AJUMTALÁB 52
¿Jaleʼ in tomnál ki tʼajaʼ ti kwéntaj jantʼiniʼ u tóltomnal?
Walám i kwaʼalits jantʼiniʼ ti kulbetnál ku tóltomin. Waʼats talchik i kaw ti Biblia axi neʼets tu ku tólmiy ku tóltomin jantʼiniʼ ti kulbetnál pero jayej ki kulbédhaʼ a Jehová. Ki tsuʼuw talchik kʼal axéʼ xi tsalpadh kaw.
1. ¿Jawaʼ tam tsalpadh kaw axi ti Biblia neʼets tu ku tólmiy ki exlaʼ jantʼiniʼ ku tóltomin?
Jitaʼchik in kʼakʼnál a Dios, kwaʼal ka tóltomin «jantʼiniʼ tin tomnál» ani «kʼal i tsalpadhtaláb», «yab ka tóltomin kʼal i tóltom axi watʼadh jálbidh». Jayej kwaʼal ki koʼoy tʼokat abal ki tejwamédhaʼ abal pel u «kʼakʼnax kal a Dios» (1 Timoteo 2:9, 10). Ka tʼajaʼ ti kwéntaj tseʼ i tsalpadh kaw axi i exobnál kʼal axéʼ an texto. 1) Kwaʼal ku tóltomin «jantʼiniʼ tin tomnál». Walám a tʼajámal ti kwéntaj abal tin bichówil a Jehová, an epchalchik yab jununúl tu tóltomnal, pero kʼal in toltomil ani jantʼiniʼ tu tsʼejkaknal in tejwamedhál abal in kʼakʼnál a Jehová. 2) Yab in yéjenchal «ku tóltomin kʼal i tóltom axi watʼadh jálbidh» axéʼ jayej in léʼ kin uluw abal yab kwaʼal ki kʼwajbaʼ i tóltom abal an atiklábchik tu ku lej metʼaʼ, ejtíl axi lej tinat o axi lej tonól. 3) I tejwamedhál «i tsalpadhtaláb» max ki takuy alwaʼ i toltomil ani yab ki eyendhaʼ jun, expidh kom i tsuʼtal abal axi kʼeʼat jayétsej in eyendhál. 4) I toltomil kwaʼal kin tejwamédhaʼ abal «u kʼakʼnax kʼal a Dios», antsanáʼ jayej an atiklábchik neʼets kin tʼajaʼ ti kwéntaj (1 Corintios 10:31).
2. ¿Jaleʼ ti kwaʼal ki tsalpay kʼal an epchalchik, tam ki takuy i toltomil?
Patal i éjtowal ki takuy jantʼiniʼ i léʼ ku tóltomin. Pero kwaʼal ki tsalpay max yab neʼets ki ódhnaʼ an epchalchik. Yab i léʼ abal an epchalchik kin atsʼaʼ tidhetál kʼal an tóltom axi i kayʼkím. I lej tsápnanchal ki tʼajaʼ ti kwéntaj axéʼ xi kaw: «Ki lubaʼ ki tʼajaʼ jayej jawaʼ in kulbetnál i at inik, abal kʼal nixéʼ ka tólminchat kin más belaʼ» (ka ajiy Romanos 15:1, 2).
3. ¿Jantʼiniʼ i éjtowal ki tólmiy axi kʼeʼat abal ka utey kʼal a Jehová, max ku tóltomin tekedh?
Etsʼey i tsápnanchal ku tóltomin tekedh. Pero más i tʼajál ti kwéntaj an tóltom axi i eyendhál tam u kʼalel ti tamkuntaláb o tam u kalel tu ólnom, kom yab i léʼ abal an atiklábchik kin tsalpay abal yab i pidhál in exbádh an tʼojláb axi i tʼajál. I léʼ ki tólmiy an atiklábchik abal kin exlaʼ tin kwéntaj a Dios ani abal kin tʼajaʼchik ti kwéntaj abal «lej alabél an chubaxtaláb» (Tito 2:10).
ABAL KA EXÓBNAʼ MÁS
Ki tsuʼuw max an tóltom axi i eyendhál, in tejwamedhál abal i kʼakʼnál a Jehová.
Max ku tóltomin tekedh, neʼets ki tejwamédhaʼ abal i kʼakʼnál an atiklábchik axi in kwaʼal jun in éy. A Jehová tu tʼajchal ti kwéntaj jawaʼ i atsʼál ti ichích, pero jayej in léʼ abal ki tejwamédhaʼ kʼal i toltomil abal i kʼakʼnál.
