AJUMTALÁB 55
Kit tólmixin ti tamkuntaláb
Tin puwél an Tsabál waʼats yan i tamkuntaláb juʼtáj tu kʼakʼnáb a Jehová. Tanáʼ, an ólchixchik kʼal a Jehová in bátsʼuwal i exobchixtaláb. In lej kʼakʼnálchik, jaxtám u tólmix kʼal yan i kulbetaláb al jawakits tam tʼojláb axi u tʼajnal. ¿A atsʼál tatáʼ jayej kʼijidh ti tamkuntaláb?
1. ¿Jantʼiniʼ a éjtowal ka eyendhaʼ a tsap ani an kʼij, abal kit tólmixin ti tamkuntaláb?
Waʼats yan jantʼoj axi i éjtowal ki tʼajaʼ abal ku tólmixin ti tamkuntaláb. Ka tsalpay kʼal axéʼ: ¿Waʼats i epchalchik axi payeblábits o axi u yaʼul, axi a éjtowal ka tólmiy abal ka kʼalej ti tamkuntaláb? ¿A éjtowal ka tsʼaychinchij jawaʼ in yéjenchal o ka tólmiy kʼal jun i tʼojláb tin kʼimáʼ? (Ka ajiy Santiago 1:27). Jayej, i éjtowal ku tólmixin abal ka tʼokdháj an Atáj Tamkuntaláb ani ka beletnáj. Yab jitaʼ tu nixoknál ku tólmixin, i tʼajál kʼal i kulbétal kom i kʼanidhál a Jehová ani an epchalchik (Salmo 110:3).
Tam jun ka pújanits, in éjtowal ka tólmixin kʼal kʼeʼat i tʼojláb axi u tʼajnal ti tamkuntaláb. Ejtíl, an epchal inik in éjtowal kin tsápnanchij abal kin bajuw ti tólmix ókʼnom ani talbél ti ókʼnom. Ani patal an epchal, an inik ani an uxum, in éjtowal ka tʼojon más ban olnomtaláb ani kin tʼajaʼ ti precursor. Waʼats i epchal axi in éjtowal ka tólmixin abal ka tsʼejkáj i Atáj Tamkuntaláb. Kʼeʼatchik u kʼalel ti tólmix al pil i tamkuntaláb, juʼtáj tu yejencháb más i ólnom.
2. ¿Jantʼiniʼ i éjtowal ki eyendhaʼ i tumínal ani jawaʼ i kwaʼal, abal ku tólmixin ti tamkuntaláb?
An Biblia in ulal: «Ka kʼakʼnaʼ a Jehová kʼal jawaʼ a kwaʼal» (Proverbios 3:9). Wawáʼ i lej kulbetnál ki eyendhaʼ i tumínal ani kʼeʼat jantʼoj axi i kwaʼal, abal ki tólmiy an tamkuntaláb ani an olnomtaláb (ka ajiy 2 Corintios 9:7). An tumín axi i binál jayej u eyendháb abal ka tólmiyat kʼeʼat i epchalchik, axi in watʼamal jun i yajchiktaláb. Yan i epchal in ujnám kin koʼoy wéʼ i tumín «támkudhits» abal kin bínaʼ i donaciones (ka ajiy 1 Corintios 16:2). A éjtowal ka baliy i donaciones ban cajas axi waʼats ti Atáj Tamkuntaláb o ka abaʼ ti donate.pr418.com. A Jehová in bátsʼuwal ki pidhaʼ jawaʼ i kwaʼal, abal ki tejwamédhanchij abal i kʼanidhál.
ABAL KA EXÓBNAʼ MÁS
Ki tsuʼuw jantʼiniʼ a éjtowal tatáʼ kit tólmixin ti tamkuntaláb.
3. A éjtowal ka eyendhaʼ jawaʼ a kwaʼal
A Jehová ani a Jesús u lej kulbél tam wawáʼ i binál kʼal i kulbétal. A Jesús in lej tʼajaʼ ti kwéntaj an tumín axi in bínaʼ jun i mimláb axi tsemchidh. Ka ajiychik Lucas 21:1-4 ani ka tsálpaychik kʼal axéʼ:
-
¿Walám kwaʼal ki bínaʼ yan i tumín abal a Jehová ka kʼwajiy kulbél?
-
¿Jantʼiniʼ in atsʼál a Jehová ani a Jesús tam wawáʼ ki bínaʼ kʼal i kulbétal?
Abal ka exlaʼ jantʼiniʼ u eyendháb an donaciones, ka tsuʼuwchik an VIDEO. Talbél ka tʼilaʼchik jawaʼ a tsuʼuw:
-
¿Jantʼiniʼ u tolmiyáb an epchal axi tin puwél an Tsabál kʼal an donaciones axi i binál?
