AJUMTALÁB 53
Jawaʼ ka takuy abal kit kʼijidhbéj, kwaʼal kin kulbédhaʼ a Jehová
A Jehová pel «jun i Dios axi etsʼey u kulbél» (1 Timoteo 1:11). Jajáʼ in léʼ abal wawáʼ jayej ku kʼwajiy kulbél ani ku kʼijidhbéj. Ani in kulbetnál abal ki wéʼ jilaʼ an tʼojláb ani ku wéʼ koyóts. Al axéʼ xi ajumtaláb neʼets ki exóbnaʼ, jantʼiniʼ i éjtowal ku kʼijidhbéj jantʼiniʼ a Jehová in kulbetnál.
1. ¿Jantʼoj kwaʼal ki tʼajaʼ ti kwéntaj tam neʼets ki takuy jantʼiniʼ ku kʼijidhbéj?
¿Jantʼoj a kulbetnál ka tʼajaʼ tam yab i tʼojlidh ani a léʼ kit koyóts? Talchik in kulbetnál ka jílkʼon tin kʼimáʼ abal ti ajum, kin atsʼaʼ i son, kin metʼaʼ i películas o kʼeʼat jantʼoj ti Internet. Kʼeʼatchik, in kulbetnál ka kalej ti belelél kʼal in jaʼúb, ka kʼalej ti kówal o ka kʼalej ti ubatʼ. Jawakits ki takuy ki tʼajaʼ, expidh kwaʼal ki tʼajaʼ ti kwéntaj «max pel in kulbétal a Jehová» (Efesios 5:10). Lej exbadh ki tsalpay kʼal axéʼ, kom yan i atikláb in ujnám ka kʼijidhbéj kʼal yan jantʼoj axi a Jehová in pojkál. Ejtíl, in kulbetnálchik kin tsuʼuw axi u pejéx, axi u kwatsílchik junax ani kʼeʼat jantʼoj axi kʼakʼadh (ka ajiy Salmo 11:5). ¿Jantʼoj neʼets tu ku tólmiy abal ki takuy alwaʼ kʼal jantʼoj neʼets ku kʼijidhbéj?
Max ki jaʼúbnaʼ jitaʼchik in kʼanidhál a Jehová, neʼets tu ku tólmiy abal ki exlaʼ jantʼiniʼ ku kʼijidhbéj. Ban ajumtaláb 48 i exóbnaʼ abal «axi kʼwajat ti xéʼtsinal kʼal i atikláb axi tsalpadh, neʼets ka tsalpadhméj». Pero jayej i tʼajaʼ ti kwéntaj abal jitaʼchik in ujnám kin junkuw i atikláb axi yab in kʼanidhál a Jehová, «yab neʼets ka kʼalej alwaʼ» (Proverbios 13:20).
2. ¿Jaleʼ ti lej exbadh ki tʼajaʼ ti kwéntaj jay i kʼij i eyendhál abal ku kʼijidhbéj?
Bélits max tékedhits jantʼiniʼ u kʼijidhbél, kwaʼal ki tʼajaʼ ti kwéntaj jay i kʼij i eyendhál. Max ki lej watʼkʼanchij, yabáts neʼets ku jólkʼan ki tʼajaʼ jawaʼ más exbadh. An Biblia tu uchál abal ki eyendhaʼ alwaʼ an kʼij ani jayej tu uchál abal ki «tsémenchij ki etsʼey tʼajpichikiy jawaʼ alwaʼ» (ka ajiy Efesios 5:15, 16).
ABAL KA EXÓBNAʼ MÁS
Ki tsuʼuw jantʼoj a éjtowal ka tʼajaʼ abal ka exlaʼ jantʼiniʼ kit kʼijidhbéj.
3. Yab kit kʼijidhbéj kʼal jantʼoj axi in éjtowal ti ódhnaʼ
¿Jaleʼ ti lej exbadh ki takuy alwaʼ kʼal jantʼoj neʼets ku kʼijidhbéj? Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jaleʼ ti yan jantʼoj axi waʼats xowéʼ abal ku kʼijidhbéj, pel jantʼiniʼ an juegos axi in tʼajálak an gladiadores axi ti Roma?
-
¿Jantʼiniʼ in exóbnaʼ a Danny abal kwaʼal ka kʼijidhbéj?
Ka ajiychik Romanos 12:9 ani ka tsálpaychik kʼal axéʼ:
-
¿Jantʼiniʼ tu tólmiyal axéʼ xi versículo abal ki exlaʼ alwaʼ jantʼiniʼ ku kʼijidhbéj?