4. Max ku tóltomin jantʼiniʼ tin tomnál, i puwénchal a Jehová
¿Jaleʼ ti lej exbadh ki tʼajaʼ ti kwéntaj jantʼiniʼ tu tóltomnal? Ka ajiychik Salmo 47:2 ani ka tsálpaychik kʼal axéʼ:
-
Kom wawáʼ i tʼojonchal a Jehová, ¿jantʼiniʼ in tomnál ku tóltomin?
-
¿Walám exbadh ki tʼajaʼ ti kwéntaj jantʼiniʼ ti neʼets ku tóltomin abal ku kʼalej ti tamkuntaláb o abal ku kalej tu ólnom? ¿Jaleʼ ta tsálpayal antsanáʼ?
5. Jantʼiniʼ a éjtowal ka exlaʼ jantʼoj tam tóltom ka eyendhaʼ ani jantʼiniʼ kit tsʼejkakan
Yab in yéjenchal ki eyendhaʼ i tóltom axi lej jalbidh. Expidh kwaʼal ka kʼwajiy tʼokat ani yab ka kʼwajiy mítsʼichik. Ka ajiychik 1 Corintios 10:24 ani 1 Timoteo 2:9, 10. Talbél ka tʼilaʼchik jaleʼ ti yab in tomnál ka eyendhaʼ i tóltom axi...
-
... lúklichik o axi yab in tomnál.
-
... axi lej tinat, axi lej dhadhat o axi lej tonól.
Wawáʼ yabáts i yéjenchal ki belkaʼ an abatnaxtaláb axi pidhan an israelitas. Pero axéʼ xi abatnaxtaláb tu tólmiyal abal ki exbay jantʼoj in tsálpayal a Jehová. Ka ajiychik Deuteronomio 22:5 ani ka tsálpaychik kʼal axéʼ:
-
¿Jaleʼ ti yab in tomnál abal jun i inik ka tóltomin jantʼiniʼ jun i uxum, ani jun i uxum jantʼiniʼ i inik?
Ka ajiychik 1 Corintios 10:32, 33 ani 1 Juan 2:15, 16 ani ka tsálpaychik kʼal axéʼ:
-
Max an epchalchik o an atiklábchik in atsʼál tidhetál jantʼiniʼ wawáʼ u tóltomnal, ¿walám in tomnál ki tʼajaʼ ti kwéntaj? ¿Jaleʼ?
-
Juʼtáj tatáʼ it kʼwajíl, ¿jantʼiniʼ in ujnám an atiklábchik ka tóltomin?
-
¿In eyendhálchik i tóltom axi yab in tomnál kin eyendhaʼ in tʼojnálil a Jehová? ¿Jaleʼ ta tsálpayal antsanáʼ?
I éjtowal ku tóltomin jantʼiniʼ wawáʼ i kulbetnál ani jayej i éjtowal ki kulbédhaʼ a Jehová.
JAWAʼ TALCHIK IN TSÁLPAYAL: «Nanáʼ neʼets kin tóltomin jantʼiniʼ ku léʼnaʼ».
-
¿Walám tekedh ki tsalpay antsanáʼ? ¿Jaleʼ?
JAWAʼ I EXOBNÁMAL
Max ku tóltomin jantʼiniʼ tin tomnál, i tejwamedhál abal i kʼakʼnál a Jehová ani an atiklábchik.
Ki tʼilaʼ jawaʼ i exóbnaʼ
-
¿Jaleʼ ti a Jehová in lej tʼajál ti kwéntaj jantʼiniʼ u tóltomnal?
-
¿Jantʼoj tam tsalpadh kaw in tomnál ki tʼajaʼ ti kwéntaj abal ki exlaʼ jantʼiniʼ ku tóltomin?
-
¿I éjtowal ki tólmiy an atiklábchik abal kin exlaʼ tin kwéntaj a Jehová, max ku tóltomin alwaʼ? ¿Jantʼiniʼ?
KA EXÓBNAʼ JANTʼOJ ÍT
Ka tsalpay jantʼoj in tejwamedhál an tóltom axi a kaʼiyal.
Ka tsuʼuw jaleʼ ti kwaʼal ka alwaʼ tsalpay, max a léʼ ka punuw jun i tatuaje.
«¿Walám in tomnál ki punuw jun i tatuaje?» (Artículo axi ti jw.org)
Ka tsuʼuw kʼeʼat i tsalpadh kaw axi neʼets ti tólmiy ka exlaʼ jantʼoj ka tʼajaʼ.
«¿I puwénchal a Jehová jantʼiniʼ u tóltomnal?» (La Atalaya, septiembre de 2016)
¿Jantʼiniʼ in exóbnaʼ jun i mimláb abal yab kin lej tʼajaʼ ti kwéntaj jantʼiniʼ u tóltomnal axi kʼeʼat?
«Yab u kulbetnálak jantʼiniʼ u tóltomnal axi kʼeʼatchik» (¡Despertad!, 22 de diciembre de 2003)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
