AJUMTALÁB 50
¿Jantʼoj a éjtowal ka tʼajaʼ abal kit kʼwajiy kulbél kʼal a yanél? (Pejach tsab)
An tsákamchik pel ejtíl jun i tsʼejwalixtaláb axi pidhnének an tatalábchik kʼal a Jehová. Jajáʼ in léʼ abal an tatalábchik kin béletnaʼ alwaʼ nixéʼ xi tsʼejwalixtáb. Jaxtám in exobchámal jantʼiniʼ kin tʼajaʼ. Jayej in pidhál i exóbchixtaláb an tsákamchik.
1. ¿Jantʼoj in exóbchal a Jehová an tatalábchik?
A Jehová in léʼ abal an tatalábchik kin kʼanidhaʼ in tsakámil ani etsʼey ka kʼwajiy kʼal jajáʼchik. Jayej in léʼ abal kin lej tʼajaʼchik ti kwéntaj abal yab ka odhnáj ani kin eyendhaʼ an Biblia abal kin exóbchij (Proverbios 1:8). A Jehová in uchál axéʼ xi kaw an tatalábchik: «Ka exóbchichik in káwintal» a Jehová (ka ajiy Efesios 6:4). A Jehová u lej kulbél kin tsuʼuw abal an tatalábchik in pútuwal kʼal in uchbíl kin exóbchij in tsakámil, ani yab in jílchal nixéʼ xi tʼojláb kʼeʼat i atikláb.
2. ¿Jantʼoj in exóbchal a Jehová an tsákamchik?
A Jehová in uchál axéʼ an tsákamchik: «Tatáʼ tsákamchik, ka tʼajaʼ patal jawaʼ ti úchbiyal a tátaj ani a mim» (ka ajiy Colosenses 3:20). Tam an tsákamchik u belkax ani in kʼakʼnál in tátaj, in kulbedhál a Jehová ani jayej in tátajchik (Proverbios 23:22-25). A Jesús tu punchij jun i alwaʼ tʼiplab. Jajáʼ yab wálbidhak pero in belkaʼ ani in kʼakʼnaʼ in tátajchik, bélits abal jajáʼchik wálbidhak (Lucas 2:51, 52).
3. ¿Jantʼoj in éjtowal kin tʼajaʼ an yaneláb abal ka kʼwajiychik más utat kʼal a Jehová?
Max a kwaʼal i tsakam, walám a léʼ abal jajáʼchik jayej kin kʼanidhaʼ a Jehová. ¿Jantʼiniʼ ti neʼets ka ejtow ka tólmiy? Max ka tʼajaʼ ti kwéntaj axéʼ xi kaw axi in ulal an Biblia: «Kwaʼal ka wílkʼidh ólchij a tsakámil [tin kwéntaj a Jehová] tam kit koyóts ta kʼimáʼ, tam kit xeʼtsin ti bél ani tam kit kwatsiy ani tam kit tsʼakiy» (Deuteronomio 6:7). Walám tatáʼ a tʼajámal ti kwéntaj, abal an tsákamchik in yéjenchal ka wílkʼidh tʼilchij jawaʼ a exóbchal, abal yab kin ukʼchiy. Jawaʼ in léʼ kin uluw axéʼ xi texto játs abal tin naktal a kʼicháj, tatáʼ kwaʼal ka aliy jantʼoj ka exóbchij a tsakámil tin kwéntaj a Jehová. Jayej lej exbadh abal semana ti semana, ka exóbnaʼchik an Biblia jantʼiniʼ i yaneláb, antsanáʼ kʼwajatchik a kʼakʼnál a Jehová. Ani bélits max yab a kwaʼal i tsakam, neʼets ti lej tólmiy max ka exóbnaʼ an Biblia ta kwetémtal.
ABAL KA EXÓBNAʼ MÁS
Ki exóbnaʼ jantʼoj in éjtowal kin tʼajaʼ an yaneláb, abal kin atsʼaʼ kulbél ani alwaʼ béletnadh.
4. Ka exóbchij a tsakámil kʼal i kʼanidhomtaláb
Ka exóbchij a tsakámil pel jun i tʼojláb axi in yéjenchal yan i tsapláb. ¿Jantʼiniʼ in éjtowal ti tólmiy an Biblia? Ka ajiychik Santiago 1:19, 20 ani ka tsálpaychik kʼal axéʼ:
-
¿Jantʼiniʼ in éjtowal an tatalábchik kin tawnaʼ kʼal i kʼanidhomtaláb in tsakámil?
-
¿Jaleʼ yab in tomnál an tatalábchik kin boliy in tsakámil tam u tsakúl? a
5. Ka béletnaʼ a tsakámil
Abal ka béletnaʼ a tsakámil, kwaʼal ka exóbchij tin kwéntaj an sexo. Walám neʼets ka atsʼaʼ i wéʼ tidhebél ka ólchij tin kwéntaj axéʼ. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jaleʼ tin atsʼál kʼibat an tatalábchik kin tʼilmay in tsakámil tin kwéntaj an sexo?
-
¿Kʼal jantʼoj ti tolmiyámej an tatalábchik abal kin tʼilmay in tsakámil tin kwéntaj an sexo?
An Biblia biyálits in ulumal abal neʼets ka yaney an atiklábchik axi pojkax. Ka ajiychik 2 Timoteo 3:1, 13 ani ka tsálpaychik kʼal axéʼ:
-
Talchik kʼal axéʼ xi atikláb axi pojkax, axi u ólnab ban versículo 13, in takál an tsakam kʼal i kidháb tsalap abal kin ódhnaʼ. ¿Jaleʼ ti lej exbadh abal an tatalábchik kin exóbchij an tsakam tin kwéntaj an sexo? ¿Jantʼiniʼ in éjtowal kin béletnaʼ abal yab ka ódhnanchat kʼal i atiklábchik axi pojkax?
