios in binál i abatnaxtaláb axi más alwaʼ ani axi más neʼets kin tólmiy an atiklábchik.
JAWAʼ TALCHIK WALÁM TI KONOY: «¿Jantʼoj játs in Eyaltal a Dios?».
-
¿Jantʼoj neʼets ka tókʼtsiy?
JAWAʼ I EXOBNÁMAL
In Eyaltal a Dios pel jun i eyaltaláb axi kʼwajatits ti éb ani lej wéʼits neʼets kin abatnaʼ patal an Tsabál.
Ki tʼilaʼ jawaʼ i exóbnaʼ
-
¿Jitaʼchik neʼets ti tólmix abatnom tin Eyaltal a Dios?
-
¿Jaleʼ ti yab waʼats jun i eyaltaláb axi kin báwchij in Eyaltal a Dios?
-
¿Jantʼoj in konchal a Jehová kin tʼajaʼ jitaʼchik neʼets ka abatnáj kʼal axéʼ xi eyaltaláb?
KA EXÓBNAʼ JANTʼOJ ÍT
Ka exóbnaʼ juʼtáj tin uluw a Jesús abal neʼets ka kʼwajiy axéʼ xi eyaltaláb.
«In Eyaltal a Dios, ¿pel jantʼoj axi i neʼdhál ti ichích?» (Artículo axi ti jw.org)
An ólchixchik kʼal a Jehová in belkál an eyalchik, ¿pero jaleʼ ti más in belkál in Eyaltal a Dios?
Ka exlaʼ jantʼoj in ulal an Biblia tin kwéntaj an 144.000 i atikláb axi neʼets ka kʼalej kin tólmiy a Jesús abal ti abatnom.
«¿Jitaʼchik neʼets ka kʼalej ti éb?» (Artículo axi ti jw.org)
¿Jantʼiniʼ tin exbay jun i mimláb axi kʼwajiy ti wíkʼaxteʼ, abal expidh a Dios in éjtowal kin tsʼejkaʼ an kʼibataláb?
«U exlaʼ jantʼiniʼ ti neʼets ka tsʼejkan an kʼibataláb» (¡Despertad!, noviembre de 2011)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