¿Jantʼoj játs axi a Jehová yab in kulbetnál? Ka ajiychik Proverbios 6:16, 17 ani Gálatas 5:19-21. Talbél ta ajiyamal ti junchik axéʼ xi textos ka tsálpaychik kʼal axéʼ:
-
Kʼal jawaʼ in ulal axéʼ xi versículos, ¿jantʼoj játs axi yan i atikláb in tákuyal abal ka kʼijidhbéj?
Ka takuy alwaʼ jantʼiniʼ it kʼijidhbél
Ka tsalpay:
-
¿Jantʼoj játs axéʼ? ¿In kwaʼal jantʼoj axi a Jehová in pojkál?
-
¿Jaykʼiʼ? ¿Walám kwaʼal ku jilaʼ ku tʼajaʼ kʼeʼat jantʼoj axi más exbadh?
-
¿Kʼal jitaʼ? ¿Neʼets kin tʼajaʼ abal ku junkuw i atiklábchik axi yab in kʼakʼnál a Jehová?
Abal yab ki yajchiknaʼ, kwaʼal ku owméj kʼal jawaʼ kʼakʼadh. Jaxtám yab kwaʼal ku kʼijidhbéj kʼal jantʼoj axi in éjtowal tu ku ódhnaʼ.
4. Ka eyendhaʼ alwaʼ an kʼij
Ka tsuʼuwchik an VIDEO ani ka tʼilaʼchik jawaʼ a tsuʼuw:
-
Bélits abal an epchal yab kʼwajatak in tʼajál jantʼoj kidháb, ¿jaleʼ ti yab kʼwajatak in eyendhál tekedh an kʼij?
Ka ajiychik Filipenses 1:10 ani ka tsálpaychik kʼal axéʼ:
-
¿Jantʼiniʼ tu tólmiyal axéʼ xi versículo abal ki exlaʼ jay i kʼij neʼets tu kʼijidhbéj?
5. Kit kʼijidhbéj kʼal jantʼoj axi yab neʼets ti ódhnaʼ
Waʼats yan jantʼoj axi a Jehová yab in kulbetnál ki eyendhaʼ abal ku kʼijidhbéj, pero jayej waʼats yan jantʼoj kʼal axi i éjtowal ku kʼijidhbéj. Ka ajiychik Eclesiastés 8:15 ani Filipenses 4:8 ani ka tsálpaychik kʼal axéʼ:
-
¿Kʼal jantʼoj a kulbetnál kit kʼijidhbéj?
Waʼats yan jantʼoj axi i éjtowal ki tʼajaʼ abal ku kʼijidhbéj, ani yab kidháb.
JAWAʼ TALCHIK IN TSÁLPAYAL: «Yab jantʼoj in kwaʼal max kin kʼijidhbéj kʼal jantʼoj axi kidháb, expidh kom yab ku tʼajaʼ».
-
¿Jantʼoj a tsálpayal tatáʼ?
JAWAʼ I EXOBNÁMAL
A Jehová in léʼ abal ku kʼwajiy kulbél ani ki takuy alwaʼ kʼal jantʼoj neʼets ku kʼijidhbéj.
Ki tʼilaʼ jawaʼ i exóbnaʼ
-
¿Jantʼoj játs axi yab i eyendhál abal ku kʼijidhbéj?
-
¿Jaleʼ ti kwaʼal ki tʼajaʼ ti kwéntaj jay i kʼij i eyendhál abal ku kʼijidhbéj?
-
¿A léʼ tataʼ kit kʼijidhbéj kʼal jantʼoj axi in kulbetnál a Jehová? ¿Jaleʼ?
KA EXÓBNAʼ JANTʼOJ ÍT
Ka tsuʼuw jitaʼ kwaʼal tu ku álchinchij kʼal jantʼoj ku kʼijidhbéj.
Ka tsuʼuw jantʼiniʼ a éjtowal ka takuy alwaʼ kʼal jantʼoj kit kʼijidhbéj.
«¿Walám tékedhits jawaʼ i eyendhál abal ku kʼijidhbéj?» (La Atalaya, 15 de octubre de 2011)
Ka tsuʼuw jaleʼ ti jun i inik in jalkʼuy kʼal jantʼoj tu kʼijidhbélak, ka ajiy an biografía «U jilaʼ ku kʼeʼatnaʼ an atiklábchik».
«Tólmiyatchik kʼal an Biblia abal kin jalkʼuy in ejatal» (La Atalaya, 1 de febrero de 2010)
Ka tsuʼuw jantʼoj in tʼajaʼ jun i mimláb abal kin jilaʼ ka kʼijidhbéj kʼal jantʼoj axi yab tekedh.
Yab ku kʼijidhbéj kʼal jantʼoj axi in kʼál an kidháb (1:59)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