4. A éjtowal kit tólmixin
Ti biyál, yan in tʼojnálil a Jehová in eyendhaʼchik in tsap abal kin béletnaʼ in kʼimáʼ a Jehová. Ka ajiychik 2 Crónicas 34:9-11 ani ka tsálpaychik kʼal axéʼ:
-
¿Jantʼoj in tʼajaʼ an israelitas abal ka beletnáj «an atáj juʼtáj tu kʼakʼnábak a Jehová»?
An ólchixchik kʼal a Jehová jayej i tʼajál antsanáʼ xowéʼ ta kʼicháj. Abal ka exlaʼchik jantʼiniʼ i tʼajál, ka tsuʼuwchik an VIDEO. Talbél ka tʼilaʼchik jawaʼ a tsuʼuw:
-
¿Jaleʼ ti lej exbadh ki koʼoy tʼokat ani béletnadh an atáj juʼtáj u támkunal abal ki kʼakʼnaʼ a Jehová?
-
¿Jantʼiniʼ a éjtowal tatáʼ kit tólmixin?
5. An epchal inik in éjtowal ka tólmixin más ti tamkuntaláb
An Biblia in ulal abal an epchal inik in tomnál kin tsápnanchij ka utey más kʼal a Jehová, kom antsanáʼ neʼets kin ejtow ka tólmixin más ti tamkuntaláb. Abal ka exlaʼchik jantʼiniʼ in tʼajaʼ axéʼ jun i epchal, ka tsuʼuwchik an VIDEO. Talbél ka tʼilaʼchik jawaʼ a tsuʼuw:
-
¿Jantʼoj in tʼajaʼ a Ryan abal ka utey más kʼal a Jehová ani ka tólmixin más ti tamkuntaláb?
An Biblia in ulal jantʼoj in tomnál kin tʼajaʼ an epchalchik abal kin bajuw ti tólmix ókʼnom ani ti ókʼnom. Ka ajiychik 1 Timoteo 3:1-13 ani ka tsálpaychik kʼal axéʼ:
-
¿Jantʼoj kwaʼal kin tʼajaʼ jun i epchal abal kin bajuw ti tólmix ókʼnom o ti ókʼnom?
-
¿Jantʼoj kwaʼal kin tʼajaʼ in yanél? (Ka tsuʼuwchik an versículos 4 ani 11).
-
Max an epchalchik kin tsápnanchij kin putuw kʼal axéʼ, ¿jantʼoj tam alwataláb neʼets kin batsʼuw an tamkuntaláb?
JAWAʼ TALCHIK WALÁM TI KONOY: «¿Juʼtáj tin elal an tumín an ólchixchik kʼal a Jehová, abal kin tʼajaʼ patal in tʼojlábil?».
-
¿Jantʼoj neʼets ka tókʼtsiy?
JAWAʼ I EXOBNÁMAL
A Jehová u lej kulbél kom i binál kʼal i kulbétal i tsap, i kʼij ani jawaʼ i kwaʼal abal ku tólmixin ti tamkuntaláb.
Ki tʼilaʼ jawaʼ i exóbnaʼ
-
¿Jantʼiniʼ i éjtowal ki eyendhaʼ i kʼij ani i tsap abal ku tólmixin ti tamkuntaláb?
-
¿Jantʼiniʼ i éjtowal ki eyendhaʼ jawaʼ i kwaʼal, abal ku tólmixin ti tamkuntaláb?
-
¿Jantʼiniʼ a léʼ tatáʼ kit tólmixin ti tamkuntaláb?
KA EXÓBNAʼ JANTʼOJ ÍT
Ka exóbnaʼ jaleʼ ti a Dios yabáts tu konchal ki bínaʼ an diezmo.
«¿Jantʼoj in ulal an Biblia tin kwéntaj an diezmo?» (Artículo axi ti jw.org)
Ka exlaʼ jantʼoj in léʼak kin uluw a Pablo kʼal an kaw axi kʼwajat ti 1 Timoteo 3:1.
«¿Kʼwajat a tsápnanchal ka bajuw?» (La Atalaya, 15 de septiembre de 2014)
Ka tsuʼuw jantʼoj tam tsapláb in tʼajámal talchik i epchal, abal an tamkuntalábchik kin batsʼuw an publicaciones.
Ka tʼajaʼ ti kwéntaj juʼtáj tu kalel an tumín axi an ólchixchik kʼal a Jehová in eyendhál abal kin tʼajaʼ in tʼojlábil.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
