Tam u kʼwajat kʼal an epchalchik i atsʼál jantʼiniʼ a David. Jajáʼ in dhuchaʼ: «¡Pel jantʼoj alwaʼ ani lej kʼijidh abal an epchalchik ka kʼwajiy junkudh!» (Salmo 133:1). Abal ku kʼwajiy junkudh, in yéjenchal abal junchik kʼal wawáʼ ki lej tsápnanchij.

1. ¿Jantʼoj játs axi más u tejwamél tin bichówil a Jehová?

Max tatáʼ kit kʼalej al pil i bichow ani ka tsaʼbiy jun i tamkuntaláb neʼets ka atsʼaʼ lej alwaʼ, bélits max yab ka éxbanchij in káwintal an epchalchik, ¿jaleʼ? Kom neʼets ka tʼajaʼ ti kwéntaj abal al patal an tamkuntaláb, jayetsej an publicaciones axi u eyendháb abal ki exóbnaʼ an Biblia. Jayej i tsápnanchal ku kʼanidháxin. Juʼtámakits ku kʼwajiy, patal i léʼ «ki puwénchij a Jehová» ani ki kʼakʼnaʼ «junkudh» (Sofonías 3:9; nota).

2. ¿Jantʼiniʼ a éjtowal kit tólmixin abal an tamkuntaláb ka kʼwajiy junkudh?

«Kit kʼanidháxin kʼal patal a ichích» (1 Pedro 1:​22). ¿Jantʼiniʼ a éjtowal ka tʼajaʼ axéʼ? Yab ka lej tʼajaʼ ti kwéntaj max an epchalchik u ukʼpinal, ka metʼanchij jawaʼ in tʼajál alwaʼ. Yab expidh ka junkuw i epchalchik axi jayej in tʼajál jawaʼ tatáʼ a kulbetnál, ka tsápnanchij ka exlaʼ i epchalchik axi pil in káwintal ani in bichówil. Jayej ka tsápnanchij ka tsuʼuw jununúl patal ani yab ka kʼeʼatnaʼ nibal jitaʼ (ka ajiy 1 Pedro 2:​17). a

3. ¿Jantʼoj neʼets ka tʼajaʼ tam ka koʼoy jun i kʼibataláb kʼal jun i epchal?

I tsápnanchal ku kʼwajiy junkudh pero kom u wálbidh, junchikíl neʼets ki uluw o neʼets ki tʼajaʼ jantʼoj axi neʼets kin yajbedhaʼ kʼeʼat i epchal o walám junchikíl jajáʼchik neʼets kin tʼajaʼ o kin uluw jantʼoj axi neʼets ki yajnaʼ. Jaxtám an Biblia in ulal: «Kit pakwlanchíxin». Ani talbél in ulal: «Antsanáʼ jantʼiniʼ a Jehová ti pákwlanchij, tatáʼchik jayej ka tʼajaʼ» (ka ajiy Colosenses 3:​13). Wawáʼ yaníl i yajbédhanchal in ichích a Jehová, bélits antsanáʼ tu pákwlanchal. Jaxtám, Jajáʼ tu konchal abal ki pákwlanchij jayej an epchalchik. Max ka tʼajaʼ ti kwéntaj abal a yajbedhámal jun i epchal, ka tsápnanchij ka tsʼejkaʼ an kʼibataláb (ka ajiy Mateo 5:​23, 24). b

 ABAL KA EXÓBNAʼ MÁS

4. Yab ka kʼeʼatnaʼ nibal jitaʼ

Wawáʼ i tsápnanchal ki kʼanidhaʼ an epchalchik, pero walám junchikíl i atsʼál kʼibat ki jaʼúbnaʼ jitaʼchik i tsálpayal abal lej pilits jantʼiniʼ in ey. ¿Jantʼoj neʼets tu ku tólmiy? Ka ajiychik Hechos 10:​34, 35 ani ka tsálpaychik kʼal axéʼ:

• A Jehová in bátsʼuwal ka kʼakʼnáj kʼal patal an atikláb, tam ¿jantʼoj in tomnal ki tsalpay kʼal an atiklábchik axi lej pilits kʼal wawáʼ?

• ¿A tʼajámal ti kwéntaj max an atiklábchik axi ta kwenchálil in kʼeʼatnál axi más? ¿Jaleʼ ti yab in tomnál abal tatáʼ jayej ka tʼajaʼ antsanáʼ?

Ka ajiychik 2 Corintios 6:11-13 ani ka tsálpaychik kʼal axéʼ:

• ¿Jantʼoj a éjtowal ka tʼajaʼ abal ka kʼanidhaʼ más an epchalchik?

5. Kit pakwlanchíxin ani ka tsʼejkaʼ an kʼibataláb

A Jehová yab jaykʼiʼ neʼets kin yéjenchij ki pákwlanchij, pero Jajáʼ tu pákwlanchal kʼal yan i kʼanidhomtaláb. Ka ajiychik Salmo 86:5 ani ka tsálpaychik kʼal axéʼ:

• ¿Jantʼoj tu exóbchal axéʼ xi versículo tin kwéntaj a Jehová?

• ¿A kʼakʼnanchal a Jehová kom tu pákwlanchal i wálab? ¿Jaleʼ?

• ¿Jaykʼiʼ walám neʼets ki atsʼaʼ kʼibat ku neʼdháxin alwaʼ kʼal jun i epchal?

¿Jantʼoj i éjtowal ki tʼajaʼ abal ki nítsʼbiy a Jehová ani ku kʼwajiy junkudh kʼal an epchalchik? Ka ajiychik Proverbios 19:​11 ani ka tsálpaychik kʼal axéʼ:

• Tam jun i epchal kin tʼajaʼ jantʼoj axi tatáʼ yab a kulbetnál, ¿jantʼoj a éjtowal ka tʼajaʼ abal yab kit itʼixbéj?

 Junchikíl, wawáʼ neʼets ki uluw o ki tʼajaʼ jantʼoj axi in éjtowal kin itʼixbédhaʼ axi kʼeʼat. Tam ka watʼey antsanáʼ, ¿jantʼoj in tomnál ki tʼajaʼ? Ka tsuʼuwchik an VIDEO ani ka tʼilaʼchik jawaʼ a tsuʼuw:

• ¿Jantʼiniʼ in ejtow an epchal kin tsʼejkaʼ an kʼibataláb?

 JAWAʼ I EXOBNÁMAL

Max tatáʼ ka pákwlanchij an epchalchik ani ka tejwamédhaʼ i kʼanidhomtaláb, neʼets kit tólmixin abal kit kʼwajiychik más junkudh ti tamkuntaláb.

Ki tʼilaʼ jawaʼ i exóbnaʼ

• ¿Jantʼoj a éjtowal ka tʼajaʼ abal yab ka kʼeʼatnaʼ nibal jitaʼ?

• ¿Jantʼoj neʼets ka tʼajaʼ tam ka koʼoy jun i kʼibataláb kʼal jun i epchal?

• ¿A léʼ ka tsápnanchij ka pákwlanchij axi kʼeʼat, antsanáʼ jantʼiniʼ in tʼajál a Jehová? ¿Jaleʼ?