A Jesús pel an «ókʼlek kʼal in bichówil a Jehová» (Efesios 5:​23). Xowéʼ ta kʼicháj, a Jesús kʼwajat in eyendhál «an tʼojnal axi putudh ani tsalpadh» abal kin ókʼnaʼ an tʼojláb tejéʼ Tsabál (ka ajiy Mateo 24:​45). Axéʼ xi «tʼojnal axi putudh ani tsalpadh» in kwaʼal in éy, kom pel kʼal a Jesús ti bijiyámej. Jajáʼchik u tʼojnal tsapik abal kin béletnaʼ an epchalchik, ani yab in tsálpayal abal in kwaʼal más in éy. ¿Jitaʼ játs axéʼ xi tʼojnal? ¿Jantʼiniʼ tu beletnál?

1. ¿Jitaʼ játs «an tʼojnal axi putudh ani tsalpadh»?

A Jehová etsʼey in eyendhámal i atiklábchik abal kin ókʼnaʼ in bichówil (Malaquías 2:7; Hebreos 1:1). Jun i tʼiplab, tam ti tsemets a Jesús, an abatwálejchik ani an ókʼnomchik axi ti Jerusalén játs in ókʼnaʼ an tamkuntaláb (Hechos 15:2). Xowéʼ jayej waʼats jun i Kwenél i Ókʼnom axi in okʼnál an Ólchixchik kʼal a Jehová. Jajáʼchik in okʼnál an olnomtaláb ani tu pidhál an exobchixtaláb. Axéʼ xi Kwenél i Ókʼnom játs «an tʼojnal axi putudh ani tsalpadh [axi bíjiyat kʼal a Jesús] ti béletnom» (Mateo 24:45a). Patal axi ajidh ban Kwenél i Ókʼnom, in kwaʼal an aychixtaláb ka kʼalej ti abatnom kʼal a Jesús ti éb, tam ka koyóts tejéʼ Tsabál.

2. ¿Jantʼoj tam exobchixtaláb tu pidhál an tʼojnal axi putudh ani tsalpadh?

A Jesús in uluw abal an tʼojnal axi putudh ani tsalpadh in kwaʼal in uchbíl tu ku «pidhaʼ an kʼapnél al an kʼij axi in tomnál» (Mateo 24:45b). An kʼapnél axi i eyendhál chudhél chudhél, tu tólmiyal ku kʼwajiy tsapik ani lubach. Antsanáʼ jayej, an exobchixtaláb axi kʼwajat ti Biblia pel ejtíl i kʼapnél, kom tu tólmiyal ki koʼoy tsapik i bélomtal ani ki putuw kʼal i uchbíl (1 Timoteo 4:6). Axéʼ xi exobchixtaláb i bátsʼuwal ban tamkuntaláb, ban púlik tamkuntaláb, kʼal an publicaciones ani an videos. Patal axéʼ xi exobchixtaláb kʼwajat kaldhach ti Biblia. Antsanáʼ i éjtowal ki exlaʼ jantʼoj tu konchal a Jehová ki tʼajaʼ, ani u utel más kʼal Jajáʼ.

 ABAL KA EXÓBNAʼ MÁS

3. In bichówil a Jehová kwaʼal ka kʼwajiy tʼojojodh

A Jesús in eyendhál an Kwenél i Ókʼnom abal kin ókʼnaʼ an tʼojláb axi in tʼajál an ólchixchik kʼal a Jehová. Ti kʼaʼál siglo, antsanáʼ tu okʼnábakits an tamkuntaláb. Ka tsuʼuwchik an VIDEO.

Ka ajiychik 1 Corintios 14:​33, 40 ani ka tsálpaychik kʼal axéʼ:

• Kʼal jawaʼ in ulal axéʼ xi versículos, ¿in léʼ a Jehová abal in tʼojnálil ka kʼwajiy tsʼejkakadh? ¿Jaleʼ ta tsálpayal antsanáʼ?