¿A exlalak?
An ólchixchik kʼal a Jehová in kaldhámal yan i publicaciones, abal an tatalábchik kin exóbchij in tsakámil tin kwéntaj an sexo, abal antsanáʼ kin béletnaʼchik ani yab ka ódhnanchat. Ejtíl axéʼchik:
-
«Jantʼiniʼ ka tʼilmay a tsakámil tin kwéntaj an sexo» (¡Despertad!, núm. 5 2016)
6. Ka kʼakʼnaʼ a tátajchik
An tsákamchik kwaʼal kin kʼakʼnaʼ in papá ani in mamá, nixéʼ neʼets ka tejwaméj jantʼiniʼ tin tawnál. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jaleʼ ti lej exbadh abal an tsákamchik kin tawnaʼ kʼal i kʼakʼnaxtaláb in papá ani in mamá?
-
¿Jantʼiniʼ in éjtowal an tsákamchik kin tejwamédhaʼ abal in kʼakʼnál in papá ani in mamá?
Ka ajiychik Proverbios 1:8 ani ka tsálpaychik kʼal axéʼ:
-
¿Jantʼoj kwaʼal kin tʼajaʼ an tsakam tam ka uchan kʼal in papá ani in mamá kin tʼajaʼ jantʼoj?
7. Ka kʼakʼnaʼ a Jehová jantʼiniʼ i yaneláb
Semana ti semana, an ólchixchik kʼal a Jehová in jolkʼál i kʼij abal kin kʼakʼnaʼ a Jehová jantʼiniʼ i yaneláb. ¿Jantʼiniʼ tin tʼajálchik? Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼoj neʼets ti tólmiy abal semana ti semana ka tʼajaʼ an kʼakʼnaxtaláb kʼal a yanél?
-
¿Jantʼoj in éjtowal kin tʼajaʼ an tatalábchik abal patal kin kulbétnaʼ an kʼakʼnaxtaláb kʼal in yanél? (Ka tsuʼuw an foto axi kʼwajat tin tujtal an ajumtaláb).
-
¿Jantʼoj walám neʼets kin yéjenchij ka tʼajaʼ, abal ka éjtowchik kit exobláts jantʼiniʼ i yaneláb?
Ti biyál, a Jehová in konchij an israelitas abal etsʼey ka tʼilmáts tin kwéntaj an Dhuchláb. Ka ajiychik Deuteronomio 6:6, 7 ani ka tsálpaychik kʼal axéʼ:
-
¿Jantʼiniʼ a éjtowal ka tʼajaʼ jawaʼ in ulal axéʼ xi versículo?
Jawaʼ a éjtowal ka tʼajaʼ ban kʼakʼnaxtaláb kʼal a yanél:
-
Kit exoblátschik abal an tamkuntaláb.
-
Ka ajiychik jun i tʼilab axi ti Biblia ani ka tʼilaʼchik jantʼoj ti exóbchal.
-
Max a kwaʼal i tsakam axi tʼijaxej, ka paʼbaʼ i tareas abal an tsákamchik ti jw.org.
-
Max a kwaʼal i tsakam axi más wéʼ pakdhaʼ, ka takuy jun i artículo abal an tsakam ti jw.org.
-
Ka tʼipoychik jun i tʼilab axi ti Biblia.
-
Ka tsuʼuwchik ani ka tʼilaʼ jun i video axi ti jw.org.
JAWAʼ TALCHIK IN TSÁLPAYAL: «An tsákamchik axi lej tʼijaxej yabayej in éxbayal jawaʼ in ulal an Biblia».
-
¿Jantʼoj a tsálpayal tatáʼ?
JAWAʼ I EXOBNÁMAL
A Jehová in léʼ abal ka kʼanidháj an tsákamchik, ka exóbchat ani ka beletnáj. In léʼ abal an tsákamchik kin belkaʼ in tátajchik. Jayej, in kónoyal abal ka kʼakʼnáj kʼal patal an yaneláb.
Ki tʼilaʼ jawaʼ i exóbnaʼ
-
¿Jantʼiniʼ in éjtowal an tatalábchik kin exóbchij ani kin béletnaʼ in tsakámil?
-
¿Jantʼiniʼ in éjtowal an tsákamchik kin kʼakʼnaʼ in tátajchik?
-
¿Jaleʼ ti lej alwaʼ abal semana ti semana an yaneláb kin kʼakʼnaʼ junax a Jehová?
KA EXÓBNAʼ JANTʼOJ ÍT
¿Jantʼoj a éjtowal ka exóbchij a tsakámil abal tam ka puwey ka kʼalej alwaʼ?
«Akak i exóbchixtaláb axi lej exbadh abal a tsakámil» (¡Despertad!, núm. 2 2019)
Ka tsuʼuw talchik i tólmixtaláb abal jitaʼchik in beletnál jitaʼ axi payeblábits.
«¿Walám in léʼ a Dios abal ki béletnaʼ i tátajchik tam payeblábits?» (Artículo axi ti jw.org)
Ka tsuʼuw jantʼiniʼ jun i tataláb in exóbnaʼ kin yedhaʼ in tsakámil.
Ka exóbnaʼ jantʼoj in éjtowal kin tʼajaʼ jun i tataláb abal ka neʼdháxin más alwaʼ kʼal in tsakámil.
a Tam an Biblia in ulal abal kwaʼal ka bóliyat an tsakam, in léʼ kin uluw abal kwaʼal ka exóbchat ani ka tólmiyat. Yab in léʼ kin uluw abal kwaʼal ka odhnáj ani ka kwajchikat (Proverbios 4:1).
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