4. An tʼojnal axi putudh ani tsalpadh in okʼnál an olnomtaláb

Abal an epchalchik axi ti kʼaʼál siglo, an olnomtaláb játsak an tʼojláb axi más exbadh. Ka ajiychik Hechos 8:​14, 25 ani ka tsálpaychik kʼal axéʼ:

• ¿Jitaʼchik in okʼnalák an olnomtaláb ban kʼaʼál siglo?

• ¿Jantʼoj in tʼajaʼ a Pedro ani a Juan kʼal an olchixtaláb axi pidhan kʼal axi más an abatwálej?

An tʼojláb axi más exbadh axi in okʼnál an Kwenél i Ókʼnom pel an olnomtaláb. Ka tsuʼuwchik an VIDEO.

 A Jesús in uluw abal lej exbadh ku olnomáts. Ka ajiychik Marcos 13:​10 ani ka tsálpaychik kʼal axéʼ:

• ¿Jaleʼ ti lej exbadh an olnomtaláb abal an Kwenél i Ókʼnom?

• ¿Jaleʼ ti yéjenchal abal «an tʼojnal axi putudh ani tsalpadh» kin ókʼnaʼ an olnomtaláb axi tin puwél an Tsabál?

5. An tʼojnal axi putudh ani tsalpadh tu okʼnál

An Kwenél i Ókʼnom in okʼnál in bichówil a Jehová. ¿Jantʼiniʼ in tʼajál abal kin exlaʼ jantʼoj tam exobchixtaláb tu ku pidhaʼ? Ki tsuʼuw jantʼiniʼ tin tʼajálak an Kwenél i Ókʼnom axi ti kʼaʼál siglo. Ka ajiychik Hechos 15:​1, 2 ani ka tsálpaychik kʼal axéʼ:

• ¿Jantʼoj tam kʼibataláb waʼtsin ti kʼaʼál siglo?

• ¿Jitaʼchik in konchij i tolmixtaláb a Pablo ani a Bernabé abal kin tsʼejkaʼ axéʼ xi kʼibataláb?

Ka ajiychik Hechos 15:​12-​18 ani 23-​29 ani ka tsálpaychik kʼal axéʼ:

• ¿Jantʼoj in tʼajaʼ an Kwenél i Ókʼnom abal ka tólmiyat kʼal a Jehová, kin tsʼejkaʼ nixéʼ xi kʼibataláb? (Ka tsuʼuwchik an versículos 12, 15 ani 28).

Ka ajiychik Hechos 15:​30, 31 ani 16:​4, 5 ani ka tsálpaychik kʼal axéʼ:

• ¿Jantʼiniʼ tin batsʼuw an epchalchik an olchixtaláb axi abchat kʼal an Kwenél i Ókʼnom?

• ¿Jaleʼ i exlál abal lábliyatchik kʼal a Jehová kom bélkaxin?

Ka ajiychik 2 Timoteo 3:​16 ani Santiago 1:5 ani ka tsálpaychik kʼal axéʼ:

• Xowéʼ ta kʼicháj, ¿jantʼoj in tʼajál an Kwenél i Ókʼnom abal kin aliy in tólmixtal a Jehová?

 JAWAʼ I EXOBNÁMAL

An Kwenél i Ókʼnom pel «an tʼojnal axi putudh ani tsalpadh» axi takuyámej kʼal a Cristo. Axéʼ xi tʼojnal in pidhál i exobchixtaláb ani olchixtaláb an epchalchik axi tin puwél an Tsabál.

Ki tʼilaʼ jawaʼ i exóbnaʼ

• ¿Kʼal jitaʼ ti bíjiyat «an tʼojnal axi putudh ani tsalpadh»?

• ¿Jantʼiniʼ tu beletnál an «Kwenél i Ókʼnom»?

• ¿A belál abal an Kwenél i Ókʼnom, játs «an tʼojnal axi putudh ani tsalpadh?».